ມີເດຍລາວແຂວງຫຼວງພະບາງ ຂ່າວ: ສຸລິພົນ ວິໄລພອນ
ໃນຕອນບ່າຍຂອງວັນທີ 16 ມີຖຸນາ 2021 ນີ້ກອງບັນຊາການທະຫານເມືອງຈອມເພັດໄດ້ຈັດພິທີປະກາດແຕ່ງຕັ້ງໜ້າທີ່ໃຫ້ນາຍທະຫານກອງຮ້ອຍ 12 ທີ່ຂຶ້ນກັບກອງບັນຊາການທະຫານເມືອງຈອມເພັດ ໂດຍການເປັນປະທານຂອງສະຫາຍ ພັທ ຄຳຜາຍ ບົວລະພາ ຮອງເລຂາຄະນະພັກຮາກຖານ, ຫົວໜ້າການທະຫານກອງບັນຊາການທະຫານເມືອງຈອມເພັດ, ມີຄະນະພັກ – ຄະນະບັນຊາຄະນະກອງຮ້ອຍ 12 ຕະຫຼອດຮອດພະນັກງານ-ນັກຮົບພາຍໃນກົມກອງເຂົ້າຮ່ວມ.

ໃນພິທີ ສະຫາຍ ພັທ ຄຳເຜີຍ ແກ້ວທຸມມາ ຫົວໜ້າພະແນກການເມືອງ, ຮອງຫົວໜ້າການເມືອງກອງບັນຊາການທະຫານເມືອງຈອມເພັດ ໄດ້ຂຶ້ນຜ່ານຂໍ້ຕົກລົງຂອງກອງບັນຊາການທະຫານແຂວງຫຼວງພະບາງ ວ່າດ້ວຍການແຕ່ງຕັ້ງ ແລະ ຊັບຊ້ອນໜ້າທີ່ໃໝ່ໃຫ້ນາຍ ແລະ ພົນທະຫານຢູ່ກອງບັນຊາການທະຫານເມືອງຈອມເພັດ ໃນນັ້ນແມ່ນໄດ້ແຕ່ງຕັ້ງ ແລະ ຊັບຊ້ອນຍົກຍ້າຍ ສະຫາຍ ຮ້ອຍໂທ ແພງ ສຸທະວິໄຊ ຊ່ວຍວຽກຂະແໜງສູ້ຮົບຢູ່ກອງບັນຊາການຂຶ້ນເປັນຮອງຫົວໜ້າການທະຫານຢູ່ກອງຮ້ອຍ 12 ທີ່ຂຶ້ນກັບກອງບັນຊາການທະຫານເມືອງຈອມເພັດ,

ໂອກາດນີ້ ສະຫາຍ ພັຕ ບຸນມາ ສຸລິເອ ຫົວໜ້າການເມືອງກອງຮ້ອຍ 12 ໄດ້ຂຶ້ນຜ່ານບົດສະຫຼຸບປະຈຳ 6 ເດືອນຕົ້ນປີ 2021 ແລະ ກໍານົດທິດທາງແຜ່ນການ 6 ເດືອນທ້າຍປີ 2021 ເຊິ່ງບົດສະຫຼຸບໄດ້ຍົກໃຫ້ເຫັນວຽກງານຫຼາຍດ້ານທີ່ມີຜົນສໍາເລັດອັນພົ້ນເດັ່ນ ບົນພື້ນຖານແມ່ນການຈັດຕັ້ງປະຕິບັດໜ້າທີ່ການເມືອງຂອງກົມກອງ ໂດຍສອດຫ້ອຍກັບວຽກງານສຶກສາອົບຮົມການເມືອງນຳພາແນວຄິດໃຫ້ແກພະນັກງານ-ນັກຮົບ, ວຽກງານເຮັດໃຫ້ສະພາບມີຄວາມສະຫງົບ, ການປັບປຸງກໍ່ສ້າງພັກ – ກໍ່ສ້າງພະນັກງານ ແລະ ວຽກງານອົງການຈັດຕັ້ງມະຫາຊົນ, ວຽກງານພະລາທິການຕາມທິດເພີ່ງຕົ້ນເອງ, ກຸ່ມຕົ້ນເອງ ແລະ ສ້າງຄວາມເຂັ້ມແຂ່ງດ້ວຍຕົ້ນເອງ. ທົ່ວກົມກອງມີສັດລ້ຽງປະເພດງົວ 17 ໂຕ, ແບ້ 12 ໂຕ, ໝູ 9 ໂຕ ແລະ ສັດປີກ 172 ໂຕ, ມີຕົ້ນໄມປະດັບ, ຕົ້ນໄມ້ໃຫ້ໝາກ – ໃຫ້ຮົມ ແລະ ຕົ້ນໄມ້ອຸດສາຫະກໍາທັງໝົດ 234 ຕົ້ນ, ພິທີຍັງໄດ້ຜ່ານ ມາດຕະການໃນການຈັດຕັ້ງປະຕິບັດວຽກງານກຳລັງປະຈຳການຫັນສູພາວະເພີ້ມທະວີປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ 19 ໂດຍປະຕິບັດຕາມຄຳສັງເລກທີ 15/ນຍ ຢ່າງເຂັ້ມງວດ.

ຕອນທ້າຍພິທີ ສະຫາຍ ພັທ ຄຳຜາຍ ບົວລະພາ ໄດ້ມີຄໍາເຫັນຊີ້ນໍາພະນັກງານ ທີ່ໄດ້ຮັບການແຕ່ງຕັ້ງໜ້າມອບໝາຍໜ້າທີ່ໃໝ່ ຕ້ອງສືບຕໍ່ຝຶກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງ, ມີຄຸນສົມບັດສິນທໍາປະຕິວັດ, ເປັນແບບຢ່າງທີ່ດີໃນການເຕົ້າໂຮມຄວາມສາມັກຄີພາຍໃນໃຫ້ແໜ້ນແຟ້ນ, ເປັນເຈົ້າການທັບມ້າງກົນອຸບາຍຫຼ່ຽມລາຍຂອງກໍາລັງອິດທິປໍລະປັກ, ມີແບບແຜນວິທີເຮັດວຽກ ແລະ ມິຄວາມເປັນເອກະພາບໃນໝູ່ຄະນະ, ພ້ອມກັນນີ້ ກໍ່ຕ້ອງເປັນແບບຢ່າງນໍາໜ້າປະຕິບັດຂໍ້ກໍານົດກົດລະບຽບຂອງກອງທັບ 7 ລະບອບ 18 ວຽກ, ຈັດຕັ້ງປະຕິບັດລະບຽບກົດໝາຍຂອງລັດໃຫ້ໜັກແໜ້ນເຂັ້ມງວດ ແລະ ເຊີດຊູນໍ້າໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.