ໃນຕອນເຊົ້າຂອງວັນທີ 28 ມິຖຸນາ 2021ກອງບັນຊາການທະຫານແຂວງໄຊສົມບູນ ໄດ້ຈັດກອງປະຊຸມສະຫຼຸບວຽກງານຮອບດ້ານປະຈຳ 6 ເດືອນຕົ້ນປີ ແລະ ວາງທິດທາງແຜນການປະຈຳ 6 ເດືອນທ້າຍປີ 2021 ທີ່ສະໂມສອນຂອງຕົນ ພາຍໃຕ້ການເປັນປະທານຮ່ວມຂອງ ສະຫາຍ ພັອ ຄຳອີ້ງ ກິ່ງແກ້ວ, ຄະນະປະຈຳພັກແຂວງ, ເລຂາຄະນະພັກ, ຫົວໜ້າການທະຫານ, ກອງບັນຊາການທະຫານແຂວງ, ມີສະຫາຍ ພັອ ໜອນຄຳ ດວງສະຫວັນ, ກຳມະການພັກແຂວງ, ຮອງເລຂາຄະນະພັກ, ຫົວໜ້າການເມືອງ, ກອງບັນຊາການທະຫານແຂວງ, ມີບັນດາກອງບັນຊາການທະຫານເມືອງ, ກອງພັນນ້ອຍ, ກອງຮ້ອຍເອກະລາດ, ພະນັກງານຫລັກແຫລ່ງ ພ້ອມດ້ວຍພະແນກການທີ່ກ່ຽວຂ້ອງອ້ອມຂ້າງແຂວງ ເຂົ້າຮ່ວມ.

ໃນກອງປະຊຸມ ສະຫາຍ ພັທ ມອນສີ ບຸດລະມິດ, ຫົວໜ້າຫ້ອງການບໍລິຫານ ໄດ້ຂຶ້ນຜ່ານບົດສະຫລຸບວຽກງານຮອບດ້ານປະຈຳ 6 ເດືອນ ຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ເຫັນວ່າໃນໄລຍະ 6 ເດືອນຕົ້ນປີທີ່ຜ່ານມາ ຄະນະພັກແຕ່ລະຂັ້ນ, ພະນັກງານສະມາຊິກພັກ ແມ່ນໄດ້ເອົາໃຈໃສ່ ສຶກສາອົບຮົມດ້ານການເມືອງແນວຄິດໃຫ້ພະນັກງານ-ນັກຮົບໃນກົມກອງຢ່າງລຽນຕິດ ຖືເອົາການຮ່ວມຊີວິດປະຈຳເດືອນເປັນການສຶກສາອົບຮົມໃຫ້ພະນັກງານມີຄຸນທາດການເມືອງໜັກແໜ້ນ, ມີສະຕິຕໍ່ການຈັດຕັ້ງ, ຫ້າວຫັນໃນການປະຕິບັດໜ້າທີ່ວຽກງານ, ມີລະບຽບວິໃນ, ມີຄວາມສາມັກຄີພາຍໃນເປັນເອກະພາບ, ມີຄວາມຮັບຜິດຊອບສູງຕໍ່ໜ້າທີ່ວຽກງານ ທີ່ໄດ້ຮັບມອບໝາຍ.

ທັງນີ້ຍັງໄດ້ເອົາໃຈໃສ່ປັບປຸງຄະນະພັກຮາກຖານ, ໜ່ວຍພັກ ໃຫ້ເຂັ້ມແຂງທາງດ້ານການຈັດຕັ້ງ ແລະ ແບບແຜນການນຳພາ, ຍົກລະດັບຄວາມຮູ້-ຄວາມສາມາດ ພະນັກງານນຳພາ, ພະນັກງານບັນຊາ, ວຽກງານອົງການຈັດຕັ້ງມະຫາຊົນ ແລະ ວຽກງານນະໂຍບາຍຕ່າງໆ ພາຍໃນກົມກອງຂອງຕົນຮັບຜິດຊອບ. ຈາກນັ້ນ ຜູ້ເຂົ້າຮ່ວມກອງປະຊຸມໄດ້ຜັດປ່ຽນກັນປະກອບຄຳຄິດເຫັນໃສ່ບົດສະຫລຸບ ແລະ ທິດທາງແຜນການ ເພື່ອເປັນການປຶກສາຫາລື, ຖອດຖອນບົດຮຽນ ໃນການນຳໄປຈັດຕັ້ງປະຕິບັດໃຫ້ບັນລຸຕາມຄາດໝາຍ. ໂອກາດດັ່ງກ່າວ ສະຫາຍ ພັຕ ແອ ແອນນາວົງ, ຫົວໜ້າພະແນກພະນັກງານ ໄດ້ຂຶ້ນຜ່ານຂໍ້ຕົກລົງ ວ່າດ້ວຍການອະນຸຍາດໃຫ້ນາຍທະຫານ ຢູ່ກອງບັນຊາການທະຫານແຂວງ ພັກການເພື່ອກຽມຮັບເບ້ຍບຳນານ ຈຳນວນ 1 ສະຫາຍ ແລະ ຂໍ້ຕົກລົງ ວ່າດ້ວຍການທຽບຊັ້ນນາຍທະຫານໃຫ້ນັກຮຽນທີ່ຈົບວິຊາສະເພາະຈາກສາຍລັດ ຢູ່ກອງບັນຊາການທະຫານແຂວງ ຈຳນວນ 11 ສະຫາຍ.

ໃນຕອນທ້າຍກອງປະຊຸມ ສະຫາຍ ຄຳອີ້ງ ກິ່ງແກ້ວ, ເລຂາຄະນະພັກ, ຫົວໜ້າການທະຫານ ກອງບັນຊາການແຂວງ ໄດ້ໃຫ້ກຽດໂອ້ລົມຕໍ່ກອງປະຊຸມ ເຊິ່ງກ່ອນອື່ນ ສະຫາຍ ໄດ້ສະແດງຄວາມຊົມເຊີຍ ຕໍ່ຜົນສຳເລັດໃນການຊີ້ນຳ-ນຳພາ ໃນການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ໃນໄລຍະ 6 ເດືອນຜ່ານມາ, ເຖິ່ງແມ່ນວ່າ ໄດ້ປະເຊີນກັບສິ່ງທ້າທາຍ ແລະ ຄວາມຫຍຸ້ງຍາກຫລາຍປະການ ແຕ່ກຳລັງປ້ອງກັນຊາດ-ປ້ອງກັນຄວາມສະຫງົບ ແຕ່ລະຂັ້ນກໍ່ເຮັດສຳເລັດໜ້າທີ່ຂອງຕົນດ້ວຍນໍ້າໃຈບຸກທະລຸ.

ພ້ອມກັນນັ້ນ ທ່ານຍັງໄດ້ເນັ້ນໜັກໃຫ້ແຕ່ລະສະຫາຍ ຈົ່ງພ້ອມກັນນເອົາໃຈໃສ່ຍົກສູງຄວາມສາມັກຄີພາຍໃນ, ຕັ້ງໜ້າຝຶກຝົນຫລໍ່ຫລອມຕົນເອງໃຫ້ມີຄວາມກ້າວໜ້າຢ່າງຮອບດ້ານ, ແບ່ງຄວາມຮັບຜິດຊອບໃຫ້ບຸກຄົນເຮັດຫລ້ອນໜ້າທີ່ ຕາມການຈັດຕັ້ງຂັ້ນເທີ່ງມອບໝາຍໃຫ້ ເພື່ອນຳເອົາເນື້ອໃນຈິດໃຈກອງປະຊຸມໄປຈັດຕັ້ງຜັນຂະຫຍາຍເຂົ້າໃນໜ້າທີ່ວຽກງານໃນຕໍ່ໜ້າໃຫ້ໄດ້ຮັບຜົນສຳເລັດຕາມແຜນການທີ່ວາງໄວ້.