ມີເດຍລາວແຂວງບໍ່ແກ້ວ ໂດຍ: ສົມໄຊ ສີລາຈັນ
ກອງປະຊຸມສ່ອງແສງວຽກງານຮອບດ້ານເຂດ IIປະຈໍາໄຕມາດ II ປີ 2021 ໄດ້ຈັດຂຶ້ນຢູ່ທີ່ສະໂມສອນຂອງ ກອງຮ້ອຍສື່ສານ 310 ໃນວັນທີ 9ມິຖຸນານີ້, ພາຍໃຕ້ການເປັນປະທານຂອງ ສະຫາຍ ພັນໂທ ທອງໄຂ ສີຍາລາດ ຮອງເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງບໍ່ແກ້ວ, ມີຄະນະພັກ-ຄະນະບັນຊາກອງຮ້ອຍ 310, ກອງບັນຊາການທະຫານເມືອງຫ້ວຍຊາຍ, ກອງຮ້ອຍທະຫານຊາຍແດນ 123, ກອງຮ້ອຍກົດລັບ 231ແລະ ກອງຮ້ອຍ 14 ເຂົ້າຮ່ວມ.

ໃນກອງປະຊຸມຜູ້ຕາງໜ້າບັນດາກົມກອງໄດ້ຜັດປ່ຽນກັນຂຶ້ນລາຍງານສະພາບການຈັດຕັ້ງປະຕິບັດວຽກງານຮອບດ້ານ ປະຈໍາໄຕມາດ II ໃນໄລຍະ 3 ເດືອນທີ່ຜ່ານມາຍົກໃຫ້ເຫັນສະພາບຮອບດ້ານ ແລະ ປາກົດການຫຍໍ້ທໍ້ທີ່ເກີດຂຶ້ນໃນສັງຄົມກໍຄືຢູ່ໃນກົມກອງຕົນ ເຊິ່ງໄດ້ຍົກໃຫ້ເຫັນສະ ພາບການສຶກສາອົບຮົມການເມືອງ, ແນວຄິດໃຫ້ສະມາຊິກພັກ, ພະນັກງານ-ນັກຮົບ, ວຽກງານກໍ່ສ້າງພັກ, ກໍ່ສ້າງພະນັກງານ ແລະ ວຽກງານອື່ນໆ.

ພ້ອມນັ້ນ ກອງປະຊຸມຍັງໄດ້ແລກປ່ຽນຄຳ ຄິດຄຳເຫັນເພື່ອເປັນເອກະພາບ ໃນການປະຕິບັດຕາມເນື້ອໃນ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງ ປ້ອງກັນປະເທດວາງອອກ ຕິດພັນກັບ 4 ເນື້ອໃນ 4 ຄາດໝາຍ, ໂດຍສະເພາະແມ່ນວຽກງານເຮັດໃຫ້ສະພາບມີຄວາມສະຫງົບຕ້ານ ແລະ ສະກັດກັ້ນບັນຫາໄພພິບັດທາງທຳມະຊາດໄປຄຽງຄູ່ ກັບວຽກງານປັບປຸງກໍ່ສ້າງກຳລັງ, ວຽກງານປັບປຸງ-ກໍ່ສ້າງພື້ນຖານໂຄງລ່າງ, ແກ້ໄຂຊີວິດການເປັນຢູ່, ຕ້ານ ແລະ ສະກັດກັ້ນບັນດາປາກົດການຫຍໍ້ທໍ້ທີ່ເກີດຂຶ້ນ ແລະ ຈະເກີດຂຶ້ນໃນຕໍ່ໜ້າເພື່ອແນໃສ່ສ້າງກົມກອງເປັນກົມກອງ ປອດໃສ, ປອດໄພ, ປອດຄະດີ ແລະ ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນຂຶ້ນເລື້ອຍໆ.

ໂອກາດດັ່ງກ່າວ ສະຫາຍ ພັນໂທ ທອງໄຂ ສີຍາລາດ ໄດ້ຮຽກຮ້ອງມາຍັງຄະນະພັກ-ຄະນະບັນຊາ ແຕ່ລະກົມກອງ ພ້ອມກັນເອົາໃຈໃສ່ສືບຕໍ່ສຶກສາອົບຮົມການເມືອງ, ແນວຄິດໃຫ້ພະນັກງານ- ນັກຮົບກົມກອງຕົນມີແນວຄິດອຸ່ນ ອຽນທຸ່ນທ່ຽງຫ້າວຫັນຕໍ່ໜ້າທີ່ວຽກງານວິຊາສະເພາະຂອງຕົນ, ຕອບຕ້ານທຸກກົນອຸບາຍຂອງກຸ່ມຄົນບໍ່ຫວັງດີ ແລະ ມີສະຕິຕໍ່ການຊົມໃຊ້ສື່ສັງຄົມອອນໄລ, ຍົກສູງຄວາມຮັບຜິດຊອບໃນການກວດກາແຕ່ລະຂົງເຂດວຽກງານໃຫ້ເປັນປົກກະຕິ, ປະກອບສ່ວນຢ່າງຕັ້ງໜ້າເຂົ້າໃນການປັບປຸງກໍ່ສ້າງພັກ, ພະນັກງານໃຫ້ມີຄວາມໜັກແໜ້ນທາງດ້ານການເມືອງ-ແນວຄິດເຂັ້ມແຂງທາງດ້ານການຈັດຕັ້ງ, ເພື່ອສ້າງເງື່ອນໄຂອຳນວຍຄວາມສະດວກໃຫ້ບັນດາປັດໄຈ ຕ່າງໆໃນການກໍ່ສ້າງກອງທັບໃຫ້ ກາຍເປັນກອງທັບທີ່ມີແບບແຜນ ແລະ ທັນສະໄໝ. ພິເສດສະຫາຍຍັງໄດ້ຮຽກຮອງມາຍັງທຸກພາກສ່ວນຕ້ອງເປັນເຈົ້າການເຟົ້າລະວັງຕອບຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ຢູ່ພາຍໃນປະເທດເຮົາ ເວົ້າສະເພາະ ແຂວງບໍ່ແກ້ວ ໃຫ້ໝົດໄປ.