ໃນຕອນເຊົ້າວັນທີ 24 ມີນາ ນີ້ ກອງບັນຊາການ ປກສ ເມືອງໂຂງ ແຂວງຈຳປາສັກ ໄດ້ເປີດກອງປະຊຸມບັ້ນດຳເນີນຊີວິດການເມືອງຢ່າງເປັນທາງການ ໂດຍການເຂົ້າຮ່ວມເປັນປະທານຂອງສະຫາຍ ພັທ ສົມສະໜຸກ ພະໄຊສົມບັດ ຄະນະປະຈຳພັກເມືອງ,​ ຫົວໜ້າກອງບັນຊາການ ປກສ ເມືອງ, ມີບັນດາສະຫາຍໃນຄະນະພັກ, ຄະນະບັນຊາ, ພະນັກງານສະມາຊິກພັກຫ້ອງອ້ອມຂ້າງກອງບັນຊາການ ປກສ ເມືອງ ແລະ ແຂກຖືກເຊີນຈາກຫ້ອງການທີ່ກ່ຽວຂ້ອງເຂົ້າຮ່ວມ.ໂອກາດນີ້ ສະຫາຍ ສົມສະໜຸກ ພະໄຊສົມບັດ ໄດ້ກ່າວເປີດກອງປະຊຸມ ແລະ ຍົກໃຫ້ເຫັນຈຸດປະສົງວ່າ: ບັ້ນດຳເນີນຊີວິດເມືອງຄັ້ງນີ້ ແມ່ນເພື່ອເປັນການຂ່ຳນັບຮັບຕ້ອນໃຫ້ແກ່ວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 60 ປີ (5 ເມສາ 1961-5 ເມສາ 2021) ພ້ອມນັ້ນ ກໍເປັນການກວດກາຜົນງານການປະຕິບັດໜ້າທີ່ວິຊາສະເພາະ ລວມໄປເຖິງໜ້າທີ່ການເມືອງ ທີ່ໄດ້ຮັບການມອບໝາຍໃນໄລຍະຜ່ານມາຂອງແຕ່ລະສະຫາຍ, ເປັນຂີດໝາຍບັ້ນຮົບກວດສອບຄວາມສາມາດ, ເຕັກນິກ ໄຫວພິກໃນການປະຕິບັດໜ້າທີ່ວຽກງານ. ທັງນີ້ກໍເພື່ອແນ່ໃສ່ຖັນແຖວພະນັກງານສະມາຊິກພັກເຊື່ອມຊືມກຳແໜ້ນແນວທາງຂອງພັກ, ກົດໝາຍຂອງລັດ, ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ກາຍເປັນພະນັກງານສະມາຊິກພັກທີ່ດີ, ມີຄວາມຮູ້ຄວາມສາມາດ, ຊອກຮູ້ຄົ້ນຄວ້າສຶກສາຮ່ຳຮຽນບົດຮຽນຕ່າງໆເພື່ອພ້ອມກັນຈັດຕັ້ງປະຕິບັດວິຊາສະເພາະທີ່ໄດ້ການມອບໝາຍໃຫ້ສຳເລັດ.

ກອງປະຊຸມຄັ້ງນີ້ ແມ່ນໄດ້ເຜີຍແຜ່ບັນດາເອກະສານຕ່າງໆ ທີ່ສຳຄັນເປັນຕົ້ນ: ເອກະສານຕັ້ງໜ້າຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ ແລະ ປັບປຸງແບບແຜນວິທີເຮັດວຽກຂອງນາຍ ແລະ ພົນຕຳຫຼວດໃນໄລຍະໃໝ່, ເອກະສານເສີມຂະຫຍາຍທາດແທ້ ແລະ ມູນເຊື້ອປະຕິວັດອັນສະຫງ່າງາມຂອງກຳລັງປ້ອງກັນຄວາມສະຫງົບປະຊາຊົນລາວ, ເອກະສານສຶກສາອົບຮົມກ່ຽວກັບມູນເຊື້ອວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 60 ປີ; ພາຍຫຼັງສຳເລັດການເຊື່ອມຊືມບັນດາເອກະສານແລ້ວ ບັນດາສະຫາຍກໍ່ຈະໄດ້ຂຽນໃບສະຫຼວດຕົນເອງ ແລະ ແບ່ງຈຸຜ່ານໃບສຳຫຼວດຕົນເອງ ເພື່ອເປັນການຕຳນິສົ່ງຂ່າວເຊີ່ງກັນ ແລະ ກັນ, ເປັນການເສີມຂະຫຍາຍຈຸດດີ ແກ້ໄຂຈຸດອ່ອນ, ເຮັດໃຫ້ກຳລັງມີຄວາມໜັກແໜ້ນເຂັ້ມແຂງຂຶ້ນໄປເລື້ອຍໆ.

ຂ່າວ-ພາບ: ພຸດທະສິນ ວົງວິໄລທອງ