ມີເດຍລາວແຂວງໄຊສົມບູນ ຂ່າວ: ນາງ ຕູດ ຄຳພໍໃຈ
ຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເມືອງອະນຸວົງ ໄດ້ຈັດກອງປະຊຸມຄັດເລືອກກຸ່ມໂຮງແຮມ, ເຮືອນພັກ,ຮ້ານອາຫານ,ຮ້ານກິນດື່ມ, ວົງດົນຕີ ແລະ ເອເລັກໂທນ ໃນຕອນເຊົ້າຂອງວັນທີ 18 ມີນາ 2021 ນີ້ ທີ່ສະໂມສອນເມືອງອະນຸວົງ ໂດຍການເປັນປະທານຮ່ວມ ຂອງທ່ານ ກຸລີ ໜາວເຮີ, ຮອງເຈົ້າເມືອງອະນຸວົງ, ມີທ່ານ ທົ່ງສະຫວັນ ໂພສະຫລາດ, ຮອງຫົວຫນ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ທ່ານ ເຮີປາວຢ່າງ ຊົ່ງເຊັ່ງ, ຫົວຫນ້າຫ້ອງການຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ ເມືອງອະນຸວົງ ມີຫົວຫນ້າຮອງຫົວຫນ້າຫ້ອງການອ້ອມຂ້າງ ເມືອງ ພ້ອມດ້ວຍຜູ້ປະກອບການທຸລະກິດໂຮງແຮມ, ເຮືອນພັກ, ຮ້ານອາຫານ, ຮ້ານກິນດື່ມ, ວົງດົນຕີ, ເອເລັກໂທນ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ຈຸດປະສົ່ງຂອງກອງປະຊຸມ ໃນຄັ້ງນີ້ ກໍເພື່ອເຮັດໃຫ້ການຄຸ້ມຄອງບັນດາຫົວຫນ່ວຍທຸລະກິດບໍລິການບັນເທີງ,ໂຮມແຮມ,ເຮືອນພັກ,ຮ້ານອາຫານ ແລະ ຮ້ານກິນດື່ມພາຍໃນເທດສະບານເມືອງອະນຸວົງ ແຂວງໄຊສົມບູນ ໄດ້ຮັບການແກ້ໄຂເຂົ້າສູ່ລະບຽບການ, ມີຄວາມຮຽບຮ້ອຍເປັນຕົ້ນ ແມ່ນການປະກອບເອກະສານດໍາເນີນທຸລະກິດໃຫ້ຖືກຕ້ອງຕາມບັນດານິຕິກໍາ,ຂໍ້ກໍານົດ ແລະ ກົດຫມາຍວາງອອກ ພ້ອມນີ້ຍັງເປັນການກໍານົດຫລັກການພື້ນຖານ ກ່ຽວກັບການຈັດຕັ້ງປະຕິບັດ ການເຄື່ອນໄຫວ ແລະ ແບບແຜນການເຮັດວຽກຂອງກຸ່ມ ເພື່ອຮັບປະກັນໃຫ້ມີປະສິດທິຜົນ ແລະ ປະໂຫຍດອັນຊອບທໍາ ຂອງບັນດາຫົວໜ່ວຍທຸລະກິດ ຢູ່ພາຍໃນເມືອງອະນຸວົງ ແຂວງໄຊສົມບູນ ພ້ອມທັງຮັບປະກັນກ່ຽວກັບການມອບໝາຍພັນທະເຂົ້າງົບປະມານຂອງລັດຢ່າງມີປະສິດທິພາບ ພ້ອມນີ້ທັງເປັນການສ້າງຄວາມສາມັກຄີປອງດອງລະຫວ່າງຫົວໜ້າ ໜ່ວຍທຸລະກິດ ແບບລວມສູນປະຊາທິປະໄຕ ໂດຍແຜນການ-ແຜນງານ ສ້າງຄວາມເຊື່ອຖືໃຫ້ແກ່ສັງຄົມ ພ້ອມທັງເປັນກຸ່ມກ້ອນເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວ ເມືອງອະນຸວົງ ໃຫ້ນັບມື້ນັບເພີ່ມຂື້ນ.

ໂອກາດນີ້ ທ່ານ ຮົ້ວວ່າງ, ຮອງຫົວຫນ້າຫ້ອງການຖະແຫຼງຂ່າວ,ວັດທະນະທໍາແລະ ທ່ອງທ່ຽວ ເມືອງອະນຸວົງໄດ້ຂຶ້ນຜ່ານຂໍ້ຕົກລົງວ່າດ້ວຍການອະນຸມັດ ໃຫ້ຫ້ອງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເມືອງອະນຸວົງ ຈັດກອງປະຊຸມຄັດເລືອກຫົວຫນ້າກຸ່ມເຮືອນພັກ, ຮ້ານອາຫານ, ຮ້ານກິນດື່ມ, ວົງດົນຕີ ,ເອເລັກໂທນ ແລະ ຜ່ານຮ່າງກົດລະບຽບກຸ່ມໂຮງແຮມ, ເຮືອນພັກ, ຮ້ານອາຫານ, ຮ້ານກິນດື່ມ, ວົງດົນຕີ, ເອເລັກໂທນ. ພ້ອມນີ້ບັນດາຜູ້ເຂົ້າຮ່ວມກອງປະຊຸມໄດ້ພ້ອມກັນຂຶ້ນປະກອບຄໍາຄິດ-ຄໍາເຫັນ ໃສ່ຮ່າງກົດລະບຽບຂອງກຸ່ມໂຮງແຮມ-ເຮືອນພັກ, ຮ້ານອາຫານ, ຮ້ານກິນດື່ມ ວົງດົນຕີ ແລະ ເອເລັກໂທນ ທັງນີ້ກໍເພື່ອເຮັດໃຫ້ລະບຽບດັ່ງກ່າວ ໄດ້ມີເນື້ອໃນຮັດກຸ່ມ ແລະ ສົມບູນຄົບຖ້ວນ ຂຶ້ນກວ່າເກົ່າ. ຈາກນັ້ນກອງປະຊຸມຍັງໄດ້ດໍາເນີນການປ່ອນບັດຄັດເລືອກເອົາຫົວໜ້າກຸ່ມໂຮງແຮມ ແລະ ເຮືອນພັກ ຕື່ມອີກ ຜ່ານການປ່ອນບັດຄັ້ງນີ້ ສາມາດເລືອກໄດ້ ທ່ານ ນາງ ຕຸ້ມໄຊ ເຮືອນພັກພັນມີໄຊ ເປັນຫົວໜ້າກຸ່ມ, ທ່ານ ພວງມະນີ ເຮືອນພັກວາຍຸ ເປັນຮອງ ແລະ ທ່ານ ອຸທອນ ເຮືອນພັກແກ້ວອຸດອນ ເປັນຮອງຫົວໜ້າກຸ່ມ.