ມີເດຍລາວແຂວງບໍລິຄຳໄຊ ຂ່າວ: ສັນຍາ ກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງ (ສພຂ) ເຊກອງຊຸດທີ II ໄດ້ອັດລົງດ້ວຍຜົນສໍາເລັດອັນຈົບງາມໃນວັນທີ 8 ເມສາ 2021 ໂດຍການເປັນປະທານຂອງທ່ານ ດົງເພັດ ພະຍົນ ປະທານສະພາປະຊາຊົນແຂວງ, ມີທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ບັນດາທ່ານການນໍາ, ອາດີດການນໍາຂອງແຂວງ, ບັນດາທ່ານເຈົ້າເມືອງ, ຫົວໜ້າ-ຮອງພະແນກ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ສສຊ ຊຸດທີ IX ແລະ ສສຂ ຊຸດທີ II ເຂົ້າຮ່ວມ.


ທ່ານ ດົງເພັດ ພະຍົນ ໄດ້ກ່າວປິດກອງປະຊຸມຄັ້ງນີ້ວ່າ: ກອງປະຊຸມຄັ້ງປະຖົມມະລຶກ (ສພຂ) ແຂວງເຊກອງຊຸດທີ II ໄດ້ດໍາເນີນໃນລະຫວ່າງວັນທີ 7-8 ເມສາ 2021 ເຊິ່ງຕະຫຼອດໄລຍະເວລາດໍາເນີນກອງປະຊຸມ ບັນດາຜູ້ແທນໄດ້ສຸມສະຕິປັນຍາໃນການຄົ້ນຄວ້າ, ປະກອບຄໍາເຫັນຢ່າງກົງໄປກົງມາ, ມີເຫດມີຜົນ, ມີເນື້ອໃນເລິກເຊິ່ງ, ມີຄວາມເປັນເອກະພາບສູງໃນການພິຈາລະນາ ແລະຮັບຮອງເອົາບັນຫາສໍາຄັນຂອງແຂວງຄື: ຮັບຟັງການລາຍງານຂອງຄະນະກໍາມະການເລືອກຕັ້ງຂັ້ນແຂວງ ກ່ຽວກັບຜົນສໍາເລັດການເລືອກຕັ້ງ ແລະການຢັ້ງຢືນຄຸນລັກສະນະຂອງສະມາຊິກສະພາປະຊາ ຊົນແຂວງເຊກອງຊຸດທີ II; ພິຈາລະນາຮັບຮອງເອົາການເລືອກຕັ້ງປະທານ, ຮອງປະທານ, ກໍາມະການ ຄະນະປະຈໍາສະພາປະຊາຊົນແຂວງຊຸດທີ II; ຮັບຮອງເອົາໂຄງປະກອບການຈັດຕັ້ງ ແລະການສະເໜີແຕ່ງຕັ້ງປະທານຄະນະກໍາມະການ, ເລຂາທິການ ແລະຮອງປະທານຄະນະກໍາມະການຂອງສະພາປະຊາຊົນແຂວງຊຸດທີ II.


ພ້ອມດຽວກັນນີ້ ກອງປະຊຸມຍັງໄດ້ພິຈາລະນາ ແລະຮັບຮອງເອົາແຜນພັດທະນາເສດຖະກິດ-ສັງຄົມ, ແຜນງົບປະມານ 5 ປີຄັ້ງທີ IX ຂອງແຂວງ; ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາປີ 2021; ພິຈາລະນາຮັບຮອງແຜນການ 5 ປີ (2021-2025) ຂອງອົງການໄອຍະການປະຊາຊົນ, ສານປະຊາຊົນແຂວງ ແລະພິຈາລະນາຮັບຮອງແຜນການເຄື່ອນໄຫວວຽກງານ 5 ປີຂອງສະພາປະຊາຊົນແຂວງຊຸດທີ II.