ກອງປະຊຸມຄົບຄະນະບໍລິຫານງານພັກແຂວງ ຈໍາປາສັກ ຄັ້ງທີ 3 ສະໄໝທີ VIII ໄດ້ຈັດຂຶ້ນ ໃນວັນທີ 1 ເມສາ 2021, ທີ່ສຳນັກງານຫ້ອງວ່າການແຂວງຈຳປາສັກ ໂດຍການເປັນປະທານຂອງ ສະຫາຍ ວິໄລວົງ ບຸດດາຄໍາ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈໍາປາສັກ, ມີສະຫາຍປະທານສະພາປະຊາຊົນແຂວງ, ສະຫາຍຮອງເລຂາຄະນະບໍລິຫານງານພັກແຂວງ, ບັນດາສະຫາຍຄະນະປະຈໍາພັກແຂວງ, ກໍາມະການພັກແຂວງ, ເລຂາຄະນະບໍລິການງານພັກເມືອງ-ນະຄອນ, ການນໍາພະແນກການ ກົມກອງ ອ້ອມຂ້າງແຂວງ ແລະຂະແໜງການ ທີ່ກ່ຽວຂ້ອງ ເຂົ້າຮ່ວມ.


ໂອກາດນີ້, ສະຫາຍ ວິໄລວົງ ບຸດດາຄຳ ປະທານກອງປະຊຸມ ໄດ້ມີຄຳເຫັນກ່າວເປີດກອງປະຊຸມ ບາງຕອນ ສຳຄັນວ່າ: ເພື່ອສືບຕໍ່ຜັນຂະຫຍາຍມະຕິກອງປະຊຸມຄົບຄະນະ ຄັ້ງທີ 2 ຂອງຄະນະບໍລິຫານງານພັກແຂວງ ກໍຄືມະຕິກອງປະຊຸມໃຫຍ່ຜູ້ແທນອົງຄະນະພັກແຂວງຈຳປາສັກຄັ້ງທີ VIII ໄດ້ກຳນົດບັນດາຄາດໝາຍ ແລະ ທິດທາງໃນການຈັດຕັ້ງປະຕິບັດ, ດັ່ງນັ້ນ ກອງປະຊຸມຄັ້ງນີ້ພວກເຮົາຈະໄດ້ປຶກສາຫາລື ແລະ ເປັນເອກະພາບກັັນໃນການຮັບຮອງເອົາຂໍ້ກຳນົດ ລະບອບ ລະບຽບ ແບບແຜນວິທີ່ເຮັດວຽກ, ແຜນດຳແນີນງານ ແລະ ການແບ່ງຄວາມຮັບຜິດຊອບ ໃນຄະນະບໍລິຫານງານພັກແຂວງສະໄໝທີ VIII, ແຜນເຜີຍແຜ່ເຊື່ອມຊືມມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ, ການກຳນົດແຜນຍຸດທະສາດ ແລະ ທິດທາງພັດທະນານະຄອນປາກເຊ, ພ້ອມທັງຮັບຟັງການລາຍງານແຜນການປັບປຸງກົງຈັກແຂວງ ທິດທາງການປັບປຸງກົງຈັກພາຍໃນຫ້ອງວ່າການແຂວງ, ການຜັນຂະຫຍາຍມະຕິຕົກລົງຂອງສູນກາງພັກ ວ່າດ້ວຍການຍຸບພະແນກວິທະຍາສາດ ແລະ ເຕັກໂນໂລຊີແຂວງ, ວຽກກໍ່ສ້າງຮາກຖານການເມືອງ ພັດທະນາຊົນນະບົດ, ການສະພາບການບຸກລຸກ 3 ປະເພດປ່າ ແລະ ຮັບຟັງການສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 5 ປີ ຄັ້ງທີ IX (2021-2025) ຂອງແຂວງ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 3 ເດືອນຕົ້ນປີ 2021 ແລະ ທິດທາງປະຈໍາໄຕມາດທີ 2 ຂອງແຂວງຈຳປາສັກ ເພື່ອນໍາສະເໜີເຂົ້າຜ່ານກອງປະຊຸມສະພາປະຊາຊົນແຂວງຮັບຮອງ ແລະ ຮັບຟັງການລາຍງານການຈັດຕັ້ງປະຕິບັດ.
ເພື່ອເຮັດໃຫ້ກອງປະຊຸມດັ່ງກ່າວ ໄດ້ມີຜົນສຳເລັດຕາມລະດັບຄາດໝາຍ ທັງຮັບປະກັນທາງດ້ານເນື້ອໃນອັນຄົບຖ້ວນ ຈະຕ້ອງພ້ອມກັນຍົກສູງຄວາມຮັບຜິດຊອບ, ເພີ່ມທະວີການນຳພາຂອງພັກ ໃຫ້ໜັກແໜ້ນ, ເຂັ້ມແຂງ ພ້ອມກັນ, ສຸມສະຕິປັນຍາເຂົ້າໃນການຄົ້ນຄວ້າປະກອບຄຳຄິດຄຳເຫັນຕ່າງໆ ຕໍ່ກອງປະຊຸມເພື່ອປຶກສາຫາລື ແລກປ່ຽນຄວາມຄິດເຫັນ, ຊອກໃຫ້ເຫັນສາເຫດ, ເພື່ອ ຄວາມເປັນເອກະພາບໃນດ້ານທັດສະນະແນວຄິດ, ມີຄວາມບຸກບືນຕັດສິນໃຈ, ຄວາມຮັບຜິດ ຊອບໃນການເຮັດວຽກງານຕົວຈິງ, ເດັດດ່ຽວ ກ້າວໄປໜ້າ, ສູ້ຊົນຜ່ານຜ່າແກ້ໄຂຄວາມຫຍຸ້ງຍາກ, ຈຳກັດຂໍ້ຂາດຕົກ ບົກຜ່ອງ ເພື່ອກ້າວຂຶ້ນຈັດຕັ້ງປະຕິບັດຄາດໝາຍສູ້ຊົນ ການຈັດຕັ້ງປະຕິບັດຕາມມະຕິກອງປະຊຸມ ຄົບຄະນະຄັ້ງທີ 2 ແລະ ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງວາງອອກໃຫ້ປະກົດຜົນເປັນຈິງ ແລະ ມີຜົນສຳເລັດສູງ ເຮັດໃຫ້ແຂວງຈຳປາສັກ ໄດ້ຮັບການພັດທະນາໃນທຸກດ້ານ.

ຫຼັງຈາກນັ້ນສະຫາຍ ມະໄລທອງ ກົມມະສິດ ກໍາມະການສຳຮອງສູນກາງພັກ ປະທານອົງການກວດສອບແຫ່ງລັດ ໄດ້ຂື້ນມີຄຳເຫັນຕໍ່ກອງປະຊຸມ ເພື່ອກ່າວລາໜ້າທີ່ ຂອງການດຳລົງຕຳແໜ່ງຮອງເຈົ້າແຂວງ, ຮອງເລຂາຄະນະບໍລິຫານງານພັກແຂວງຈໍາປາສັກ ແລະ ລາຍງານສະຫຼຸບຜົນງານຕະຫຼອດ 1 ປີ ຜ່ານມາ ໂອກາດນີ້, ສະຫາຍ ວິໄລວົງ ບຸດດາຄໍາ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈໍາປາສັກ ຕາງໜ້າໃຫ້ຄະນະພັກ-ຄະນະນຳ ແລະ ປະຊາຊົນ ຊາວແຂວງຈຳປາສັກ ໄດ້ມອບກະຕ່າດອກໄມ້ ແລະ ຄຳອວຍພອນອັນປະເສີດແດ່ທ່ານປະທານອົງການກວດສອບແຫ່ງລັດ ນຳອີກ.

ພາບ-ຂ່າວ: ທັດຊະນະ