ມີເດຍລາວແຂວງບໍ່ແກ້ວ ຂ່າວ:ຄຳພັນ ແກ້ວມະນີ
ວັນທີ 9 ມິຖຸນານີ້ ພະແນກຖະແຫຼງຂ່າວ,ວັດທະນະທໍາ ແລະ ທ່ອງທ່ຽວແຂວງບໍ່ແກ້ວ ສົມທົບກັບ ໂຄງການ CB-DAC ໄດ້ຈັດກອງປະຊຸມຈັດຕັ້ງທີມຕິດຕາມ ແລະ ກວດກາການດໍາເນີນປະຕິບັດມາດຕະການບໍ່ຊື້-ບໍ່ຂາຍເຄື່ອງດື່ມທີ່ມີທາດເຫຼົ້າ ໃຫ້ແກ່ເດັກນ້ອຍ ອາຍຸບໍ່ຮອດ 18 ປີ ຕິດພັນກັບການເຜີຍແຜ່ລະບຽບ-ຂໍ້ຫ້າມ, ມາດຕະການ ເຂົ້າຮ່ວມຂອງທ່ານ ສົມສັກ ມະຫາພົນ ຮອງຫົວໜ້າພະແນກ ຖວທແຂວງ, ທ່ານ ອະນຸສິດ ສັກປະເສີດ ຜູ້ອໍານວຍການໂຄງການ CB-DAC ມີຄະນະຮັບຜິດຊອບໂຄງການ, ຂະແໜງການທີ່ກ່ຽວຂ້ອງ, ອໍານາດການປົກຄອງບ້ານ 8 ບ້ານ ໃນເທດສະບານແຂວງເຂົ້າຮ່ວມ.

ກອງປະຊຸມຂະແໜງການທີ່ກ່ຽວຂ້ອງ ໄດ້ຜັດປ່ຽນກັນເຜີຍແຜ່ບັນດາເອກະສານຕ່າງໆເຊັ່ນ: ເອກະສານວ່າດ້ວຍຂໍ້ຫ້າມ ແລະ ມາດຕະການຕໍ່ການຄຸ້ມຄອງເຄື່ອງດື່ມທີ່ມີທາດເຫຼົ້າ ໃຫ້ເດັກນ້ອຍອາຍຸຕໍ່າກວ່າ 18 ປີ, ເອກະສານກ່ຽວກັບການຫັນປ່ຽນ ແບບແຜນດໍາລົງຊີວິດແບບໃໝ່, ເອກະສານແຈ້ງການຂອງພະແນກ ຖວທ ແຂວງ ເລກທີ 501/ຖວທ, ລົງວັນທີ 7 ມິຖຸນາ 2021, ແນະນໍາຂໍ້ມູນ ແລະ ວິທີລາຍງານຂໍ້ມູນໃຫ້ທີມງານ 8 ບ້ານ. ຈາກນັ້ນ ກອງປະຊຸມໄດ້ສົນທະນາແລກປ່ຽນບົດຮຽນຢ່າງກົງໄປກົງມາ.

ເພື່ອແນໃສ່ເຮັດໃຫ້ເປັນການສ້າງທີມງານຕິດຕາມກວດກາການດໍາເນີນການປະຕິບັດມາດຕະການບໍ່ຊື້-ບໍ່ຂາຍເຄື່ອງດື່ມທີ່ມີທາດເຫຼົ້າໃຫ້ແກ່ເດັກນ້ອນທີ່ມີອາຍຸບໍ່ຮອດ 18 ປີ ແລະ ເຮັດໃຫ້ອໍານາດການປົກຄອງບ້ານ 8 ບ້ານ ໃນເທດສະບານແຂວງ ໄດ້ຮັບຮູ້ເຂົ້າໃຈກ່ຽວກັບບັນດານິຕິກໍາການຄວບຄຸມ, ປ້ອງກັນ ແລະ ສະກັດກັ້ນພະຍາດໂຄວິດ-19 ໃຫ້ແກ່ປະຊາຊົນພາຍໃນບ້ານຂອງຕົນ. ທັງເປັນການສ້າງແຜນລົງເກັບກໍາສະຖິຕິບັນດາຮ້ານທີ່ມີການຊື້ – ຂາຍເຄື່ອງດື່ມທີ່ມີທາດເຫຼົ້າຕື່ມອີກ.