ມີເດຍລາວແຂວງໄຊສົມບູນ ຂ່າວ: ສີລິພອນ ສົງຄຳ
ຫ້ອງວ່າການແຂວງໄຊສົມບູນ ໄດ້ຈັດກອງປະຊຸມຕີລາຄາການຈັດຕັ້ງປະຕິບັດວຽກງານຮອບດ້ານປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ຂຶ້ນໃນຕອນເຊົ້າຂອງວັນທີ 24 ມິຖຸນາ 2021 ທີ່ຫ້ອງປະຊຸມຂອງຕົນ. ພາຍໃຕ້ການເປັນປະທານຂອງ ທ່ານ ສຸກສະຫວາດ ວົງພູມເຫລັກ, ຮອງເຈົ້າແຂວງໄຊສົມບູນ, ຜູ້ຊີ້ນຳວຽກງານຂົງເຂດເສດຖະກິດ, ມີຫົວໜ້າ-ຮອງຫົວໜ້າຫ້ອງວ່າການແຂວງ, ພ້ອມດ້ວຍຫົວໜ້າຂະແໜງ-ຮອງຂະແໜງ ແລະ ພະນັກງານວິຊາການທັງໝົດ ເຂົ້າຮ່ວມ.

ໃນກອງປະຊຸມໄດ້ຮັບຟັງການຜ່ານບົດສະຫລຸບ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ແລະ ໄດ້ຮັບຟັງການເຊື່ອມຊຶມຂໍ້ຕົກລົງຂອງທ່ານ ເຈົ້າແຂວງໄຊສົມບູນ ວ່າດ້ວຍລະບຽບຄຸ້ມຄອງ ແລະ ການບໍລິຫານຂອງແຂວງໄຊສົມບູນ ຈາກທ່ານ ສົມບູນ ສອນລິດທິເດດ, ຫົວໜ້າຫ້ອງວ່າການແຂວງ, ຈຸດປະສົງໃນຄັ້ງນີ້ແມ່ນເປັນການປຶກສາຫາລື, ຖອດຖອນບົດຮຽນວຽກງານການຄຸ້ມຄອງ ເພື່ອຕີລາຄາຈຸດດີ-ຈຸດອ່ອນໃນການຈັດຕັ້ງປະຕິບັດໄລຍະທີ່ຜ່ານມາ, ພ້ອມທັງວາງທິດທາງແຜນການຈັດຕັ້ງປະຕິບັດໃຫ້ສຳເລັດ ໃນການເຄື່ອນໄຫວວຽກງານຕ່າງໆ ຕາມທີ່ໄດ້ກຳນົດໄວ້. ທັງນີ້ກໍ່ເພື່ອເຮັດໃຫ້ພະນັກງານລັດຖະກອນໄດ້ສຸມໃສ່ການຈັດຕັ້ງເຜີຍແຜ່, ຮໍ່າຮຽນແນວທາງ, ມະຕິຂອງພັກ ແລະ ນະໂຍບາຍຂອງລັດ, ເອົາໃຈໃສ່ເພີມທະວີການກໍ່ສ້າງພະນັກງານໂດຍຕິດພັນກັບຂະບວນການວຽກງານຕົວຈິງ ຫັນໄປສູ່ຄຸນນະພາບ ແລະ ທັນສະໄໝ, ແບ່ງຄວາມຮັບຜິດຊອບຂອງບັນດາຂະແໜງການພາຍໃນຫ້ອງການ, ການລາພັກປະຈຳການຂອງພະນັັກງານ ໃຫ້ຖືກຕ້ອງຕາມລະບຽບກົດໝາຍລັດຖະກອນ, ມອບວຽກໃຫ້ບຸກຄົນຮັບຜິດຊອບ ແລະ ມີການຕິດຕາມກວດກາຢ່າງເປັນປົກກະຕິ ແລະ ຕໍ່ເນື່ອງ.

ໂອກາດດັ່ງກ່າວນີ້ ທ່ານ ສຸກສະຫວາດ ວົງພູມເຫລັກ, ຮອງເຈົ້າແຂວງໄຊສົມບູນ, ຜູ້ຊີ້ນຳວຽກງານຂົງເຂດເສດຖະກິດ, ໄດ້ມີຄຳເຫັນໂອ້ລົມຕໍ່ກອງປະຊຸມ ຊື່ງທ່ານໄດ້ເນັ້ນໜັກໃຫ້ບັນດາພະນັກງານພາຍໃນ ຈົ່ງພ້ອມກັນຈັດຕັ້ງຜັນຂະຫຍາຍມະຕິຂອງແຂວງ, ເຮັດເປັນຂະບວນການ, ມີການເຄື່ອນໄຫວຊີ້ນຳຢ່າງຈິງຈັງ, ເພີ່ມທະວີການບຳລຸງສ້າງຖັນແຖວພະນັກງານ, ສຶກສາອົບຮົມການເມືອງ-ແນວຄິດ, ຍັງມີບາງດ້ານຍັງຕ້ອງຖອດຖອນບົດຮຽນ, ຄວາມຮູ້-ຄວາມເຂົ້າໃຈ, ມາດຕະການແກ້ໄຂໃນການຈັດຕັ້ງປະຕິບັດ ໃຫ້ໄດ້ປະສິດທິພາບ, ຄຸນທາດການເມືອງໃຫ້ເປັນຂະບວນການຟົດຟື້ນດີຂື້ນກວ່າເກົ່າ, ຈັດຕັ້ງຜັນຂະຫຍາຍແຜນຮັບຮອງໃຫ້ສຳເລັດລຸລ່ວງ, ເອົາໃຈໃສ່ຕິດຕາມ, ກວດກາ ແລະ ຊຸກຍູ້ການເຄື່ອນໄຫວປະຕິບັດວຽກງານຕາມຄວາມຮັບຜິດຊອບຂອງຕົນ, ສ້າງຄວາມສາມັກຄີພາຍໃນໃຫ້ແໜ້ນແຟ້ນ, ເສີມສ້າງກຳລັງແຮງງານ ໄປພ້ອມກັບການຕ້ານ ແລະ ສະກັດກັ້ນ ທຸກປະກົດການຫຍໍ້ທໍ້ຕ່າງໆ.