ມີເດຍລາວແຂວງອຸດົມໄຊ ຂ່າວໂດຍ: ແສງອາທິດ
ກອງປະຊຸມທົບທວນຄືນສະພາບຄວາມຄືບໜ້າ ການຈັດຕັ້ງປະຕິບັດວຽກງານຂອງຄະນະປະສານງານການບັງຄັບໃຊ້ກົດໝາຍ ເພື່ອຕ້ານ ແລະ ສະກັດກັ້ນການຄ້າ-ຂາຍສັດປ່າທີ່ຜິດກົດໝາຍ ແລະ ການຮ່ວມມືກັບປະເທດເພື່ອບ້ານ ຂັ້ນແຂວງ ຫຼື ພີເວນ (p-wen) ໄດ້ຈັດຂື້ນໃນວັນທີ່ 18 ມີນາ 2021 ນີ້ ທີ່ຫ້ອງປະຊຸມ ພະແນກກະສິກຳ ແລະ ປ່າໄມ້ ແຂວງ, ໂດຍການເປັນປະທານຂອງທ່ານ ບຸນເກີດ ສະໜອງໄຊ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ ມີບັນດາຄະນະປະສານງານຂັ້ນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້ກໍ່ເພື່ອທົບທວນຄືນການຈັດຕັ້ງປະຕິບັດວຽກງານຂອງຄະນະປະສານງານໃນໄລຍະ 3 ເດືອນຕົ້ນປີ ແລະ ວາງແຜນ 9 ເດືອນທ້າຍປີ 2021 ພ້ອມທັງຜັນຂະຫຍາຍບັນດານິຕິກຳຕ່າງໆຂອງຂັ້ນເທີງ ໃຫ້ຄະນະປະສານງານໄດ້ຮັບຊາບ ອິກຈຳນວນໜື່ງ, ໃນໂອກາດກ່າວເປີດ ທ່ານ ບຸນເກີດ ສະໜອງໄຊ ຮອງຫົວໜ້າພະແນກ ກໍ່ໄດ້ຍົກໃຫ້ເຫັນຄວາມໝາຍຄວາມສຳຄັນຂອງວຽກງານການບັງຄັບໃຊ້ກົດໝາຍ ເພື່ອຕ້ານແລະ ສະກັດກັ້ນການຄ້າ-ຂາຍສັດປ່າທີ່ຜິດກົດໝາຍ ແລະ ການຮ່ວມມືກັບປະເທດເພື່ອບ້ານ ຂັ້ນແຂວງ ຫຼື ພີເວນ (p-wen) ທີ່ເຮັດໃນການຄຸ້ມຄອງ ກວດກາ ແລະ ສະກັດກັ້ນການຄ້າຂາຍສັດປ່າ, ເຄື່ອງປ່າຂອງດົງທີ່ຫວງຫ້າມ ແລະ ການຄ້າໄມ້ເຖື່ອນ ແລະ ອື່ນໆທີ່ກະສິກຳ ຫວງຫ້າມ, ພ້ອມນີ້ຍັງເນັ້ນໃຫ້ເອົາໃຈໃສ່ປະຕິບັດກົດໝາຍກ່ຽວກັບສັດນ້ຳ-ສັດປ່າ ແລະ ກົດ ໝາຍລຸ່ມນິຕິກຳທີ່ແຂວງອຸດົມໄຊກຳນົດອອກ, ຂັ້ນແຂວງ, ເມືອງ ຕ້ອງປະສານງານກັນຢ່າງເປັນປົກກະຕິ ເພື່ອແກ້ໄຂບັນຫາການລັກລອບຄ້າ-ຂາຍ ສັດນ້ຳ-ສັດປ່າ ໃຫ້ທັນເວລາ.

ກອງປະຊຸມຄັ້ງນີ້ ໄດ້ຮັບຟັງການລາຍງານສະພາບຄວາມຄືບໜ້າຂອງວຽກງານໃນໄລຍະ 3 ເດືອນຜ່ານມາ, ສະພາບລວມ ແລະ ພາລະບົດບາດຂອງຄະນະປະສານງານ ໃນໄລຍະ 3 ເດືອນຜ່ານມາ ແມ່ນໄດ້ສົມທົບກັບບັນດາເມືອງ ເພື່ອລົງໂຄສະນາເຜີຍແຜ່ກົດໝາຍ ນິຕິກຳກ່ຽວກັບວຽກງານປ່າໄມ້ ແລະ ສັດນ້ຳ-ສັດປ່າ ຢູ່ໃນ 7 ເມືອງ ໄດ້ 25 ຄັ້ງ ມີຜູ້ເຂົ້າຮ່ວມຮັບຟັງ 1 ພັນກ່ວາຄົນ. ເຂົ້າຮ່ວຝຶກອົບຮົົມວຽກງານດຳເນີນຄະດີກ່ຽວກັບຊັບປະຍາກອນປ່າໄມ້ ໃຫ້ແກ່ອົງການສືບສວນ ສອບສວນ ແລະ ເຈົ້າໜ້າທີ່ປ່າໄມ້ໄດ້ຫຼາຍເທື່ອຄັ້ງ, ລົງຄິດຕາມກວດກາ ການລັກລອບຂາຍສັດປ່າຢູ່ບັນດາເມືອງ, ແລະ ຕະຫຼາດໃນເທດສະບານແຂວງ ພ້ອມທັງດຳເນີນຄະດີກັບຜູ້ກະທຳຜິດຕື່ມອີກ. ນອກນີ້ຍັງໄດ້ນຳສະເໜີແຈ້ງການແນະນຳຂອງທ່ານເຈົ້າແຂວງ ວ່າດ້ວຍການກວດກາ ແລະ ການດຳເນີນຄະດີຊັບພະຍາກອນປ່າໄມ້ ແລະ ສັດນ້ຳ-ສັດປ່າ, ສະເໜີ ຄຳສັ່ງແນະນຳຂອງທ່ານເຈົ້າແຂວງ ເລືອງການຈັດຕັ້ງປະຕິບັດກາສຳຫຼວດ ແລະ ຄຸດຄົ້ນໄມ້ ທີ່ຖຶກຜົນກະທົບຈາກໂຄງການກໍ່ສ້າງພື້ນຖານໂຄງລ່າງ, ຂຸດຂົ້ນແຫ່ງທາດ-ຫີນແຂງ, ແລວສາຍໄຟ, ແລວເສັ້ນທາງ, ການກໍ່ສ້າງເຂື່ອນໄຟຟ້າ ແລະ ອື່ນໆຢູ່ບັນດາເມືອງ ພາຍໃນແຂວງອຸດົມໄຊ, ສະເໜີຂໍຕົກລົງຂອງທ່ານເຈົ້າແຂວງວ່າດ້ວຍການແຕ່ງຕັ້ງຄະນະສະເພາະກິດປ້ອງກັນໄຟໄໝ້ລາມປ່າຢູ່ແຂວງອຸດົມໄຊ ປະຈຳປີ 2021.