ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດກອງປະຊຸມວິຊາການວຽກງານ ຄຸ້ມຄອງໄພພິບັດ ທົ່ວປະເທດ ປະຈຳປີ 2020 ຂຶ້ນໃນວັນທີ 10 ມີນານີ້ ທີ່ເຮືອນຮັບແຂກກະຊວງ ຮສສ ພາຍໃຕ້ການເປັນປະທານຂອງ ທ່ານ ຄໍາແພງ ໄຊສົມແພງ ລັດຖະມົນຕີກະຊວງ ຮສສ ຮອງປະທານຜູ້ປະຈໍາການຄະນະກໍາມະການຄຸ້ມຄອງໄພບັດຂັ້ນສູນກາງ; ທ່ານ ນາງ ໃບຄໍາ ຂັດທິຍະ ຮອງລັດຖະມົນຕີກະຊວງ ສສຮ ພ້ອມດ້ວຍຄະນະກໍາມະການຄຸ້ມຄອງໄພພິບັດຂັ້ນສູນກາງ ແຂວງ-ນະຄອນຫຼວງ ທົ່ວປະເທດ​ເຂົ້າ​ຮ່ວມ.
ທ່ານ ຄໍາແພງ ໄຊສົມແພງ ມີຄໍາເຫັນກ່າວ​ເປີດກອງປະຊຸມວ່າ: ກອງປະຊຸມຄັ້ງນີ້ຈັດຂຶ້ນເພື່ອ ທົບທວນຄືນການຈັດຕັ້ງປະຕິບັດວຽກງານຄຸ້ມຄອງໄພພິບັດໃນໄລຍະຜ່ານມາ ແລະ ວາງທິດທາງແຜນ ການໃນຕໍ່ໜ້າ ເພື່ອເຮັດໃຫ້ວຽກງານຄຸ້ມຄອງໄພພິບັດຂອງລາວຖືກຈັດຕັ້ງປະຕິບັດມີຄວາມເປັນ​ເອກະພາບ ກັນລະຫວ່າງສູນກາງ ແລະ ທ້ອງຖິ່ນ ເປັນການສ້າງຄວາມຮັບຮູ້ ແລະ ເຂົ້າໃຈທາງດ້ານວິຊາການ, ຊອກໃຫ້ເຫັນທາງອອກ, ມີວິທີການ ແລະ ມາດຕະການແກ້ໄຂຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆໃນ ການຄຸ້ມຄອງໄພພິບັດ ແນໃສ່ສ້າງຄວາມເຂັ້ມແຂງໃນການຈັດຕັ້ງປະຕິບັດບັນດາເປົ້າໝາຍ, ແຜນວຽກ ຈຸດສຸມ, ຄາດໝາຍ ແລະ ຕົວຊີ້ບອກທາງດ້ານວຽກງານວິຊາສະເພາະຕາມທີ່ໄດ້ກຳນົດໄວ້ໃນທິດທາງ ແຜນການປີ 2021 ໃຫ້ບັນລຸຜົນສຳເລັດຕາມຄາດໝາຍທີ່​ວາງ​ໄວ້.

ໃນກອງປະຊຸມຍັງໄດ້ພ້ອມກັນຮັບຟັງການສະເໜີບົດສະຫຼຸບການຈັດຕັ້ງປະຕິບັດວຽກງານຄຸ້ມຄອງໄພພິບັດ ໄລຍະ 5 ປີ ຜ່ານມາ 2016 – 2020 ແລະ ທິດທາງແຜນການ 5 ປີ 2021 – 2025 ລວມທັງແຜນວຽກຈຸດສຸມ ແລະ ການກຽມຄວາມພ້ອມຕອບໂຕ້ໄພພິບັດ ປີ 2021 ຊຶ່ງເປັນປີທຳ​ອິດຂອງແຜນ 5 ປີ ຂອງຄະນະກໍາມະການຄຸ້ມຄອງໄພພິບັດຂັ້ນສູນກາງ ລວມທັງການສະເໜີແລກປ່ຽນບົດຮຽນການຈັດຕັ້ງປະຕິບັດວຽກງານຄຸ້ມຄອງໄພພິບັດຢູ່ຂັ້ນທ້ອງຖິ່ນ ເພື່ອສ້າງຄວາມຮັບຮູ້ເຂົ້າໃຈ​ຢ່າງ​ກວ້າງ​ຂວາງ ແລະ ມີຄວາມ​ເປັນ​ເອ​ກະ​ພາບ​​ກັນ​ໃນ​ການພັດທະນາວຽກງານຄຸ້ມຄອງໄພພິບັດ ແລະ ວາງມາດຕະການຕ່າງໆ ໃຫ້ມີປະສິດທິພາບ ແລະ ປະສິດທິຜົນຫຼາຍຂຶ້ນກວ່າເກົ່າ.