ມີເດຍລາວແຂວງຄຳມ່ວນ ກອງປະຊຸມຄັ້ງປະຖົມມະລືກ ຂອງສະພາປະຊາຊົນແຂວງຄຳມ່ວນ ຊຸດທີ II ແມ່ນຈະ​ໄດ້ໄຂຂຶ້ນໃນລະຫວ່າງ ວັນທີ 26-28 ເມສາ 2021 ຈະໄດ້ພິຈາລະນາ ແລະ ຮັບຮອງເອົາຫຼາຍບັນຫາສຳຄັນຂອງແຂວງ ເປັນຕົ້ນ ແມ່ນ ພິຈາລະນາ, ຮັບຮອງເອົາໂຄງປະກອບກົງຈັກການຈັດຕັ້ງຂອງສະພາປະຊາຊົນແຂວງ, ໂຄງປະກອບກົງຈັກຂອງອົງການ ປົກຄອງແຂວງ, ການແຕ່ງຕັ້ງຮອງເຈົ້າແຂວງ, ຫົວໜ້າພະແນກການ, ຫົວໜ້າອົງການລັດທຽບເທົ່າຂອງແຂວງ.

          ທ່ານ ບຸນທອມ ແສງອາລຸນ ເລຂາທິການສະພາປະຊາຊົນແຂວງຄຳມ່ວນ ຊຸດທີ I ໄດ້ຖະແຫຼງກ່ຽວກັບ ການກະກຽມ ດຳເນີນກອງປະຊຸມຄັ້ງປະຖົມມະລືກ ຂອງສະພາປະຊາຊົນແຂວງຄຳມ່ວນ ຊຸດທີ II ທີ່​ສະຖານີ​ໂທລະພາບ​ແຂວງ ​ໃນ​ວັນ​ທີ 20 ​ເມສາ 2021 ນີ້​ວ່າ: ພາຍຫຼັງທີ່​ໄດ້​ສຳ​ເລັດ​ກອງ​ປະຊຸມ​ຄັ້ງ​ປະຖົມ​ມະລຶກ ​ຂອງສະພາ​ແຫ່ງ​ຊາດ ຊຸດ​ທີ IX ຢູ່​ທີ່​ຫໍ​ປະຊຸມ​ສະພາ​ແຫ່ງ​ຊາດ ນະຄອນຫຼວງວຽງຈັນ ​ໃນ​ເດືອນມີນາ 2021, ຄະນະ​ປະຈຳ​ສະພາ​ປະຊາຊົນ​ແຂວງ, ຄະນະ​ເລຂາທິການ, ຄະນະ​ກຳມະການ, ບັນດາ​ພະ​ແນ​ກການ ​ແລະ ອົງການ​ຈັດ​ຕັ້ງ​ລັດ​ຂັ້ນ​ແຂວງ ​ໄດ້ກະກຽມ​ເນື້ອ​ໃນ​ຢ່າງຮອບ ດ້ານ ​ແລະ ຄົບ​ຖ້ວນ ​ໃຫ້​ແກ່​ການ​ດຳ​ເນີນ​ກອງ​ປະຊຸມ​ຄັ້ງ​ປະຖົມ​ມະລຶກ ຂອງ​ສະພາ​ປະຊາຊົນ​ແຂວງ​ຄຳ​ມ່ວນ ຊຸດ​ທີ II ​ເຊິ່ງ​ໄດ້​ເປັນ​ເອກະ​ພາບກັນ​ກຳນົດ​ເອົາລະ​ຫວ່າງ​ວັນ​ທີ 26-28 ​ເມສາ 2021 ​ເປັນ​ມື້​ດຳ​ເນີນ​ກອງ​ປະຊຸມ. ​ໃນ​ນັ້ນ​ແມ່ນ​ຈະ​ໄດ້​ຮັບ​ຟັງ​ການ​ລາຍ​ງານ, ພິຈາລະນາ​ຮັບຮອງ ​ແລະ ຕົກລົງ​ບັນຫາ​ສຳຄັນ​ຕ່າງໆຂອງ​ແຂວງ ​ເປັນ​ຕົ້ນ​ແມ່ນ: ຮັບ​ຟັງ​ການ​ລາຍ​ງານຂອງ​ຄະນະ​ກຳມະການ​ເລືອກ​ຕັ້ງ​ຂັ້ນ​ແຂວງ ກ່ຽວກັບ​ຜົນສຳ​ເລັດ​ໃນ​ການ​ເລືອກ​ຕັ້ງ ​ແລະ ການ​ຢັ້ງຢືນ​ຄຸນ​ລັກສະນະ​ຂອງ​ສະມາຊິກ​ສະພາ​ປະຊາຊົນ​ແຂວງ ຊຸດ​ທີ II, ​ເລືອກ​ຕັ້ງ​ປະທານ, ​ຮອງ​ປະທານ​ສະພາ​ປະຊາຊົນ​ແຂວງ ຊຸດ​ທີ II, ພິຈາລະນາ, ຮັບຮອງ​​ເອົາ​ໂຄງ​ປະກ​ອບກົງຈັກ​ຂອງ​ສະພາ​ປະຊາຊົນ​ແຂວງ, ການ​ແຕ່ງ​ຕັ້ງ​ປະທານ​ຄະນະ​ກຳມະການ, ​ເລຂາທິການ ​ແລະ ຮອງ​ປະທານ​ຄະນະ​ກຳມະການ​ສະພາ​ປະຊາຊົນ​ແຂວງ, ພິຈາລະນາ, ຮັບຮອງ​ເອົາ​ໂຄງ​ປະກອບ​ກົງຈັກ​ຂອງ​ອົງການ​ປົກຄອງ​ແຂວງ, ການ​ແຕ່ງ​ຕັ້ງ​ຮອງ​ເຈົ້າ​ແຂວງ, ຫົວໜ້າພະ​ແນ​ກການ, ຫົວໜ້າອົງການ​ລັດທຽບ​ເທົ່າ, ພິຈາລະນາ, ຮັບຮອງ​ເອົາ​ແຜນ​ພັດທະນາ​ເສດຖະກິດ-ສັງຄົມ ​ແລະ ​ແຜນ​ງົບປະມານ​ແຫ່ງ​ລັດ 05 ປີ (2021-2025), ​ແຜນການ​ເຄື່ອນ​ໄຫວ 05 ປີ ຂອງ​ອົງການ​ກວດກາ​ລັດ​ແຂວງ, ອົງການ​ໄອ​ຍະ​ການ​ປະຊາຊົນ​ແຂວງ, ສານ​ປະຊາຊົນ​ແຂວງ ​ແລະ ​ແຜນການ​ເຄື່ອນ​ໄຫວ 05 ປີ ຂອງ​ສະພາ​ປະຊາຊົນ​ແຂວງ ຊຸດ​ທີ II.

          ​ໃນ​ໂອກາດ​ດຽວກັນນີ້ ກໍ່ຂໍ​ເຊີນຊວນ ບັນດາ​ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກ​ສຶກສາ, ປັນຍາ​ຊົນ, ກຳມະກອນ, ຊາວ​ຜູ້​ອອກ​ແຮງ​ງານ, ພໍ່ຄ້າ​ຊາວ​ຂາຍ ຕະຫຼອດຮອດ​ປະຊາຊົນ​ລາວ​ບັນດາ​ເຜົ່າ​ໃນ​ທົ່ວ​ແຂວງ ຈົ່ງ​ຕິດຕາມ​ການ​ດຳ​ເນີນ​ກອງ​ປະຊຸມ​ຄັ້ງ​ປະຖົມ​ມະລຶກ ຂອງ​ສະພາ​ປະຊາຊົນ​ແຂວງ​ຄຳ​ມ່ວນ ຊຸດ​ທີ II. ​ເຊິ່ງ​ໃນ​ໄລຍະ​ດຳ​ເນີນ​ກອງ​ປະຊຸມ ຈະ​ມີ​ການ​ຖ່າຍ​ທອດ​ສົດ ຜ່ານທາງ​ວິທະຍຸ​ກະຈາຍສຽງ​ແຂວງ​ຄຳ​ມ່ວນ FM 95,50 MHz ​ແລະ ພ້ອມ​ກັນ​ນັ້ນ​ກໍ່​ໄດ້​ແຕ່ງ​ຕັ້ງໜ່ວຍງານ​ຮັບຜິດຊອບ​ໂທລະສັບ​ສາຍ​ດ່ວນ ​ເພື່ອ​ຮັບ​ເອົາ​ຄຳ​ຄິດ​ເຫັນ ​ແລະ ຄຳ​ສະ​ເໜີ​ໂດຍ​ກົງ ຈາກ​ປະຊາຊົນ ດ້ວຍໝາຍ​ເລກໂທລະສັບສາຍ​ດ່ວນ​ 051 156.