ຕອນບ່າຍຂອງວັນທີ 5 ມີນາ 2021; ທີ່ສະໂມສອນ ເມືອງໜອງແຮດ ແຂວງຊຽງຂວາງ ໄດ້ຈັດກອງປະຊຸມສະຫຼຸບຜົນງານໂຄງການຫຼຸດຜ່ອນການນຳໃຊ້ສານເຄມີ ໃນລະດັບທ້ອງຖິ່ນ ໂດຍການເປັນປະທານຂອງ ທ່ານ ຈໍ່ລໍ່ ກ່າມາ ຮອງເຈົ້າເມືອງໆໜອງແຮດ ພ້ອມດ້ວຍ ທ່ານ ບຸນຮາບ ສຸລິໂຍ ຮອງຫົວໜ້າກົມສື່ມວນຊົນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ. ພ້ອມນີ້ ຍັງມີທ່ານ ຫົວໜ້າຫ້ອງການ ຖວທ ເມືອງໜອງແຮດ; ຫົວໜ້າສະຖານີວິທະຍຸຊຸມຊົນເມືອງໜອງແຮດ; ມີບັນດາຫົວໜ້າຫ້ອງການທີ່ກ່ຽວຂ້ອງ; ບັນດາຄະນະອຳນາດການປົກຄອງບ້ານເປົ້າໝາຍ ແລະ ແຂກຖືກເຊີນເຂົ້າຮ່ວມ. ໂດຍການສະໜັບສະໜູນຈາກ: ກອງທຶນສິ່ງແວດລ້ອມໂລກ-ແຜນງານຂະໜາດນ້ອຍ (GEF-SGP).

ຈຸດປະສົງຂອງກອງປະຊຸມດັ່ງກ່າວ ແມ່ນຮັບຟັງການລາຍງານ ກ່ຽວກັບການຈັດຕັ້ງປະຕິບັດວຽກງານໂຄງການຫຼຸດຜ່ອນການນຳໃຊ້ສານເຄມີ ໃນລະດັບທ້ອງຖິ່ນ ໄລຍະ 2 ປີທີ່ຜ່ານມາ ແລະ ສະພາບລວມການຈັດຕັ້ງປະຕິບັດວຽກງານໂຄສະນາຂອງສະຖາວິທະຍຸຊຸມຊົນບັນດາເຜົ່າເພື່ອການພັດທະນາເມືອງໜອງແຮດ.

ຈຸດປະສົງຂອງໂຄງການດັ່ງກ່າວ ເພື່ອໂຄສະນາຊ່ວຍຫຼຸດຜ່ອນການນຳໃຊ້ສານເຄມີເຂົ້າໃນການປູກຝັງຂອງຊາວກະສິກອນ ແລະ ປະຊາຊົນຜູ້ທີ່ເຮັດການປູກຝັງ ຢູ່ໃນຊຸມຊົນ ແລະ ບ້ານທີ່ຫ່າງໄກສອກຫຼີກ; ເພື່ອສ້າງຄວາມເຂົ້າໃຈກ່ຽວກັບຜົນຮ້າຍຂອງການນຳໃຊ້ສານເຄມີເຂົ້າໃນການຜະລິດກະສິກຳ; ພ້ອມທັງລະດົມຊາວກະສິກອນ ແລະ ປະຊາຊົນປ່ຽນທັດສະນະຄະຕິ, ພຶດຕິກຳຫັນມານຳໃຊ້ຝຸ່ນຊີວິພາບໃນການເຮັດກະສິກຳ ແລະ ວິທີປ້ອງກັນເວລາໃຊ້ສານເຄມີ.

ການດຳເນີນກອງປະຊຸມ ນອກຈາກໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານໂຄງການດັ່ງກ່າວແລ້ວ; ຜູ້ເຂົ້າຮ່ວມກອງປະຊຸມຍັງໄດ້ປະກອບຄຳຄິດຄຳເຫັນໃສ່ບົດລາຍງານ ແລະ ໄດ້ສະເໜີພາກສ່ວນທີ່ກ່ຽວຂ້ອງເພື່ອສືບຕໍ່ປະຕິບັດໂຄງການດັ່ງກ່າວໃຫ້ມີຄວາມຍືນຍົງ ແລະ ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຈາກທ່ານ ບຸນຮາບ ສຸລິໂຍ ຮອງຫົວໜ້າກົມສື່ມວນຊົນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຕໍ່ກັບວຽກງານການໂຄສະນາຂອງວິທະຍຸຊຸມຊົນເມືອງໜອງແຮດ ສູ່ຊຸມຊົນ ແລະ ບ້ານທີ່ຫ່າງໄກສອກຫຼີກ ໃຫ້ໄດ້ຮັບຂໍ້ມູນຂ່າວສານ ກໍຄືຂໍ້ມູນການນຳໃຊ້ສານເຄມີເຂົ້າໃນການປູກຝັງ.

Medialaos MMD