ມິເດຍລາວແຂວງໄຊຍະບູລີ ຂ່າວ: ມະໄລວັນ ກອງປະຊຸມສາມັນຄົບຄະນະບໍລິຫານງານສະຫະພັນກໍາມະບານ ແຂວງໄຊຍະບູລີ ຄັ້ງທີ 2 ສະໄໝທີ VII ໄດ້ຈັດຂຶ້ນໃນວັນທີ 2 ມີນາ 2021 ນີ້ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງ. ໂດຍການເປັນປະທານຂອງ ສະຫາຍ ຄໍາຜຸຍ ອິນທະບັນດິດ ຄະນະບໍລິຫານງານສູນກາງສະຫະພັນກໍາມະບານລາວ, ປະທານຄະນະບໍລິຫານງານສະຫະພັນກໍາມະບານແຂວງ, ເປັນກຽດເຂົ້າຮ່ວມມີ ສະຫາຍ ດວງຕາ ໄຊວຸດ ຮອງເລຂາຄະນະບໍລິຫານງານພັກແຂວງ, ມີຄະນະບໍລິຫານງານສະຫະພັນກໍາມະບານແຂວງ, ຄະນະກໍາມະບານຮາກຖານອ້ອມຂ້າງແຂວງ ແລະ ຕາງໜ້າອົງການຈັດຕັ້ງມະຫາຊົນເຂົ້າຮ່ວມ.

ໃນກອງປະຊຸມ ສະຫາຍ ຄໍາຜຸຍ ອິນທະບັນດິດ ປະທານຄະນະບໍລິຫານງານສະຫະພັນກໍາມະບານແຂວງ ໄດ້ກ່າວເປີດກອງປະຊຸມຢ່າງເປັນທາງການ ເຊິ່ງໄດ້ກ່າວວ່າ: ໃນໄລຍະໜຶ່ງປີຜ່ານມາ ໄດ້ນໍາພາການຈັດຕັ້ງກໍາມະບານແຕ່ລະຂັ້ນ ໄດ້ດໍາເນີນກອງປະຊຸມໃຫຍ່ຂັ້ນຕົນສໍາເລັດໃນທົ່ວແຂວງ ແລະ ໄດ້ຊຸກຍູ້ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂັ້ນຂອງຕົນ ແລະ ຂັ້ນເທິງຖັດຕົນ, ຊຸກຍູ້ຄະນະບໍລິຫານງານ, ຄະນະກໍາມະບານແຕ່ລະຂັ້ນ ຕະຫຼອດຮອດສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານບັນດາເຜົ່າ ປະກອບສ່ວນຢ່າງຕັ້ງໜ້າ ເຂົ້າໃນແຜນພັດທະນາເສດຖະກິດ-ສັງຄົມຂອງລັດ ເວົ້າລວມ, ເວົ້າສະເພາະ ແຜນພັດທະນາວຽກງານຂອງອົງການກໍາມະບານ ມີຜົນສໍາເລັດຕາມລະດັບຄາດໝາຍ, ຂະບວນແຂ່ງຂັນ 5 ເປັນເຈົ້າຂອງກໍາມະບານລາວ ໄດ້ຖືກຈັດຕັ້ງປະຕິບັດມີຜົນສໍາເລັດດ້ວຍດີ; ສິດ ແລະ ຜົນປະໂຫຍດຂອງສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານບັນດາເຜົ່າ ໄດ້ຮັບການປົກປ້ອງໂດຍພື້ນຖານ. ບັນດາຜູ້ເຂົ້າຮ່ວມກອງປະຊຸມ ຈະໄດ້ຮັບຟັງການຜ່ານບົດສະຫຼຸບວຽກງານຮອບດ້ານ ປະຈໍາປີ 2020 ແລະ ແຜນການປີ 2021, ຜ່ານບົດສະຫຼຸບວຽກງານຂະບວນແຂ່ງຂັນ 5 ເປັນເຈົ້າ, ຜ່ານຮ່າງໂຄງການດໍາເນີນງານ ປະຈໍາປີ 2021 ຂອງຄະນະບໍລິຫານງານສະຫະພັນກໍາມະບານແຂວງ, ແຜນພັດທະນາວຽກງານກໍາມະບານ, ຜ່ານບົດສະຫຼຸບວຽກງານກອງທຶນ ປະຈໍາປີ 2020 ແລະ ຜ່ານກົດລະບຽບກອງທຶນສະບັບປັບປຸງ. ກອງປະຊຸມຄັ້ງນີ້ ຈະໄດ້ພ້ອມກັນທົບທວນຄືນບັນດາຜົນງານທີ່ຍາດມາໄດ້, ຈຸດອ່ອນຂໍ້ຄົງຄ້າງໃນປີຜ່ານມາ ພ້ອມດຽວກັນນີ້ ຍັງຈະໄດ້ພ້ອມກັນກໍານົດທິດທາງແຜນການເຄື່ອນໄຫວ ປະຈໍາປີ 2021 ແລະ ພ້ອມກັນຄົ້ນຄວ້າບາງວຽກງານທີ່ສໍາຄັນ ເຊັ່ນ: ພ້ອມກັນຄົ້ນຄວ້າປະກອບຄໍາເຫັນຕໍ່ໂຄງການດໍາເນີນງານ ຂອງຄະນະບໍລິຫານງານສະຫະພັນກໍາມະບານແຂວງ ປະຈໍາປີ 2021, ຄົ້ນຄວ້າຮ່າງແຜນພັດທະນາວຽກງານກໍາມະບານ ໄລຍະ 5 ປີຕໍ່ໜ້າ ແຕ່ປີ 2021-2025, ຄົ້ນຄວ້າຮັບຮອງເອົາການປັບປຸງເນື້ອໃນກົດລະບຽບກອງທຶນຊ່ວຍເຫຼືອເຊິ່ງກັນ ແລະ ກັນ ບາງມາດຕາ ເພື່ອໃຫ້ສອດຄ່ອງກັບການນໍາໃຊ້ໃນປະຈຸບັນ.