ມີເດຍລາວແຂວງໄຊສົມບູນ ຂ່າວ: ສີລິພອນ ສົງຄຳ
ກອງປະຊຸມເຊືອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແຂວງໄຊສົມບູນ ຊຸດທີ 3 ໄດ້ຈັດຂຶ້ນໃນວັນທີ 23 ມິຖຸນາ 2021 ນີ້ ທີ່ສະໂມສອນເມືອງອະນຸວົງ ໂດຍການເປັນປະທານຂອງ ສະຫາຍ ພອຍຄຳ ຮຸ່ງບຸນຍວງ, ຮອງເລຂາພັກແຂວງ, ມີບັນດາພະແນກການ, ອົງການ-ກົມກອງ ອ້ອມຂ້າງແຂວງ ຕະຫລອດຮອດສະມາຊິກພັກ, ພະນັກງານ-ລັດຖະກອນເຂົ້າຮ່ວມ.

ໃນໂອກາດກ່າວເປີດກອງປະຊຸມ ສະຫາຍ ພອຍຄຳ ຮຸ່ງບຸນຍວງ, ຮອງເລຂາພັກແຂວງ ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນໃນການເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ່ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ພ້ອມທັງຮຽກຮ້ອງໃຫ້ທຸກພາກສ່ວນທີ່ເຂົ້າຮ່ວມ ຈົ່ງກຳແໜ້ນເນື້ອໃນກອງປະຊຸມຂອງພັກ ດ້ວຍຄວາມເອົາໃຈໃສ່ ເພື່ອນຳໄປຈັດຕັ້ງປະຕິບັດຢູ່ກົມກອງຂອງຕົນ ໃຫ້ມີປະສິດທິພາບ. ຈາກນັ້ນສະຫາຍໄດ້ກ່າວເປີດກອງປະຊຸມຢ່າງເປັນທາງການ.


ໂອກາດດັ່ງກ່າວ ສະຫາຍ ແດງ ປະທຸມທອງ, ຮອງເລຂາພັກແຂວງ, ປະທານສະພາປະຊາຊົນແຂວງ ໄດ້ຂຶ້ນຜ່ານກົດລະບຽບພັກ ແລະ ມະຕິກອງປະຊຸມໃຫຍ່ຄັ້ງທີ I ອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ II ຂອງແຂວງ. ທັງນີ້ກໍເພື່ອເຮັດໃຫ້ການນຳແຕ່ລະຂັ້ນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ພ້ອມທັງກຳແໜ້ນເນື້ອໃນຂອງມະຕິກອງປະຊຸມຄັ້ງທີ I ຂອງອົງຄະນະພັກ ແຂວງໄຊສົມບູນ ໂດຍສະເພາະແມ່ນເນື້ອໃນທີ່ສຳຄັນຕົ້ນຕໍ ແລະ ວຽກງານຈຸດສຸມທີ່ຕ້ອງເອົາໃຈໃສ່ຊີ້ນຳ-ນຳພາ ໃນແຕ່ລະຂົງເຂດວຽກງານ ຕາມຄວາມຮັບຜິດຊອບຂອງຕົນ ຕິດພັນກັບການເສີມຂະຫຍາຍ ຄວາມເປັນເຈົ້າການຂອງບັນດາພະແນກການ, ກົມກອງ ໃນການຫັນມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກແຂວງ ໃຫ້ເປັນແຜນງານ, ໂຄງການ ແລະ ກິດຈະການລະອຽດຂອງຕົນ. ພ້ອມນັ້ນ ຕ້ອງເພີ່ມທະວີການນຳພາ-ຊີ້ນຳ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ I ໃຫ້ແທດເຖິງຕົວຈິງ ແລະ ສາມາດສ້າງໄດ້ຜົນສຳເລັດໃໝ່ ໃນພາລະກິດປົກປັກຮັກສາ ແລະ ພັດທະນາແຂວງໄຊສົມບູນ. ກອງປະຊຸມຄັ້ງນີ້ ຈະໄດ້ດຳເນີນເປັນເວລາ 2 ວັນຈື່ງຈະສຳເລັດ.