ສະຫະພັນກໍາມະບານ ແຂວງໄຊສົມບູນ ຈັດກອງປະຊຸມເປີດກວ້າງຄົບຄະນະບໍລິຫານງານ ຄັ້ງທີ່ 2 ສະໄໝທີ່ II ໃນວັນທີ 25 ກຸມພາ ນີ້ ທີ່ສະໂມສອນເມືອງອະນຸວົງ ໂດຍການເປັນປະທານຮ່ວມຂອງສະຫາຍ ເລັ່ງຊົ່ງ ຕົ່ງສີ, ຄະນະປະຈໍາພັກແຂວງ ປະທານແນວລາວສ້າງຊາດແຂວງ ແລະ ສະຫາຍ ເນັ່ງຢ່າງ ໃຈຫວັງໝັ້ນ, ປະທານສະຫະພັນກໍາມະບານແຂວງ, ມີກໍາມະການພັກແຂວງ, ຫົວໜ້າ-ຮອງຫົວໜ້າພະແນກການ, ມີຄະນະບໍລິຫານງານສະຫະພັນກໍາມະບານ 5 ເມືອງ ພ້ອມດ້ວຍປະທານ-ຮອງປະທານກໍາມະບານຮາກຖານພະແນກການ-ອົງການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້ ສະຫາຍ ເນັ່ງຢ່າງ ໃຈຫວັງໝັ້ນ, ປະທານສະຫະພັນກໍາມະບານແຂວງ ໄດ້ຂື້ນກ່າວເປີດກອງປະຊຸມ ຢ່າງເປັນທາງການ ເຊິ່ງສະຫາຍໄດ້ເນັ້ນໜັກໃຫ້ຜູ້ແທນກອງປະຊຸມ ຈົ່ງພ້ອມກັນສຸມສະຕິປັນຍາຂອງຕົນ ໃນການຕີລາຄາ ແລະ ປະກອບຄໍາຄິດ-ຄໍາເຫັນໃສ່ຮ່າງບົດສະຫລຸບການຈະຕັ້ງປະຕິບັດວຽກງານຂອງກໍາມະບານແຂວງ ໃຫ້ດີຂຶ້ນກວ່າເກົ່າ. ຈາກນັ້ນ ສະຫາຍ ນາງ ຄໍາຫລ້າ ທອງສີວອນ, ຮອງປະທານສະຫະພັນກໍາມະບານແຂວງ ໄດ້ຂຶ້ນຜ່ານບົດສະຫລຸບການຈັດຕັ້ງປະຕິບັດວຽກງານກໍາມະບານຮອບດ້ານ ປະຈໍາປີ 2020 ແລະ ທິດທາງແຜນການ ປະຈໍາປີ 2021 ເຊິ່ງໃນໄລຍະ1ປີ ຜ່ານມາ ສະຫະພັນກໍາມະບານແຂວງ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດເປັນວຽກກົກໃນການສຶກສາອົບຮົມ ແລະ ປຸກລະດົມ, ຊຸກຍູ້ສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າໃນທົ່ວແຂວງໄຊສົມບູນ ຊຶ່ງຕິດພັນກັບວຽກງານວິຊາສະເພາະ ເປັນຕົ້ນ ສະຫະພັນກໍາມະບານແຂວງ ສາມາດນໍາພາປັບປຸງເປີດກອງປະຊຸມໃຫຍ່ ຜູ້ແທນສະຫະພັນກໍາມະບານເມືອງ 5 ເມືອງ, 286 ກໍາມະບານຮາກຖານ, 118 ໜ່ວຍກໍາມະບານ ສໍາເລັດ 100%, ສໍາເລັດໃນການຈັດກອງປະຊຸມພົບປະແລກປ່ຽນບົດຮຽນວຽກງານກອງທຶນກໍາມະບານອາຊີບ 8 ແຂວງພາກກາງ-ພາກໃຕ້ ພ້ອມກັນນີ້ ສະຫະພັນກໍາມະບານແຂວງ ໄດ້ມອບຫລຽນກາກໍາມະບານລາວໃຫ້ສະມາຊິກກໍາມະບານທີ່ມີຜົນງານດີເດັ່ນໃນການເຄື່ອນໄຫວວຽກງານກໍາມະບານ ປະຈໍາສະໄໝທີ່ I ຈໍານວນ 32 ສະຫາຍ, ຍິງ 2 ສະຫາຍ, ມອບໃບຍ້ອງຍໍ 5 ເປັນເຈົ້າ ປະຈໍາສະໄໝທີ່ I ໃຫ້ສະມາຊິກກໍາມະບານທົ່ວແຂວງ ທັງໝົດ 2,153 ສະຫາຍ, ຍິງ 653 ສະຫາຍ, ສະຫະພັນກໍາມະບານແຂວງ ໄດ້ຮັບເງິນບໍາລຸງສະມາຊິກກໍາມະບານທົ່ວແຂວງ ປະຈໍາປີ 2020 ຈາກສະຫະພັນກໍາມະບານ 5 ເມືອງ ແລະ ກໍາມະບານຮາກຖານພະແນກການ, ,ອົງການອ້ອມຂ້າງແຂວງ ໄດ້ທັງໝົດ 17,314,000ກີບ ໃນນັ້ນ ໄດ້ສົ່ງໃຫ້ສູນກາງສະຫະພັນກໍາບານລາວ 5,000,000 ກີບ.

ປະຈຸບັນສະຫະພັນກໍາມະບານແຂວງມີສະມາຊິກກອງທຶນຊ່ວຍເຫຼືອເຊິ່ງກັນແລະກັນ ທັງໝົດ 2,153 ສະຫາຍ, ຍິງ 1,000ສະຫາຍ ແລະ ໄດ້ຂະຫຍາຍສະມາຊິກກອງທຶນຊ່ວຍເຫຼືອເຊິ່ງກັນ ແລະ ກັນໃໝ່ ໃນປີ 2020 ໄດ້ທັງໝົດ 69 ສະຫາຍ,ຍິງ 28 ສະຫາຍ ນອກນີ້ວຽກງານອື່ນໆ ກໍໄດ້ຈັດຕັ້ງປະຕິບັດສໍາເລັດຕາມຄາດໝາຍທີ່ວ່າງໄວ້. ພ້ອມດ້ວຍກັນນີ້ຜູ້ແທນກອງປະຊຸມ ໄດ້ຜັດປ່ຽນກັນຂຶ້ນປະກອບຄໍາຄິດ-ຄໍາເຫັນ ຢ່າງກົງໄປ-ກົງມາ ທັງນີ້ ກໍເພື່ອເຮັດໃຫ້ບົດສະຫລຸບດັ່ງກ່າວ ມີເນື້ອໃນຄົບຖ້ວນ ແລະ ສົມບູນດີຂື້ນກວ່າເກົ່າ. ຈາກນັ້ນບັນດາຄະນະບໍລິຫານງານສະຫະພັນກໍາມະບານແຂວງ, ປະທານກໍາມະບານຮາກຖານພະແນກການ, ອົງການອ້ອມຂ້າງແຂວງ ຂຶ້ນຈັບມືປະກາດການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ປະຈໍາສະ ໄໝທີ່ II ຕື່ມອີກ. ບັນນາທິການຂ່າວ: ນາງ ຕູດ ຄໍາພໍໃຈ