ມີເດຍລາວແຂວງໄຊສົມບູນ ຂ່າວ: ສີລິພອນ ສົງຄຳ
ພະແນກແຮງງານ ແລະ ສະຫວັດດີການສັງຄົມ ແຂວງໄຊສົມບູນ ຈັດກອງປະຊຸມເຜີຍແຜ່ກົດໝາຍວ່າດ້ວຍການຄຸ້ມຄອງໄພພິບັດ ແລະ ກົດໝາຍວ່າດ້ວຍຄົນພິການຂຶ້ນ ໃນຕອນເຊົ້າຂອງວັນທີ 15 ມິຖຸນາ 2021 ທີ່ຫ້ອງປະຊຸມພະແນກສຶກສາທິການ ແລະ ກິລາ ໂດຍການເປັນປະທານຮ່ວມຂອງທ່ານ ຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ, ຫົວໜ້າຄະນະກຳມະການຄຸ້ມຄອງໄພພິບັດຂັ້ນແຂວງ ແລະ ທ່ານ ວັນຄຳເກັ່ງ ຢ່າຊົວກົວ, ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ມີບັນດາພະແນກການ, ອົງການ-ກົມກອງ, ພ້ອມດ້ວຍບັນດາຫົວໜ່ວຍທຸລະກິດ ອ້ອມຂ້າງແຂວງເຂົ້າຮ່ວມ.

ໃນກອງປະຊຸມ ທ່ານ ວັນຄຳເກັ່ງ ຢ່າຊົວກົວ, ຫົວໜ້າພະແນກແຮງງານ ແລະ ສະຫວັດດີການສັງຄົມ ໄດ້ຂຶ້ນຜ່ານຂໍ້ຕົກລົງ ວ່າດ້ວຍກອງທຶນສົງເຄາະ ແລະ ເຜີຍແຜ່ດຳລັດ ວ່າດ້ວຍການຮັບຮອງ ແລະ ປະກາດໃຊ້ ນະໂຍບາຍ, ຍຸດທະສາດ ແລະ ແຜນປະຕິບັດງານແຫ່ງຊາດເພື່ອຄົນພິການ. ພ້ອມທັງຮັບຟັງການເຜີຍແຜ່ກົດໝາຍວ່າດ້ວຍການຄຸ້ມຄອງໄພພິບັດ ແລະ ກົດໝາຍວ່າດ້ວຍຄົນພິການ. ຈຸດປະສົງໃນການເຜີຍແຜ່ໃນຄັ້ງນີ້ແມ່ນເພື່ອໃຫ້ແຕ່ລະບຸກຄົນໄດ້ມີສ່ວນຮ່ວມໃນການພັດທະນາຄົນພິການ, ໃຫ້ໄດ້ຮັບການຟື້ນຟູທາງດ້ານຮ່າງກາຍ, ຈິດໃຈ, ສະຕິປັນຍາ, ການມີວຽກເຮັດງານທຳໃນສັງຄົມ, ໃຫ້ສັງຄົມມີສ່ວນຮ່ວມໃນການຄຸ້ມຄອງ, ອີກຢ່າງໜຶ່ງ ກໍເພື່ອຮັບຮູ້ ແລະ ເຂົ້າໃຈທາງດ້ານນິກຳຕໍ່ກັບວຽກງານຄຸ້ມຄອງໄພພິບັດ,ຊຸກຍູ້ປະກອບສ່ວນວັດຖຸ-ອຸປະກອນເຂົ້າໃສ່ແຫລ່ງທຶນສັງຄົມ-ສັງເຄາະ, ເພື່ອກະກຽມຄວາມພ້ອມໃນການຕອບໂຕ້ໄພພິບັດຕ່າງໆທີ່ຈະເກີດຂຶ້ນໃນຕໍ່ໜ້າໃຫ້ທວ່ງທັນ. ຈາກນັ້ນຜູ້ເຂົ້າຮ່ວມກອງປະຊຸມ ໄດ້ຖາມເຈາະຈີ້ມຕໍ່ມາດຕາຕ່າງໆ ພ້ອມທັງຮັບຟັງການອະທິບາຍຊີ້ແຈງຢ່າງລະອຽດ ເພື່ອໃຫ້ຜູ້ເຂົ້າຮ່ວມມີຄວາມເຂົ້າໃຈ ແລະ ເປັນເອກະພາບກັນ ເພື່ອນຳໄປຈັດຕັ້ງປະຕິບັດໃນຕໍ່ໜ້າໄດ້ຮັບຜົນດີ.

ໂອກາດດັ່ງກ່າວ ທ່ານຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ ໄດ້ມີຄຳເຫັນ ໂອ້ລົມຕໍ່ກອງປະຊຸມ ຊຶ່ງທ່ານໄດ້ກ່າວຊົມເຊີຍຕໍ່ຜົນງານໃນໄລຍະຜ່ານມາ ທີ່ສາມາດສ້າງຜົນງານຫລາຍດ້ານ ສາມາດຈັດຕັ້ງປະຕິບັດໃຫ້ມີຜົນສຳເລັດ ພ້ອມເນັ້ນໜັກໃຫ້ຕິດຕາມການຕີລາຄາ 5 ປີຜ່ານມາ, ກະກຽມແຜນການ, ແຜນງານທາງດ້ານງົບປະມານໃນການຊ່ວຍເຫລືອ,ມີສ່ວນຮ່ວມໃນການສຸ່ມເຫື່ອແຮງໃນການຈັດຕັ້ງປະຕິບັດ, ການແກ້ໄຂແນວຄິດປະຊາຊົນເປັນເປົ້າໝາຍສຳຄັນ, ໃຫ້ການຊ່ວຍເຫລືອຄົນພິການ ແລະ ຜູ້ທີ່ຖືກເຄາະຮ້າຍຈາກໄພພິບັດ. ສືບຕໍ່ສົມທົບກັບບັນດາເມືອງເຜີຍແຜ່, ເຊື່ອມຊຶມ ນິຕິກຳໃຫ້ແກ່ພະນັກງານ, ປະຊາຊົນບັນດາເຜົ່າ ໃຫ້ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ. ສະນັ້ນຈົ່ງພ້ອມກັນນຳເອົາບັນດາເນື້ອໃນກົດໝາຍ ໄປຈັດຕັ້ງຜັນຂະຫຍາຍ ພາຍໃນແຂວງ ໃນເມືອງໃຫ້ມີຄວາມເປັນເອກະພາບກັນໃນຕໍ່ໜ້າ.