ມີເດຍລາວແຂວງຈຳປາສັກ ຂ່າວ: ມະນີລາ ຖວທ ປະທຸມພອນ
ໃນວັນທີ 1 ເມສາ 2021 ນີ້, ຄະນະບໍລິຫານງານສະຫະພັນກຳມະບານເມືອງປະທຸມພອນ ແຂວງຈໍາປາສັກ ໄດ້ຈັດກອງປະຊຸມ ຄົບຄະນະບໍລິຫານງານ ສະຫະພັນກຳມະບານເມືອງ ຄັ້ງທີ 2 ສະໄໝທີ VIII ຂຶ້ນທີ່ສະໂມສອນຂອງເມືອງດັ່ງກ່າວ ໂດຍການເຂົ້າຮ່ວມເປັນປະທານຂອງສະຫາຍ ແກ້ວຕາ ຍະວົງສາ ຄະນະປະຈໍາພັກເມືອງ ປະທານແນວລາວສ້າງຊາດເມືອງ ທັງເປັນຜູ້ຊີນໍາອົງການຈັດຕັ້ງມະຫາຊົນຂັ້ນເມືອງ, ມີ ສະຫາຍ ຄໍາສິງ ສີທະນົງສັກ ປະທານສະຫະພັນກຳມະບານແຂວງ, ສະຫາຍ ຄໍາຜາງ ບົວແກ້ວສະຫວັນ ປະທານສະຫະພັນກໍາມະບານເມືອງປະທຸມພອນ, ມີຕາງໜ້າຄະນະບໍລິຫານງານສະຫະພັນກໍາມະບານເມືອງ,ປະທານກໍາມະບານຮາກຮາກປະທານໜ່ວຍກໍາມະບານ ອ້ອມຂ້າງເມືອງເຂົ້າຮ່ວມ.

ໃນກອງປະຊຸມກໍ່ໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດມະຕິກອງປະຊຸມສາມັນຄົບຄະນະບໍລິຫານງານສະຫະພັນກຳມະບານເມືອງປະທຸມພອນ ຄັ້ງທີ 2 ສະໄໝທີ VIII ແລະ ທິດທາງແຜນການປີ 2021, ຮັບຟັງການຜ່ານມະຕິກອງປະຊຸມໃຫຍ່ ຜູ້ແທນກຳມະບານລາວທົ່ວປະເທດ ຄັ້ງທີ Vlll, ເຊີ່ງໃນຊຸມປີຜ່ານມາຄະນະບໍລິຫານງານ ສະຫະພັນກຳມະບານແຕ່ລະຂັ້ນ ໄດ້ເອົາໃຈໃສ່ລົງຊຸກຍູ້ຕິດຕາມການເຄື່ອນໄຫວຂອງຄະນະພັກຮາກຖານ ແລະ ໜ່ວຍກໍາມະບານຢ່າງຕໍ່ເນື່ອງ ຕິດພັນກັບການປັບປຸງກົງຈັກການຈັດຕັ້ງ,ປັບປຸງແບບແຜນວິທີນໍາພາ-ແບບແຜນວິທີເຮັດວຽກ, ຕັ້ງໜ້າໃນການຈັດຕັ້ງເຜີຍແຜ່ເຊື່ອມຊືມແນວທາງນະໂຍບາຍຂອງພັກ ແລະ ລະບຽບກົດໜາຍຂອງລັດ ກໍ່ຄືຄະນະບໍລິຫານງານສະຫະພັນກຳມະບານ ເຮັດໃຫ້ຂະບວນການຂໍ້ແຂ່ງຂັນ 5 ເປັນເຈົ້າມີການຂະຫຍາຍຕົວຢ່າງກ້ວາງຂວາງ, ປະຈຸບັນສະສະພັນກໍາມະບານເມືອງປະກອບມີກໍາມະບານຮາກຖານ 32 ຮາກຖານ , ມີໜ່ວຍກໍາມະບານ 152 ໜ່ວຍ, ມີສະມະຊິກກໍາມະບານທັງໝົດ 1,089 ສະຫາຍ , ຍິງ 615 ສະຫາຍ,ເປັນພະນັກງານລັດຖະກອນ 794 ສະຫາຍ, ຍິງ 450 ສະຫາຍ,ເປັນພະນັກງານອາສາ 269 ສະຫາຍ, ຍິງ 161 ສະຫາຍ, ເປັນພະນັກງານລັດວິສະຫະກິດ 26 ສະຫາຍ,ຍິງ 4 ສະຫາຍ.


ຕອນທ້າຍກອງປະຊຸມ ສະຫາຍ ຄໍາສິງ ສີທະນົງສັກ ກໍ່ໄດ້ມີຄໍາເຫັນໂອ້ລົມຕໍ່ກອງປະຊຸມ ກ່ອນອື່ນສະຫາຍໄດ້ຍ້ອງຍໍຊົມເຊີຍຕໍ່ຜົນງານທີ່ ຍາດມາໄດ້ໃນໄລຍະຜ່ານມາ ພ້ອມນັ້ນກໍ່ໄດ້ເນັ້ນໃຫ້ຄະນະສະຫະພັນກໍາມະບານເມືອງ ສືບຕໍ່ເອົາໃຈໃສ່ ເປັນເຈົ້າການຊຸກຍູ້ໃນການຫັນລົງກໍ່ສ້າງຮາກຖານຢ່າງປົກກະຕິ ແລະ ທົ່ວເຖິງ, ປັບປຸງວຽກງານກອງທຶນເພຶ່ອໃຫ້ຖືກຕ້ອງສອດຄ່ອງກັບສະພາບຄວາມເປັນຈິງ ແຕ່ລະໜ່ວຍຕ້ອງໄດ້ເອົາໃຈໃສ່ມີຄວາມຮັບຜິດຊອບສູງ ປະຕິບັດຕາມເນື້ອໃນຂໍ້ແຂ່ງຂັນ 5 ເປັນເຈົ້າໃຫ້ໜັກແໜ້ນດີຂຶ້ນເປັນກ້າວໆ.