ມີເດຍລາວແຂວງໄຊສົມບູນ ຂ່າວ: ພາພອນ ນະວົງໄຊ
ໃນຕອນເຊົ້າຂອງວັນທີ 10 ມີຖຸນາ 2021 ນີ້ ທີ່ສະໂມສອນເມືອງອະນຸວົງ ສະພາປະຊາຊົນ ແຂວງໄຊສົມບູນ ໄດ້ຈັດກອງປະຊຸມ ປຶກສາຫາລື ບາງເນື້ອໃນເອກະສານ ທີ່ຍັງບໍ່ໄດ້ເອກະພາບ ຢູ່ກອງປະຊຸມ ຄັ້ງປະຖົມມະລຶກ ຂອງສະພາປະຊາຊົນ ແຂວງໄຊສົມບູນ ຄັ້ງທີ ll. ໂດຍການເປັນປະທານຮ່ວມຂອງທ່ານ ແດງ ປະທຸມທອງ ປະທານສະພາປະຊາຊົນແຂວງ, ທ່ານ ວອນປະດິດ ດາລານຸວົງ ປະທານຄະນະກຳມະການເສດຖະກິດ, ແຜນການ ແລະ ການເງິນ ແລະ ທ່ານ ສົມດີ ຈັນທະວົງ ປະທານຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ, ມີຮອງປະທານສະພາ, ຄະນະປະຈໍາສະພາ, ສະມາຊິກສະພາປະຊາຊົນ ພ້ອມດ້ວຍ ຫົວໜ້າ-ຮອງຫົວໜ້າພະແນກການ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ຈຸດປະສົງ ຂອງກອງປະຊຸມໃນຄັ້ງນີ້ ກໍເພື່ອຮັບຟັງລາຍງານ ພ້ອມທັງປຶກສາຫາລື ບາງເນື້ອໃນເອກະສານ ເປັນຕົ້ນແມ່ນການຈັດຕັ້ງປະຕິບັດ ແລະ ຮ່າງມະຕິຮັບຮອງ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ I (2016-2020) ແລະ ທິດທາງແຜນການ 5 ປີ ຄັ້ງທີ II (2021-2025), ການຈັດຕັ້ງປະຕິບັດ ແລະ ຮ່າງມະຕິຮັບຮອງ ແຜນງົບປະມານ 5 ປີ ຄັ້ງທີ I (2016-2020) ແລະ ທິດທາງແຜນງົບປະມານ 5 ປີ ຄັ້ງທີ II (2021-2025), ການຈັດຕັ້ງປະຕິບັດ ແລະ ຮ່າງມະຕິຮັບຮອງ ວຽກງານແກ້ໄຂຄວາມທຸກຍາກ 5 ປີ ຄັ້ງທີ I (2016-2020) ແລະ ທິດທາງແຜນການ 5 ປີ ຄັ້ງທີ II (2021-2025), ໂດຍຜູ້ເຂົ້າຮ່ວມກອງປະຊຸມ ຈະໄດ້ຖາມເຈາະຈີ້ມຕໍ່ບັນຫາຕ່າງໆ ພ້ອມທັງຮັບຟັງການອະທິບາຍຊີ້ແຈງ ຢ່າງລະອຽດ ເພື່ອໃຫ້ຜູ້ເຂົ້າຮ່ວມມີຄວາມເຂົ້າໃຈ ແລະ ເປັນເອກະພາບກັນ ພ້ອມທັງເຮັດໃຫ້ເນື້ອໃນເອກະສານດັ່ງກ່າວ ຖືກຮັບຮອງຈາກສະພາ ທັງນີ້ ກໍເພື່ອໃຫ້ການນໍາໄປຈັດຕັ້ງປະຕິບັດໃນຕໍ່ໜ້າໄດ້ຮັບຜົນດີ ແລະ ມີຄວາມເປັນເອກະພາບສູງ.