ມີເດຍລາວແຂວງຄຳມ່ວນ ໃນວັນທີ 25 ມີຖຸນາ 2021 ທີ່ຫ້ອງປະຊຸມພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວ ແຂວງຄຳມ່ວນ ໄດ້ຈັດກອງປະຊຸມປຶກສາຫາລືລະຫວ່າງພາກລັດ ແລະ ພາກທຸລະກິດກ່ຽວກັບວຽກງານທ່ອງທ່ຽວໂດຍການເປັນກຽດເຂົ້າຮ່ວມຂອງ ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວແຂວງ, ມີບັນດາຄະນະພະແນກ, ຂະແໜງກ່ຽວຂ້ອງ ແລະ ຜູ້ປະກອບການດ້ານທຸລະກິດການທ່ອງທ່ຽວອ້ອມຂ້າງແຂວງເຂົ້າຮ່ວມ.

ຈຸດປະສົງໃນການຈັດກອງປະຊຸມ ເພື່ອເປັນການປຶກສາຫາລືບາງຂໍ້ຄິດເຫັນຕໍ່ກັບການຈັດຕັ້ງປະຕິບັດ ກ່ຽວກັບລະບຽບການຕ່າງໆ ໂດຍສະເພາະແມ່ນລະບຽບຂອງສະມາຄົມ, ທຸລະກິດອົງການທ່ອງທ່ຽວທີ່ໄດ້ສ້າງຕັ້ງຜ່ານມາ ເພື່ອທົບທວນຄືນໄດ້ຈັດຕັ້ງປະຕິບັດຄືແນວໃດ, ພ້ອມທັງແລກປ່ຽນຄວາມຄິດເຫັນລະຫວ່າງພາກລັດ ແລະ ພາກທຸລະກິດ, ຜົນກະທົບທາງດ້ານການທ່ອງທ່ຽວໃນປະຈຸບັນຈາກການແຜ່ລະບາດຂອງພະຍາດໂຄວິດ – 19 ຕໍ່ກັບຫົວໜ່ວຍທຸລະກິດ. ໂອກາດນີ້ ທ່ານ ມະໂນທອງ ພົງສະຫວັດ ຮອງຫົວໜ້າພະແນກ ຖວທ ແຂວງຍັງໄດ້ຜ່ານແຈ້ງການເລກທີ 09/ຈຂຄມ ວ່າດ້ວຍການສືບຕໍ່ເພີ່ມທະວີຄວາມເຂັ້ມງວດໃນການຈັດຕັ້ງປະຕິບັດມາດຕະການສະກັດກັ້ນ, ຄວບຄຸມ ແລະ ປ້ອງກັນພະຍາດໂຄວິດ-19. ຮັບຟັງບົດສະຫລຸບວຽກງານທ່ອງທ່ຽວ 2020 – 2021 ແລະ ແຜນຟື້ນຟູການທ່ອງທ່ຽວພາຍຫລັງໂຄວິດ-19, ກົດລະບຽບຂອງສະມາຄົມທຸລະກິດການທ່ອງທ່ຽວ.

ໂອກາດ ກ່າວໄຂກອງປະຊຸມ ທ່ານຫົວໜ້າພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວແຂວງຄຳມ່ວນຍັງໄດ້ມີຄຳເຫັນ : ເຊິ່ງນັບແຕ່ພວກເຮົາໄດ້ປະຕິບັດມາດຕະການລ໋ອກດາວຕາມຄໍາສັ່ງ, ແຈ້ງການຂອງຄະນະສະເພາະກິດຂັ້ນສູນກາງ, ຂັ້ນແຂວງໃນ 2-3 ເດືອນຜ່ານມາ, ປະຈຸບັນເຖິງແມ່ນວ່າລັດຖະບານຈະມີການຜ່ອນຄາຍຫລາຍແລ້ວກໍ່ຕາມ ແຕ່ຂົງເຂດພວກເຮົາບາງໜ່ວຍບໍລິການກໍ່ຍັງໄດ້ປິດຊົ່ວຄາວໄປອີກໄລຍະໜຶ່ງ. ສະນັ້ນໃນສະຖານະການທີ່ວິກິດນີ້້ ເຮັດແນວໃດຈະຫັນປ່ຽນໃຫ້ເປັນໂອກາດ ກໍ່ໄດ້ຮຽກຮ້ອງມາຍັງບັນດາຜູ້ເຂົ້າຮ່ວມຈົ່ງໄດ້ພ້ອມກັນສຸມຈິດໃຈເປັນອັນໜຶ່ງອັນດຽວເພື່ອປະກອບສ່ວນໃນການມີຄຳເຫັນ, ສອບຖາມໃນແຕ່ລະບັນຫາ ພ້ອມທັງຊອກຫາວິທີແກ້ໄຂຮ່ວມກັນເພື່ອໃຫ້ກອງປະຊຸມຄັ້ງນີ້ມີຜົນສຳເລັດຕາມຄາດໝາຍທີ່ວາງໄວ້.