ມີເດຍລາວ ຂ່າວ: ຄຳເພົ້າ ຮຸ່ງໄຊຍະວົງ ໃນວັນທີ 6 ເມສາ 2021 ທີ່ຜ່ານມານີ້, ພະແນກຖະແຫຼງຂ່າວ,ວັດທະນະທຳແລະທ່ອງທ່ຽວແຂວງ ຮ່ວມກັບ ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງກະລຶມ ໄດ້ຈັດກອງປະຊຸມປຶກສາຫາລື, ຄົ້ນຄວ້າການຂຶ້ນທະບຽນມໍຣະດົກ ນາມມະທຳ ປະເພດ (ຟ້ອນເຂນ) ຂອງຊຸມຊົນເຜົ່າກະຕູ ເຊິ່ງພິທີໄດ້ຈັດຂຶ້ນຢູ່ຫ້ອງປະຊຸມຂອງຫ້ອງການ ຖວທ ເມືອງກະລຶມ. ໂດຍພາຍໃຕ້ການເປັນທານ ຂອງທ່ານ ວຽງໄຊ ສຸກມະນີ ຄະນະປະຈຳພັກເມືອງ, ຫົວໜ້າຄະນະໂຄສະນາອົບຮົມເມືອງ, ທ່ານ ຈັນໄທ ຄຳມະນີວົງ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງເຊກອງ, ຜູ້ຊີ້ນຳວຽກງານວິຈິດສິນມໍຣະດົກ, ມີທ່ານ ແສນວັງ ເວນສີລິປິ້ນ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ, ມີບັນດາພະນັກງານວິຊາການວຽກງານວັດທະນະທຳຂັ້ນແຂວງ-ຂັ້ນເມືອງ, ແຂກທີ່ຖືກເຊີນຈາກຂະແໜງການທີ່ກ່ຽວຂ້ອງອ້ອມຂ້າງເມືອງເຂົ້າຮ່ວມ.
ທ່ານ ຈັນໄທ ຄຳມະນີວົງ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງເຊກອງ, ຜູ້ຊີ້ນຳວຽກງານວິຈິດສິນມໍຣະດົກ ໄດ້ກ່າວວ່າ: ສີລະປະ ປະເພດການຟ້ອນເຂນ ຂອງຊຸມຊົນເຜົ່າກະຕູ ຄວນຈະໄດ້ຮັບການຂຶ້ນທະບຽນບັນຊີ ເປັນມໍຣະດົກນາມມະທຳຂອງທ້ອງຖິ່ນໄວ້ ສະນັ້ນ, ການຈັດກອງປະຊຸມໃນຄັ້ງນີ້ ແມ່ນຈະໄດ້ຄົ້ນຄວ້າແລກປ່ຽນ, ຄຳຄິດ ຄຳເຫັນ ເຊິ່ງກັນ ແລະ ກັນ ກ່ຽວກັບສີລະປະ ປະເພດຟ້ອນເຂນ ແມ່ນມໍຣະດົກຂອງຊຸມຊົນເຜົ່າກະຕູ ຖ້າຫາກວ່າ ສີລະປະປະເພດນີ້ໄດ້ຖືກຮັບຮອງ ແລະ ຂຶ້ນທະບຽນເປັນມໍຣະດົກລະດັບທ້ອງຖິ່ນແລ້ວ ແລະ ໃນຕໍ່ໜ້າອາດຈະກ້າວໄປສູ່ການຂໍສະເໜີຂຶ້ນທະບຽນເປັນມໍຣະດົກໃນລະດັບຊາດກໍ່ເປັນໄດ້. ສະນັ້ນ, ຜູ້ເຂົ້າຮ່ວມໃນຄັ້ງນີ້ມີຄຳເຫັນຕໍ່ຂໍ້ມູນ, ຫຼັກຖານ, ປະຫວັດຄວາມເປັນມາຕ່າງໆ ຂອງສີລະປະ ປະເພດຟ້ອນເຂນ ທີ່ທາງຄະນະຮັບຜິດຊອບຫ້າງຫາກະກຽມ ເກັບກຳຂໍ້ມູນມານັ້ນ ຖືກຕ້ອງແລ້ວ ຫຼື ຍັງ, ຮູບພາບ, ອົງປະກອບຕ່າງໆ ລວມທັງຄວາມຄິດເຫັນໃນແງ່ອື່ນໆ ແມ່ນຂໍລະດົມແນວຄວາມຄິດປະກອບໃສ່ເນື້ອໃນເອກະສານທີ່ໄດ້ຫ້າງຫາກະກຽມໃນຄັ້ງນີ້ໃຫ້ມີຄວາມສົມບູນ.