ມີເດຍລາວແຂວງໄຊສົມບູນ ຂ່າວ: ຈິນລະວອນ ວໍລະສົມບູນ
ກອງປະຊຸມ ຝຶກອົບຮົມເຜີຍແຜ່ແນະນຳ-ການຂຽນບົດສະເໜີໂຄງການລົງທຶນ ຂອງລັດ ຢູ່ແຂວງໄຊສົມບູນ ໄດ້ຈັດຂຶ້ນໃນວັນທີ 11 ມີນາ 2021 ນີ້ ທີ່ຫ້ອງປະຊຸມພະແນກສຶກສາທິການ ແລະ ກິລາ ແຂວງ ໂດຍການເປັນປະທານຮ່ວມ ຂອງທ່ານ ພູພັດ ສິງທາວົງໄຊ, ຮອງຫົວໜ້າພະແນກແຜນການ ແລະ ການລົງທຶນ ແຂວງໄຊສົມບູນ ແລະ ທ່ານ ປອ ວຽງຊັນ ຈັນທາ, ຮອງຫົວໜ້າກົມປະເມີນຜົນ, ກະຊວງແຜນການ ແລະ ການລົງທຶນ, ມີຫົວໜ້າພະແນກ, ຮອງພະແນກການ, ອົງການ, ກົມກອງ ອ້ອມຂ້າງແຂວງ ພ້ອມດ້ວຍຫ້ອງການແຜນການ ແລະ ການລົງທຶນ ທັງ 5 ເມືອງ ເຂົ້າຮ່ວມ.

ໃນວາລະດຳເນີນກອງປະຊຸມ ທ່ານ ປອ ວຽງຊັນ ຈັນທາ, ຮອງຫົວໜ້າກົມປະເມີນຜົນ, ກະຊວງແຜນການ ແລະ ການລົງທຶນ ໄດ້ສະເໜີຄວາມຮູ້ພື້ນຖານ ກ່ຽວກັບການສ້າງແຜນພັດທະນາເສດຖະກິດ-ສັງຄົມ ແລະ ການຄຸ້ມຄອງໂຄງການລົງທຶນ ຂອງລັດ ທັງນີ້ ກໍເພື່ອສ້າງຄວາມເຂັ້ມແຂງໃຫ້ພະນັກງານ ອ້ອມຂ້າງ ແຂວງໄຊສົມບູນ ແລະ ບັນດາເມືອງ ໄດ້ກຳແໜ້ນເຊື່ອມຊຶມ ແລະ ເຂົ້າໃຈ ຢ່າງເລິກເຊິ່ງ ຕໍ່ບັນດານິຕິກຳ-ກົດໝາຍການລົງທຶນ ຂອງລັດ ຢ່າງເຂັ້ມງວດ ແລະ ແບບຟອມໂຄງການລົງທຶນ ຂອງລັດ, ການຕື່ມຂໍ້ມູນໂຄງການລົງທຶນ ຂອງລັດ ລົງໃນແບບຟອມ ໃຫ້ລະອຽດຈະແຈ້ງ ເພື່ອນຳໄປຈັດຕັ້ງປະຕິບັດໃຫ້ຖືກຕ້ອງ ແລະ ສອດຄ່ອງ ຕາມລະບຽບກົດໝາຍການລົງທຶນ ທຸກປະການ. ຂະນະດຽວກັນ ຜູ້ເຂົ້າຮ່ວມໄດ້ຜັດປ່ຽນກັນປະກອບຄຳຄິດ-ຄຳເຫັນ ຢ່າງກົງໄປກົງມາ ດ້ວຍຄວາມເປັນເຈົ້າການສູງ ເພື່ອຖອດຖອນບົດຮຽນ ກ່ຽວກັບການຈັດຕັ້ງປະຕິບັດ-ການຂຽນບົດສະເໜີໂຄງການ ຕາມແບບຟອມຟີແຄບ, ບັນຫາກ່ຽວກັບເອກະສານໂຄງການລົງທຶນ ຂອງລັດ ເພື່ອພ້ອມກັນເປັນເອກະພາບ ແລະ ນຳໄປຈັດຕັ້ງປະຕິບັດ ໃນຕໍ່ໜ້າ ໃຫ້ມີຄວາມຮັດກຸມ, ຖືກຕ້ອງຕາມລະບຽບກົດໝາຍ ຢ່າງເຂັ້ມງວດ ແລະ ມີປະສິດທິພາບດີຂຶ້ນກວ່າເກົ່າ. ກອງປະຊຸມ ຝຶກອົບຮົມເຜີຍແຜ່ແນະນຳ-ການຂຽນບົດສະເໜີໂຄງການລົງທຶນ ຂອງລັດ ຢູ່ແຂວງໄຊສົມບູນ ຄັ້ງນີ້ ຈະໄດ້ດຳເນີນຮອດວັນທີ 12 ຈຶ່ງສຳເລັດ.