ມີເດຍລາວແຂວງໄຊສົມບູນ ຂ່າວ: ຕູດ ຄຳພໍໃຈ
ໜ່ວຍພັກຫ້ອງວ່າການ ແຂວງໄຊສົມບູນ ຈັດກອງປະຊຸມສະຫຼຸບການຊີ້ນໍາ-ນໍາພາວຽກງານ ຮອບດ້ານ ແລະ ສະຫຼຸບວຽກງານຫ້ອງວ່າການ ແຂວງ ປະຈໍາໄຕມາດ I ແລະ ທິດທາງແຜນການ ປະຈໍາໄຕມາດ II ປີ 2021 ໃນວັນທີ 8 ເມສາ ນີ້ ທີ່ຫ້ອງປະຊຸມຫ້ອງວ່າການ ແຂວງ ໂດຍການເຂົ້າຮ່ວມເປັນປະທານ ຂອງສະຫາຍ ພົຕ ຄໍາລຽງ ອຸທະໄກສອນ, ເລຂາຄະນະບໍລິຫານງານພັກແຂວງ, ເຈົ້າແຂວງໄຊສົມບູນ, ມີສະຫາຍຮອງເລຂາພັກແຂວງ, ເລຂາໜ່ວຍພັກຫ້ອງວ່າການແຂວງ ພ້ອມດ້ວຍເລຂາ-ຮອງເລຂາ ກຸ່ມການເມືອງ ຕະຫຼອດຮອດສະມາຊິກພັກສົມບູນ ແລະ ສໍາຮອງ ພາຍໃນຫ້ອງໜ່ວຍພັກຫ້ອງວ່າການແຂວງ ເຂົ້າຮ່ວມ.

ໃນວາລະກອງປະຊຸມ ສະຫາຍ ສົມບູນ ຄໍາຕາງ, ຮອງເລຂາໜ່ວຍພັກຫ້ອງວ່າການແຂວງ ໄດ້ຜ່ານບົດສະຫຼຸບການຊີ້ນໍາ-ນໍາພາວຽກງານ ຮອບດ້ານ ຂອງໜ່ວຍພັກຫ້ອງວາການ ແຂວງໄຊສົມບູນ ປະຈໍາໄຕມາດ I ແລະ ທິດທາງແຜນການ ປະຈໍາໄຕມາດ II ປີ 2021 ຊຶ່ງຕະຫຼອດໄລຍະ 3 ເດືອນ ຜ່ານມາ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ເປັນໜ້າທີ່ໃຈກາງ ໂດຍສອດຫ້ອຍກັບວຽກງານພັກ-ພະນັກງານ ເປັນຕົ້ນ ໄດ້ຮັບເອົາມະຫາຊົນຜູ້ກ້າວໜ້າ ເຂົາເປັນສະມາຊິກພັກສໍາຮອງ 1 ສະຫາຍ ແລະ ເລື່ອນສະມາຊິກພັກສໍາຮອງ ຂຶ້ນເປັນສະມາຊິກພັກສົມບູນ 1 ສະຫາຍ, ຮັບສະມາຊິກພັກ ທີ່ໂຍກຍ້າຍມາຈາກໜ່ວຍພັກອື່ນ 2 ສະຫາຍ, ຕິດຕາມມະຫາຊົນຜູ້ກ້າວໜ້າ ທີ່ຜ່ານການຮຽນກົດລະບຽບພັກ ເຂົ້າເປັນສະມາຊິກພັກສໍາຮອງ 3 ສະຫຍ, ໄດ້ສົ່ງສະມາຊິກພັກ-ພະນັກງານ ໄປຮຽນບໍາລຸງທິດສະດີການເມືອງ-ການປົກຄອງ 45 ວັນ ຈໍານວນ 1 ສະຫາຍ, ສົ່ງພະນັກງານໄປຝຶກອົບຮົມວຽກງານການຕ່າງປະເທດ ຢູ່ສະຖາບັນການຕ່າງປະເທດ ຈໍານວນ 1 ສະຫາຍ, ນໍາສົ່ງພະນັກງານໄປຝຶກອົບຮົມວິທະຍາ ໃນການຄົ້ນຄ້ວາ ຢູ່ແຂວງວຽງຈັນ 1 ສະຫາຍ ແລະ ຝຶກອົບຮົມວິທະຍາສາດໃນການຄົ້ນຄວ້າດ້ານເສດຖະກິດ ແລະ ວິໄຈສະພາບເສດຖະກິດມະຫາພາກ ຂັ້ນແຂວງ ຢູ່ແຂວງວຽງຈັນ 2 ສະຫາຍ. ນອກນີ້ ວຽກງານດ້ານອື່ນໆ ກໍໄດ້ຈັດຕັ້ງປະຕິບັດສຳເລັດ ຕາມລະດັບຄາດໝາຍ.

ໂອກາດນີ້ ສະຫາຍ ສົມບູນ ສອນລິດທິເດດ, ເລຂາໜ່ວຍພັກຫ້ອງວ່າການແຂວງ ໄດ້ເຜີຍແຜ່ແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຂອງໜ່ວຍພັກຫ້ອງວ່າການແຂວງ ແລະ ເຜີຍແຜ່ມະຕິກອງປະຊຸມໃຫຍ່ ຂອງອົງຄະນະພັກ ແຂວງໄຊສົມບູນ ຄັ້ງທີ 1 ສະໄໝທີ I ຕື່ມອີກ. ຄະນະດຽວກັນກອງປະຊຸມ ຍັງໄດ້ຮັບຟັ້ງການຜ່ານຮ່າງບົດສະຫຼຸບວຽກງານຮອບດ້ານຂອງຫ້ອງວ່າການ ແຂວງ ປະຈໍາໄຕມາດ I ແລະ ທິດທາງແຜນການ ປະຈໍາໄຕມາດ II ປີ 2021 ຊຶ່ງຕະຫຼອດໄລຍະ 3 ເດືອນ ຫ້ອງວ່າການແຂວງ ໄດ້ຕິດຕາມຄຸ້ມຄອງລາຍຮັບ-ລາຍຈ່າຍງົບປະມານແຫ່ງລັດ ປະຈໍາປີ 2020 ຊຶ່ງໃນນີ້ ພາກ 60 ເງິນເດືອນ ປະຕິບັດໄດ້ 224,955,000 ກີບ, ເທົ່າກັບ 21,84%, ພາກ 61 ເງິນອຸດໜູນ ແລະ ເງິນນະໂຍບາຍ ປະຕິບັດໄດ້ 5,591,880 ກີບ, 0,52%, ພາກ 62 ເງິນບໍລິຫານປົກກະຕິປະຕິບັດໄດ້ 813,7500,000 ກີບ ເທົ່າກັບ 25%, ພາກ 63 ເງິນດັດສົມສົ່ງເສີມ 448,425,000 ກີບ ປະຕິບັດໄດ້ 25%, ພາກ 65 ເງິນແຮ ແລະ ອື່ນໆ 325,000,000 ປະຕິບັດໄດ້ 25%, ພາກ 66 ເງິນຊັບສົມບັດຄົງທີ່ 55,000,000 ກີບ ປະຕິບັດໄດ້ 25% ແລະ ລາຍຈ່າຍປະຈໍາງວດ 1 ປີ 2021 ໄດ້ທັງໝົດ 1,872,721,880 ກີບ ພ້ອມນີ້ວຽກງານຄຸ້ມຄອງໂຄງການລົງທຶນຂອງລັດ ທີ່ຫ້ອງວ່າການເປັນເຈົ້າຂອງໂຄງການ ທັງໝົດ 10 ໂຄງການ ໃນນີ້ໂຄງການສໍາເລັດໜ້າວຽກ 100% ແລ້ວ ແຕ່ຍັງຄ້າງຊໍາລະມີ 7 ໂຄງການ ແລະ ໂຄງການສືບຕໍ່ກໍ່ສ້າງມີ 3 ໂຄງການ ພ້ອມນັ້ນວຽກງານດ້ານອື່ນໆ ກໍໄດ້ຈັດຕັ້ງປະຕິບັດສໍາເລັດຕາມຄາດໝາຍທີ່ໄດ້ກໍານົດໄວ້.

ໂອກາດດັ່ງກ່າວ ສະຫາຍເລຂາພັກ ແຂວງ ໄດ້ມີຄໍາເຫັນໂອ້ລົມຕໍ່ກອງປະຊຸມ ຊຶ່ງສະຫາຍ ໄດ້ເນັ້ນໜັກໃຫ້ຄະນະໜ່ວຍພັກ ຫ້ອງວ່າການ ແຂວງ ຈົ່ງສືບຕໍ່ສຶກສາອົບໂຮມການເມືອງ-ແນວຄິດ ໃຫ້ສະມາຊິກພັກ-ພະນັກງານ-ລັດຖະກອນ ໄດ້ກຳແໜ້ນເຊື່ອມຊຶມຂໍ້ແຂ່ງຂັນການສ້າງໜ່ວຍພັກປອດໃສ, ເຂັ້ມແຂງໜັກແໜ້ນ ໂດຍການເຊື່ອມຊຶມທິດທາງແຜນການໄຕມາດ II ໃຫ້ສະມາຊິກພັກທຸກສະຫາຍ ເຂົ້າໃຈຢ່າງເລິກເຊິ່ງ ໄປພ້ອມກັບການຈັດຕັ້ງພາຍໃນໜ່ວຍພັກ ໃຫ້ຕິດພັນກັບແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ, ສ້າງໃຫ້ຖັນແຖວສະມາຊິກພັກ ມີສະຕິເຄົາລົບການຈັດຕັ້ງ, ກົດລະບຽບພັກ, ມະຕິ, ຄຳສັ່ງ ຕ່າງໆ ຂອງຂັັັັັັັັັ້ນເທິງ ໂດຍຖືເອົາການຮ່ວມຊີວິດພັກເປັນຫຼັກ ແລະ ປົກກະຕິ ພ້ອມທັງຖືເອົາການຕຳນິຕິຊົມກັນ ເຂົ້າໃນການກໍ່ສ້າງພັກ. ຂະນະດຽວກັນ ສະຫາຍ ຍັງໄດ້ເນັ້ນໜັກ ໃຫ້ສືບຕໍ່ຄຸ້ມຄອງລາຍຮັບ-ລາຍຈ່າຍ ໃຫ້ຖືກຕ້ອງຕາມລະບຽບກົດໝາຍ ທີ່ລັດວາງອອກ ຢ່າງເຂັ້ມງວດ ທັງໝົດນັ້ນ ເພື່ອເຮັດໃຫ້ທຸກຂົງເຂດວຽກງານ ຂອງຫ້ອງວ່າການແຂວງ ໄດ້ຮັບການຈັດຕັ້ງປະຕິບັດ ຢ່າງຮັດກຸມ ແລະ ມີປະສິດທິພາບ ດີຂຶ້ນກວ່າເກົ່າ.