ມີເດຍລາວແຂວງບໍ່ແກ້ວ ໂດຍ: ວໍລະສິດ ພິດສະຫາຍ
ວັນທີ 10 ມີຖຸນາ 2021 ນີ້, ກອງພັນ 419 ທະຫານແຂວງບໍ່ແກ້ວ ໄດ້ເປີດກອງປະຊຸມສ່ອງແສງວຽກງານຮອບດ້ານ ປະຈຳໄຕມາດ II, ໂດຍການເປັນປະທານຂອງສະຫາຍ ພັນໂທ ທອງໄຂ ສີຍາລາດ ຮອງເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງບໍ່ແກ້ວ, ມີຄະນະພັກ-ຄະນະບັນຊາ ກອງພັນ 419, ກອງບັນຊາການທະຫານເມືອງເມິງ, ກອງຮ້ອຍທະຫານຊາຍແດນ 121, ຕະຫຼອດຮອດພະນັກງານຫຼັກແຫຼ່ງເຂົ້າຮ່ວມ.

ກອງປະຊຸມຜູ້ແທນບັນດາກົມກອງໄດ້ຜັດປ່ຽນກັນຂຶ້ນລາຍງານຫຍໍ້ກ່ຽວ ກັບວຽກງານຮອບດ້ານທີ່ໄດ້ຈັດຕັ້ງປະຕິບັດໃນໄລຍະຜ່ານມາທັງດ້ານດີ-ດ້ານອ່ອນ ທີ່ຈະຕ້ອງໄດ້ປັບປຸງແກ້ໄຂເປັນຕົ້ນແມ່ນ ບັນດາກົມກອງໄດ້ພ້ອມກັນຖືເອົາວຽກງານການສຶກສາອົບຮົມການເມືອງ-ນຳພາແນວຄິດ ພາຍໃນກົມກອງສອດຫ້ອຍເຂົ້າໃນທຸກຂົງເຂດວຽກງານ ຕາມ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກຢ່າງເຂັ້ມງວດ ຕິດພັນກັບ 4 ເນື້ອໃນ 4 ຄາດໝາຍ, ໂດຍນຳເອົາບັນດາຄຳສັ່ງ ນິຕິກຳຕ່າງໆ ຂອງຊາດ, ຂອງພັກ, ຂອງກອງທັບ ຊົມເຊີຍຜົນສໍາເລັດກອງປະຊຸມໃຫຍ່ ຄັ້ງທີ XI ຂອງພັກ ແລະ ຜົນສຳເລັດການເລືອກຕັ້ງສະມາຊິກສະພາແຫ່ງຊາດ ຊຸດທີ 9 ແລະ ສະມາຊິກສະພາປະຊາຊົນແຂວງ ຊຸດທີ 2, ເວົ້າລວມ, ເວົ້າສະເພາະກອງບັນຊາການທະຫານແຂວງບໍ່ແກ້ວ ໄດ້ລົງເຜີຍແຜ່ໃຫ້ບັນດາ ພະນັກງານ-ນັກຮົບ ພາຍໃນກົມກອງຂອງຕົນເອົາໃຈໃສ່ເຮັດໜ້າທີ່ວຽກງານປ້ອງກັນຊາດ-ປ້ອງກັນຄວາມສະຫງົບ, ເຄື່ອນໄຫວລາດຕະເວນ-ຕິດຕາມ-ກໍາແໜ້ນສະພາບການ-ກຸ່ມຄົນບໍ່ດີຢູ່ພາຍໃນແຂວງບໍ່ແກ້ວ ເວົ້າລວມ, ເວົ້າສະເພາະ ຂອບເຂດຮັບຜິດຊອບຂອງກົມກອງມີຄວາມສະຫງົບປອດໄພໂດຍພື້ນຖານ.

ທ້າຍພິທີທ່ານປະທານຍັງໄດ້ໂອ້ລົມເນັ້ນໝັກ ໃຫ້ພະນັກງານ-ນັກຮົບ ຈົ່ງພ້ອມກັນຫັນເອົາກຳລັງລົງກໍ່ສ້າງຮາກຖານການເມືອງຢູ່ໃນຂອບເຂດຮັບຜິດຊອບຢ່າງເປັນປົກກະຕິ, ເອົາໃຈໃສ່ການອົບຮົມ-ຫັດແອບທາງດ້ານສິລະປະຍຸດ-ຍຸດທະວິທີ ສ້າງຄວາມຊຳນິຊຳນານໃຫ້ພະນັກງານ-ນັກຮົບ ເພື່ອຮັບປະກັນມີຄວາມຄ່ອງແຄ້ວໃນການປະຕິບັດໜ້າທີ່, ປັບປຸງກໍ່ສ້າງກົມກອງໃຫ້ມີຄວາມສະຫງົບເຂັ້ມແຂງ ໜັກແໜ້ນໃນທຸກດ້ານ ໂດຍຖືເອົາການຍົກສູງຄຸນນະພາບທາງດ້ານການເມືອງແນວຄິດເປັນພື້ນຖານເຮັດໃຫ້ ພະນັກງານ-ນັກຮົບໃນກົມກອງ ມີຄຸນທາດການເມືອງໜັກແໜ້ນ, ມີລະບຽບແບບແຜນ, ມີຄວາມສາມັກຄີພາຍໃນ ແລະ ປະຊາຊົນບັນດາເຜົ່າ, ມີຄວາມຂະຫຍັນ ໝັ່ນພຽນໃນການອອກແຮງງານ, ເພີ່ມພູມຜະລິດຜົນ, ປະຢັດມັດ ທະຍັດ ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍ ຕົນເອງ ແລະ ໄດ້ປັບປຸງຊີວິດການເປັນຢູ່ຂອງພະນັກງານ-ນັກຮົບພາຍໃນກົມກອງດີຂຶ້ນເທື່ອລະກ້າວ.