ປັດຈຸບັນພະຍາດໂຄວິດ-19 ຍັງສືບຕໍ່ເປັນໄພຄຸກຄາມຕໍ່ໂລກ ແລະ ຕໍ່ປະເທດເຮົາ ນັບມື້ນັບເພີ່ມຂື້ນ ຊື່ງບໍ່ທັນສາມາດສະກັດກັ້ນໄດ້ຢ່າງຂາດຕົວເທື່ອ. ເຊື້ອພະຍາດໂຄວິດ-19 ໄດ້ກາຍພັນມີຄວາມສາມາດທຳຮ້າຍແຮງກ່ວາເກົ່າ ເຮັດໃຫ້ການຕິດເຊື້ອເພີ່ມໄວຂື້ນ ຢູ່ປະເທດຕ່າງໆ ໃນໂລກ ແລະ ຢູ່ປະເທດອ້ອມຂ້າງຂອງພວກເຮົາກໍ່ກຳລັງມີການລະບາດຮອບໃໝ່ທີ່ຮຸນແຮງຂື້ນ ແລະ ຂະຫຍາຍອອກສູ່ວົງກວ້າງ. ບ່ອນທີ່ພາໃຫ້ມີການແຜ່ເຊື້ອອອກສູ່ວົງກວ້າງແມ່ນຮ້ານບັນເທີງ, ຄາຣາໂອເກະ, ຮ້ານກິນດື່ມ. ດັ່ງນັ້ນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຈື່ງໄດ້ອອກແຈ້ງການໃຫ້ປິດຊົ່ວຄາວສະຖານທີ່ບັນເທິງ, ຮ້ານຄາຣາໂອເກະ, ຮ້ານກິນດື່ມ ແລະ ຫ້າມຈັດງານລ້ຽງໃນງານດອງ, ການພົບປະສ້າງສັນ ທີ່ເຕົ້າໂຮມຄົນຈຳນວນຫລາຍນັບແຕ່ວັນທີ 14-30 ເມສາ 2021 ເພື່ອເປັນການປ້ອງກັນແຕ່ຫົວທີ ແລະ ຮັບປະກັນບໍ່ໃຫ້ມີການລະບາດໃນປະເທດເຮົາຈີ່ງຂໍແຈ້ງມາຍັງທ່ານ.