ມີເດຍລາວແຂວງເຊກອງ ໂດຍ: ຄຳເພົ້າ ຮຸ່ງໄຊຍະວົງ
ໃນວັນທີ 22 ມີຖຸນາ 2021 ນີ້, ຫ້ອງການພາຍໃນເມືອງກະລຶມ ຮ່ວມກັບ ພະແພກພາຍໃນແຂວງເຊກອງ ໄດ້ຈັດກອງປະຊຸມ ປະເມີນເຂດຫ່າງໄກສອກຫຼີກທຸລະກັນດານ ຢູ່ເມືອງກະລຶມ ແຂວງເຊກອງ ໂດຍພາຍໃຕ້ການເປັນປະທານ ຂອງທ່ານ ອໍບົວລາ ອ່ອນມະໄລວົງ ກຳມະການພັກແຂວງ ເລຂາພັກເມືອງ ເຈົ້າເມືອງ – ເມືອງກະລຶມ, ໃຫ້ກຽດເຂົ້້່າຮ່ວມໂດຍທ່ານ ຄຳສອນ ກອນເຢີ ຄະນະປະຈຳພັກແຂວງ ຮອງເຈົ້າແຂວງ, ມີບັນດາຄະນະກຳມະການຂັ້ນແຂວງ – ຂັ້ນເມືອງ ແລະ ຫ້ອງການທີ່ກ່ຽວຂ້ອງເຂົ້າຮ່ວມ.

ທ່ານ ສອນເພັດ ສອນສຸພັນ ກຳມະການພັກເມືອງ ຫົວໜ້າຫ້ອງການພາຍໃນເມືອງກະລຶມ ໄດ້ເປັນກຽດຂຶ້ນລາຍງານຜົນການເຄື່ອນໄຫວຈັດຕັ້ງປະຕິບັດວຽກງານເຂດຫ່າງໄກສອກຫຼີກປະຈຳປີ 2020 ໂດຍຫຍໍ້ວ່າ: ເມືອງກະລຶມ ມີທັງໝົດ 52 ບ້ານ. ໃນນັ້ນ, ມີບ້ານທີ່ບໍ່ຖືກຈັດເຂດຫ່າງໄກ່ສອກຫຼີກ ມີ 05 ບ້ານ, ບ້ານທີ່ຖືກຈັດເຂດຫ່າງໄກສອກຫຼີກ ລະດັບ I ມີ 14 ບ້ານ, ລະດັບ II ມີ 14 ບ້ານ ແລະ ລະດັບ III ມີ 19 ບ້ານ. ໃນທົ່ວເມືອງມີພະນັກງານ – ລັດຖະກອນທັງໝົດ 560 ຄົນ, ຍິງ 159 ຄົນ. ໃນນັ້ນ, ມີພະນັກງານ – ລັດຖະກອນ ທີ່ມີເງື່ອນໄຂຮັບເງິນອຸດໜູນເຂດຫ່າງໄກສອກຫຼີກທຸລະກັນດານທັງໝົດ 170 ຄົນ, ຍິງ 34 ຄົນ. ຈັດລະດັບເຂດຫ່າງໄກສອກຫຼີກ ລະດັບ I 50% ມີທັງໝົດ 38 ຄົນ, ຍິງ 3 ຄົນ. ລວມເປັນເງິນທັງໝົດ: 345.729.600 ກີບ. ລະດັບ II 40% ມີ 70 ຄົນ, ຍິງ 15 ຄົນ. ລວມເປັນເງິນທັງໝົດ: 523.307.520 ກີບ ແລະ ລະດັບ III 30% ມີ 62 ຄົນ, ຍິງ 16 ຄົນ. ລວມເປັນເງິນທັງໝົດ: 357.359.040 ກີບ.

ໃນກອງປະກອງປະຊຸມ ຍັງໄດ້ເຊື່ອມຊຶມດຳລັດ ຂອງນາຍົກລັດຖະມົນຕີ ສະບັບເລກທີ 292/ນຍ, ວ່າດ້ວຍນະໂຍບາຍ ຕໍ່ພະນັກງານ – ລັດຖະກອນທີ່ປະຕິບັດໜ້າທີ່ ຢູ່ເຂດຫ່າງໄກ່ສອກຫຼີກ ທຸລະກັນດານ ແລະ ແນະນຳວິທີການປະເມີນ ແລະ ກວດກາຄືນບັນດາຂໍ້ມູນທີ່ຢັ້ງຢືນໄປແລ້ວ ຈຳນວນ 47 ບ້ານທົ່ວເມືອງ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ມີຄວາມເປັນເອກະພາບ, ມີປະສິດທິພາບ ແລະ ປະສິດທິຜົນ ແນໃສ່ຊຸກຍູ້ ແລະ ສົ່ງເສີມໃຫ້ພະນັກງານ – ລັດຖະກອນ ມີຄວາມຕື່ນຕົວ ແລະ ຫ້າວຫັນໃນການຈັດຕັ້ງປະຕິບັດໜ້າທີ່ວຽກງານຢູ່ເຂດດັ່ງກ່າວ, ປະກອບສ່ວເຂົ້າໃນການພັດທະນາເສດຖະກິດ – ສັງຄົມ ຂອງເມືອງກະລຶມ, ແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນ ແລະ ກ້າວໄປເຖິງການຫຼຸດຜ່ອນຄວາມທຸກຍາກ ເທື່ອລະກ້າວ.