ມີເດຍລາວແຂວງເຊກອງ ຂ່າວ: ຄຳເພົ້າ ຮຸ່ງໄຊຍະວົງ
ໃນຕອນເຊົ້າ ວັນທີ 24 ມີຖຸນາ 2021 ນີ້, ເມືອງກະລຶມໄດ້ສະຫຼຸບວຽກງານກວດກາ ທົ່ວເມືອງ ປະຈຳປີ 2020 ແລະ ປະຈໍາ 5 ປີ ( 2015 – 2020 ) ແລະ ວາງທິດທາງແຜນ ປີ 2021 ແລະ 5 ປີ ( 2021 – 2025 ) ໂດຍການເປັນປະທານຂອງ ທ່ານ ອໍບົວລາ ອ່ອນມະໄລວົງ ກຳມະການພັກແຂວງ ເລຂາພັກເມືອງ ເຈົ້າເມືອງ – ເມືອງກະລຶມ ແລະ ໃຫ້ກຽດເຂົ້າຮ່ວມ ຂອງທ່ານ ປອ ສົມນິດ ສີລິບຸນລ້ຽງ ຄະນະກຳມະການປະຈໍາພັກແຂວງ, ປະທານອົງການກວດກາພັກ-ລັດແຂວງທ່ານ ອຸດົມສຸກ ບຸດສວນທຽນ ຮອງເລາຂາພັກເມືອງ ປະທານກວດກາພັກເມືອງ ທັງເປັນສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງກະລຶມ, ມີບັນດາຄະນະກຳມະການ, ຫົວໜ້າຫ້ອງການອ້ອມຂ້າງເມືອງເຂົ້າຮ່ວມ.

ທ່ານ ສີສຸກລາ ນອຍມະນີ ຮອງປະທານກວດກາພັກເມືອງ ໄດ້ລາຍງານການເຄື່ອນໄຫວວຽກງານກວດກາທົ່ວເມືອງກະລຶມ ປະຈຳປີ 2020 ແລະ ປະຈຳ 5 ປີ ( 2016 – 2020 ) ເຊິ່ງໃນ 5 ປີຜ່ານມາ ຄະນະກວດກາພັກ-ລັດເມືອງ ໄດ້ເປັນເຈົ້າການຄົ້ນຄ້ວາຜັນຂະຫຍາຍທິດຊີ້ນຳຂອງຄະນະພັກເມືອງ, ແຂວງ, ສູນກາງພັກ, ອົງການກວດກາລັດຖະບານຕາມຄວາມຮັບຜິດຂອງຕົນເປັນປົກະຕິ, ເປັນເຈົ້າການຊີ້ນຳ – ນຳພາ, ຕິດຕາມ, ກວດກາການຈັດຕັ້ງປະຕິບັດມະຕິ X ຂອງພັກ, ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ ແລະ ມະຕິກອງປະຊຸມໃຫຍ່ຄັ້ງທີ VIII ຂອງຄະນະພັກເມືອງ, ໄດ້ຮັບການລາຍງານສ່ອງແສງຈາກບັນດາຮາກຖານພັກອ້ອມຂ້າງເມືອງຈຳນວນໜຶ່ງໄດ້ເປັນປົກກະຕິ, ປະຈຸບັນທົ່ວເມືອງມີ 78 ຮາກຖານພັກ, ມີ 4 ຄະນະພັກຮາກຖານ.

ໃນນັ້ນ ມີ 3 ຄະນະພັກຮາກຖານສຳນັກງານ, 1 ຄະນະພັກຮາກຖານບ້ານ ທຽບໃສ່ປີ 2019 ເພີ່ມ 2 ໜ່ວຍ, ໃນນີ້ ໜ່ວຍພັກຮາກຖານສຳນັກງານ 21 ໜ່ວຍພັກ, ເພີ່ມຂຶ້ນ 2 ໜ່ວຍ ແລະ ໜ່ວຍພັກຮາຖານບ້ານ 57 ໜ່ວຍ,ໄດ້ຕີລາຄາຈັດແບ່ງປະເພດໜ່ວຍພັກປອດໃສ, ເຂັ້ມແຂງ, ໜັກແໜ້ນ 60 ໜ່ວຍ, ກາງ 25 ໜ່ວຍ, ອ່ອນ 0 ໜ່ວຍ ແລະ ບໍ່ໄດ້ຈັດປະເພດ 0 ໜ່ວຍ, ມີສະມາຊິກພັກທັງໝົດ 1.426 ສະຫາຍ, ຍິງ 245 ສະຫາຍ, ໃນນີ້ມີສະມາຊິກພັກສຳຮອງ 117 ສະຫາຍ, ຍິງ 11 ສະຫາຍ, ໄດ້ມອບບັດໃຫ້ແກ່ສະມາຊິກພັກສຳເລັດແລ້ວ 851 ສະຫາຍ, ຍິງ 83 ສະຫາຍ ແລະ ໃນປີ 2020 ໄດ້ຖືກປະຕິບັດວິໄນຕໍ່ສະມາຊິກພັກທັງໝົດ 6 ສະຫາຍ, ລົບຊື່ອອກຈາກສະມາຊິກພັກ 4 ສະຫາຍ, ໂຈະຮ່ວມຊີວິດພັກ 6 ເດືອນ, ມີ 2 ສະຫາຍ.

ວຽກງານກວດກາລັດ ຕ້ານການສໍ້ລາດບັງຫຼວງໄດ້ຕິດຕາມກວດກາບັນຫາພະນັກງານເມືອງ ທີ່ໄດ້ສໍ້ລາດຊັບສິນຂອງລັດ ( ເປັນເງິນສົດ ) ຈຳນວນທັງໝົດ 1.246.606.507 ກີບ, ມີຈຳນວນ 8 ຄົນ, ໃນນີ້ໄດ້ກູ້ຄືນແລ້ວຈໍານວນ 482.000.000 ກີບ, ຍັງຄ້າງ 769.597.507 ກີບ. ການຈັດຕັ້ງປະຕິບັດວຽກງານຊັບສິນ ແລະ ລາຍຮັບຂອງພະນັກງານ – ລັດຖະກອນ ໃນຮອບທີ 2 ທົ່ວເມືອງ ມີເປົ້າໝາຍທັງໝົດ 580 ທ່ານ, ຍິງ 156 ທ່ານ ໃນນັ້ນ, ຂັ້ນແຂວງຄຸ້ມຄອງ 25 ທ່ານ, ຍິງ 3 ທ່ານ ແຈ້ງສຳເລັດແລ້ວ, ພະນັກງານຂັ້ນເມືອງຄຸ້ມຄອງມີ 555 ທ່ານ, ຍິງ 152 ທ່ານ, ໃນນີ້ແຈ້ງສຳເລັດແລ້ວ 512 ທ່ານ, ຍິງ 138 ທ່ານ, ຍັງຄ້າງທັງໝົດ 43 ທ່ານ, ຍິງ 15 ທ່ານ.


ໂອກາດນີ້ທ່ານ ປອ ສົມນິດ ສີລິບຸນລ້ຽງ ກໍາມະການປະຈໍາພັກແຂວງປະທານກວດກາພັກ-ລັດແຂວງເຊກອງມີຄຳເຫັນໂອ້ລົມຕໍ່ກອງປະຊຸມຄັ້ງນີ້ວ່າ: ຄະນະພັກ, ການນຳແຕ່ລະຂັ້ນຕ້ອງເພີ່ມທະວີການຊີ້ນຳ-ນຳພາວຽກງານກວດກາໃຫ້ເປັນປົກກະຕິ, ຖືວຽກງານກວດກາເປັນໜ້າທີຄວາມຮັບຜິດຊອບໂດຍກົງຂອງຕົນ, ຕ້ອງຍົກສູງຄວາມເປັນເຈົ້າການ, ຄວາມຮັບຜິດຊອບໃນການຕິດຕາມກວດກາການຈັດຕັ້ງປະຕິບັດຜົນຂອງການກວດກາຢ່າງເຂັ້ມງວດ, ຖືກຕ້ອງ, ຊັດເຈນ ແລະ ມີຄວາມຍຸຕິທຳ, ເພື່ອຮັບປະກັນຄຸນນະພາບສູງ, ການຄຸ້ມຄອງບໍລິຫານລັດຖືກຕ້ອງຕາມລະບຽບກົດໝາຍບັນດາປະກົດການຫຍໍ້ທໍ້ຕ່າງໆແມ່ນໄດ້ຮັບການຄົ້ນຄ້ວາ ແລະ ແກ້ໄຂຢ່າງທັນການ.