ມີເດຍລາວແຂວງເຊກອງ ໂດຍ: ຄຳເພົ້າ ຮຸ່ງໄຊຍະວົງ
ຜ່ານການຝຶກອົບຮົມທິດສະດີການເມືອງ – ການປົກຄອງ ໄລຍະສັ້ນ 10 ວັນ ໃຫ້ເລຂາພັກ – ນາຍບ້ານ ທົ່ວເມືອງກະລຶມ ຊຸດທີ 1 ປີ 2021 ເລີ່ມແຕ່ວັນທີ 01 ມີນາ 2021 ຮອດ ວັນທີ 10 ມີນາ 2021 ການຝຶກອົບຮົມກໍໄດ້ປິດລົງຢ່າງເປັນທາງການ ເຊິ່ງໄດ້ຈັດຂຶ້ນໃນຕອນບ່າຍຂອງວັນທີ 10 ມີນາ 2021 ນີ້, ຢູ່ທີ່ສະໂມສອນ ປກສ ເມືອງ ໂດຍພາຍໃຕ້ການເປັນປະທານຂອງ ທ່ານ ອໍບົວລາ ອ່ອນມະໄລວົງ ກຳມະການພັກແຂວງ, ເລຂາພັກເມືອງ ເຈົ້າເມືອງ – ເມືອງກະລຶມ, ມີບັນດາ ຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ຄະນະກຳມະການຮັບຜິດຊອບການຝຶກອົບຮົມ, ຄູອາ – ຈານຈາກໂຮງຮຽນທິດສະດີການເມືອງການປົກຄອງແຂວງ, ເລຂາພັກ – ນາຍບ້ານ ທົ່ວເມືອງເຂົ້າຮ່ວມຢ່າງພ້ອມພຽງ.

ການຝຶກອົບຮົມທິດສະດີການເມືອງ – ເມືອງການປົກຄອງ ໄລຍະສັ້ນ 10 ວັນ ໃຫ້ແກ່ເລຂາພັກ – ນາຍບ້ານ ທົ່ວເມືອງກະລຶມ ຊຸດທີ 1 ປີ 2021 ແມ່ນດຳເນີນໄປຕາມຫຼັກສູດຂອງສະຖາບັນການເມືອງ – ການປົກຄອງແຫ່ງຊາດ ເຊິ່ງມີ 03 ກຸ່ມວິຊາ, ມີ 19 ບົດ, ເທົ່າກັບ 74 ຊົ່ວໂມງ. ໃນນັ້ນ, ກຸ່ມທີ 1 ທິດທາງລວມ ປະກອບມີ 4 ບົດ, ເທົ່າກັບ 14 ຊົ່ວໂມງ, ກຸ່ມທີ 2 ວຽກພັກ ປະກອບມີ 7 ບົດ, ເທົ່າກັບ 24 ຊົ່ວໂມງ ແລະ ກຸ່ມທີ 3 ການບໍລິຫານ ແລະ ການປົກຄອງ ປະກອບມີ 8 ບົດ, ເທົ່າກັບ 28 ຊົ່ວໂມງ, ການຝຶກອົບຮົມໃນຄັ້ງນີ້ມີນັກສຳມະນາກອນທັງໝົດ 48 ທ່ານ, ຍິງ 02 ທ່ານ, ຄະນະຮັບຜິດຊອບຈັດຝຶກອົບຮົມແມ່ນໄດ້ມີການປະສານງານໄດ້ເປັນຢ່າງດີ, ບັນດາຄູ – ອາຈານແຕ່ລະສະຫາຍໄດ້ມີຄວາມຮັບຜິດຊອບສູງ ເຊິ່ງມັນໄດ້ສະແດງໃຫ້ເຫັນແຕ່ລະສະຫາຍແມ່ນໄດ້ເອົາໃຈໃສ່ຄົ້ນຄວ້າທາງດ້ານທິດສະດີ ແລະ ພຶດຕິກຳຕົວຈິງມາສົມທຽບໃຫ້ນັກສຳມະນາກອນເຂົ້າໃຈໄດ້ງ່າຍ ເຊິ່ງສາມາດປະເມີນ ແລະ ຕີລາ ຈັດປະເພດນັກສຳມະນາກອນໃນຄັ້ງນີ້ໄດ້ ປະເພດດີເລີດມີ 11 ທ່ານ, ປະເພດດີ 34 ທ່ານ, ປານກາງ 03 ທ່ານ. ພ້ອມທັງມອບໃບຢັ້ງຢືນການຮຽນທິດສະດີການເມືອງ – ການປົກຄອງໃຫ້ແກ່ນັກສຳມະກອນ ເຊິ່ງມອບໂດຍທ່ານ ອໍບົວລາ ອ່ອນມະໄລວົງ ກຳມະການພັກແຂວງ, ເລຂາພັກເມືອງ ເຈົ້າເມືອງ – ເມືອງກະລຶມ, ໃນພິທີຄັ້ງນີ້ ກໍໄດ້ມີການມອບ ໃບຢັ້ງຍືນຮັບຮອງເອົາບ້ານສາມັກຄີປອງດອງ ຈຳນວນ 14 ບ້ານ ແລະ ປະດັບຫຼຽນກາ 70 ປີ ແລະ ໃບຍ້ອງຍໍ ຈຳນວນ 20 ບ້ານ ເຊິ່ງກ່າວມອບໂດຍທ່ານ ນາງ ອິນຄຳ ໄຊຍະງານ ຄະນະປະຈຳພັກເມືອງ, ປະທານແນວລາວສ້າງຊາດເມືອງ.


ຕອນທ້າຍ ທ່ານ ອໍບົວລາ ອ່ອນມະໄລວົງ ກຳມະການພັກແຂວງ, ເລຂາພັກເມືອງ ເຈົ້າເມືອງ – ເມືອງກະລຶມ ໄດ້ສະແດງຄວາມຊົມເຊີຍຕໍ່ຜົນງານ ແລະ ຜົນສຳເລັດຂອງການຝຶກອົບຮົມໃນຄັ້ງນີ້ ແລະ ໄດ້ມີຄຳເຫັນເນັ້ນໜັກໃຫ້ເອົາໃຈໃສ່ສືບຕໍ່ຈັດຕັ້ງຜັນຂະຫຍາຍເປັນວຽກງານທີ່ສຳຄັນ ແລະ ຕິດພັນກັບການຫັນເປັນແບບແຜນ, ແຜນການອັນລະອຽດເຂົ້າໃນການຈັດຕັ້ງປະຕິບັດວຽກງານຕົວຈິງ, ເພື່ອແກ້ໄຂປະກົດການຫຍໍ້ທໍ້ໃຫ້ຫຼຸດໜ້ອຍຖ່ອຍລົງເທື່ອລະກ້າວ ແລະ ຮຽກຮ້ອງໃຫ້ເລຂາພັກບ້ານ – ນາຍບ້ານ ຈົ່ງພ້ອມກັນເອົາໃຈໃສ່ສືບຕໍ່ສຶກສາອົມຮົມການເມືອງແນວຄິດ, ປັບປຸງຊີວິດການເປັນຢູ່ຂອງພໍ່ແມ່ປະຊາຊົນບັນດາເຜົ່າໃຫ້ດີຂຶ້ນ, ສັງຄົມມີຄວາມເປັນລະບຽບຮຽບຮ້ອຍ, ນຳເອົາບັນດາເນື້ອໃນຈິດໃຈບົດຮຽນທີ່ຖອດຖອນໄດ້ໃນຄັ້ງນີ້ ໄປຈັດຕັ້ງຜັນຂະຫຍາຍໃຫ້ເກີດດອກອອກຜົນເປັນຮູບປະຖຳຕົວຈິງ.