ມີເດຍລາວແຂວງເຊກອງ ຂ່າວ: ບູ້ສຸວັນ.
ໃນລະຫວ່າງວັນທີ 17-18 ມິຖຸນາ 2021; ຢູ່ທີ່ສະໂມສອນໃຫຍ່ຂອງຫ້ອງວ່າການແຂວງ, ພະແນກກະສິກໍາ-ປ່າໄມ້ ແຂວງເຊກອງ ໄດ້ຈັດກອງປະຊຸມເຊື່ອມຊຶມມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງເຊກອງ ໂດຍການເປັນປະທານຂອງ ສະຫາຍ ຂັນຕີ ສີລະວົງສາ ກໍາມະການປະຈໍາພັກແຂວງ ຮອງເຈົ້າແຂວງ-ແຂວງເຊກອງ ມີສະຫາຍ ສົມຫວັງ ຂຳມະວົງ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກກະສິກໍາ-ປ່າໄມ້ ແຂວງເຊກອງ; ພ້ອມນີ້ ກໍມີບັນດາສະຫາຍຄະນະພັກ-ຄະນະພະແນກ, ສະມາຊິກພັກ-ພະນັກງານ-ລັດຖະກອນ ທັງໝົດທົ່ວພະແນກດັ່ງກ່າວເຂົ້າຮ່ວມ.

ການຈັດຕັ້ງເຊື່ອມຊຶມຄັ້ງນີ້ ກໍເພື່ອໃຫ້ສະມາຊິກພັກ-ພະນັກງານຮັບຮູ້ເຂົ້າໃຈຢ່າງເລິກເຊິ່ງ ແລະກຳແໜ້ນເນື້ອໃນມະຕິ XI ຂອງສູນກາງພັກ, ມະຕິ X ຂອງອົງຄະນະພັກແຂວງ ກໍ່ຄືແຜນພັດທະນາວຽກງານກະສິກໍາ-ປ່າໄມ້, ວຽກງານພັດທະນາຊົນນະບົດ 5 ປີ ຄັ້ງທີ VIII ແລະ ແຜນການ 5 ປີ ຄັ້ງທີ IX (2021-2025) ເຊິ່ງໄດ້ກໍານົດວິໃສທັດ, ຍຸດທະສາດ ແລະ ແຜນພັດທະນາວຽກງານກະສີກໍາ-ປ່າໄມ້ ໂດຍຢຶດປະຕິບັດນະໂຍບາຍສົ່ງເສີມເສດຖະກິດເອກະຊົນທັງພາຍໃນ ແລະຕ່າງປະເທດ ປັບປຸງ ແລະສ້າງເງື່ອນໄຂສະພາບແວດລ້ອມເພື່ອກະຕຸ້ນການດໍາເນີນທຸລະກິດຂອງພາກສ່ວນເສດຖະກິດຂະໜາດກາງ, ຂະໜາດນ້ອຍ, ໃຫຍ່ໃນຂົງເຂດກະສີກໍາ, ອຸດສະຫະກໍາ ແລະການປຸງແຕ່ງກະສີກໍາ, ການບໍລິການ, ສຸມໃສ່ແກ້ໄຂຄວາມທຸກຍາກຂອງປະຊາຊົນດ້ວຍມາດຕະການສົ່ງເສີມການຜະລິດ ( ການປຸກ, ການລ້ຽງ )ເປັນສີນຄ້າ ແລະຮັບປະກັນດ້ານໂພຊະນາການ ພັດທະນາກະສີກໍາແບບປະສົມປະສານຮັບປະກັນຄວາມໝັ້ນຄົງດ້ານສະບຽງອາຫານ, ປົກປັກຮັກສາຊີວະນາໆພັນ ຊັບພະຍາກອນປ່າໄມ່ໃຫ້ມີຄວາມຍືນຍົງ, ຄຽງຄູ່ກັນນີ້ກໍ່ຕ້ອງເລັ່ງຈັດສັນທີ່ດີນກະສີກໍາເພື່ອຮັບປະກັນການຜະລິດສະບຽງອາຫານ, ຜະລິດສີນຄ້າກະສີກໍາທີ່ມີທ່າແຮງຕາມທິດພັດທະນາກະສີກໍາສະອາດ, ປອດໄພ, ທັນສະໄໝ ແລະ ຍືນຍົງ ບົນພື້ນຖານການຫັນເປັນອຸດສະຫະກໍາ ແລະທັນສະໄໝ ຕິດພັນກັບການພັດທະນາຊົນະບົດ ແລະພັດທະນາປ່າໄມ້ເພື່ອເປັນບ່ອນສະໜອງວັດຖູດີບທີ່ບໍ່ບົກແຫ້ງ ເພື່ອປະກອບສ່ວນສ້າງພື້ນຖານເສດຖະກິດແຫ່ງຊາດ.

ສ່ວນແຜນພັດທະນາເສດຖະກິດ-ສັງຄົມ 5 ປີຕໍ່ໜ້າແມ່ນເລັ່ງພັດທະນາເສດຖະກິດມະຫາພາກໃຫ້ມີຄວາມເຂັ້ມແຂງ ສູ້ຊົນເຮັດໃຫ້ອັດຕາການຂະຫຍາຍຕົວ ລວມຍອດຂອງຜະລິດຕະພັນພາຍໃນ ( GDP ) ເພີ່ມຂື້ນ 7% ຕໍ່ປີ ແລະຮອດປີ 2025ເຮັດໃຫ້ມູນຄ່າລວມຍອດຜະລິດຕະພັນພາຍໃນ( GDP ) ບັນລຸ 2.821 ຕື້ກີບ ມີລາຍໄດ້ສະເລ່ຍໃສ່ຫົວຄົນບັນລຸ 20,70 ລ້ານກີບ ຫຼືປະມານ 2.300 ໂດລາ ( ປີ 2020 ບັນລຸ 1.728 ໂດລາ) ໃນນັ້ນຂະແໜງກະສີກໍາປ່າໄມ້ ເພີ່ມຂື້ນ 7% ກວມເອົາ 41,7% ( ໃນປີ 2020ເພີ່ມຂື້ນ 6,7% ກວມເອົາ 40,49% ) ສ່ວນອັດຕາການແກ້ໄຂຄວາມທຸກຍາກຂອງປະຊາຊົນສູ້ຊົນເຮັດໃຫ້ອັດຕາຄອບຄົວທຸກຍາກຈາກ 11.889 ຄອບຄົວ ເຊີ່ງກວມເອົາ 49,76% ໃຫ້ຫຼຸດລົງເຫຼືອ 7.244 ຄອບຄົວ ກວມເອົາ 30,30% ຂອງຄອບຄົວທັງໝົດ, ສູ້ຊົນເຮັດໃຫ້ອັດຕາບ້ານທຸກຍາກຈາກ 166 ບ້ານກວມເອົາ 84,26% ໃຫ້ຫຼຸດລົງຍັງເຫຼືອ 95 ບ້ານ, ກວມເອົາ 42,22% ຂອງບ້ານທຸກຍາກທັງໝົດ.