ມີເດຍລາວແຂວງຫຼວງນ້ຳທາ ວັນທີ 14 ກັນຍາ 2021 ຢູ່ທີ່ຫ້ອງວ່າການ ແຂວງຫລວງນໍ້່ທາ ໄດ້ຈັດກອງປະຊຸມສຳມະນາ ( ຜ່ານລະບົບວີດີໂອ ) ການກະກຽມຄວາມພ້ອມໃນການພັດທະນາຄວາມສຳພັນ ລະຫວ່າງປະເທດ ຕາມເສັ້ນທາງ R3A ຫລັງສະຖານະການແຜ່ລະບາດຂອງພະຍາດໂຄວິດ-19. ເຂົ້າຮ່ວມໂດຍ ທ່ານ ອ່ອນຈັນ ຄໍາພາວົງ ຮອງເຈົ້່ແຂວງໆຫລວງນໍ້່່າທາ, ມີຮອງເຈົ້າແຂວງຊຽງລາຍ ຣາຊະອານາຈັກໄທ, ຮອງເຈົ້າແຂວງບໍ່ແກ້ວ ແລະ ຕາງຫນ້າຈາກແຂວງຢຸນນານ ສປ ຈີນ, ຜູ້ແທນກອງປະຊຸມຈາກ ສປປ ລາວ, ຣາຊະອານາຈັກໄທ ແລະ ສປ ຈີນ ເຂົ້າຮ່ວມ.

ເພື່ອກຽມຄວາມພ້ອມໃນການພັດທະນາຄວາມສຳພັນລະດັບທ້ອງຖິ່ນ ລະຫວ່າງ 3 ປະເທດຕາມເສັ້ນທາງ R3A ຫລັງສະຖານະການແຜ່ລະບາດຂອງພະຍາດໂຄວິດ-19. ໄດ້ກໍານົດ 8 ວຽກຈຸດສຸມບູລິມະສິດຂອງແຂວງເປັນຕົ້ນ: ສືບຕໍ່ດືງດູດການລົງທືນ ທີ່ມີຄຸນນະພາບ, ສົ່ງເສີມການບໍລິການທາງຜ່ານ ໂລຈິສຕິກ-ສາງຄ່ຽນຖ່າຍ ຮອງຮັບທາງລົດໄຟ ທີ່ຈະເປີດ ໃນວັນທີ 2/12/2021 ແລະ ທາງດ່ວນໃນອານາຄົດ, ພັດທະນາການທ່ອງທ່ຽວ ໂດຍການສົ່ງເສີມການທ່ອງທ່ຽວພາຍໃນ ແລະ ພາກພື້ນ, ນໍາໃຊ້ທ່າແຮງ 4 ທົ່ງພຽງຂອງແຂວງ, ຄຸ້ມຄອງທີ່ດີນ ແລະ ພັດທະນາທີ່ດີນໃຫ້ເກີດປະໂຫຍດສູງສຸດ ເປັນຖານລາຍຮັບງົບປະມານ, ປົກປັກຮັກສາສິ່ງແວດລ້ອມ 3 ປະເພດປ່າ ( ເພື່ອດືງດູດນັກທ່ອງທ່ຽວ ), ພັດທະນາຊັບຍາກອນມະນຸດ ແລະ ພັດທະນາເຂດພິເສດ ໃຫ້ເປັນບ່ອນສ້າງວຽກເຮັດງານທຳໃຫ້ສັງຄົມ.

ເຊິ່ງໃນການຮອງຮັບໃນຕໍ່ຫນ້າລັດຖະບານໄດ້ມີການພັດທະນາພື້ນຖານໂຄງລ່າງໃໝ່ເຊັ່ນ: ໂຄງການກໍ່ສ້າງເສັ້ນທາງລົດໄຟລາວ-ຈີນ, ການກໍ່ສ້າງທາງດ່ວນ ບໍ່ເຕ່ນ-ນະຄອນຫລວງວຽງຈັນ, ທາງດ່ວນບໍ່ເຕ່ນ-ຫ້ວຍຊາຍ ຖ້າບັນດາໂຄງການເຫລົ່່ານີ້ໄດ້ກໍ່ສ້າງສຳເລັດແມ່ນຈະເຮັດໃຫ້ການເຊື່ອມໂຍງ ແລະ ຂົນສົ່ງສິນຄ້າມີຄວາມສະດວກສະບາຍເພີ່ມຂີ້ນຢ່າງຫລວງຫລາຍ ພ້ອມທັງເຮັດໃຫ້ມູນຄ່າການຈໍລະຈອນສິນຄ້າ, ມູນຄ່າສິນຄ້ານຳເຂົ້າ-ສົ່ງອອກເພີ່ມຂຶ້ນ ຈະສ້າງຄວາມມັ່ງຄັ່ງໃຫ້ແກ່ບັນດາປະເທດບໍ່ຫລາຍກໍ່ໜ້ອຍ.

ນອກນັ້ນ ຍັງໄດ້ພັດທະນາລະບົບຄົມມະນາຄົມຂົນສົ່ງ, ກໍ່ສ້າງສູນເຕົ້າໂຮມ ແລະ ແຈກຢາຍສິນຄ້າ ທີ່ມີຄຸນນະພາບ ແລະ ມີຄວາມສະດວກຢູ່ເຂດບ້ານນາເຕີຍ, ບໍ່ເຕ່ນ ເພື່ອກາຍເປັນສູນກາງໃນກິດຈະການບໍລິການຜ່ານ ຂອງອານຸພາກພື້ນ ໃນປັດຈຸບັນ ແຂວງຫລວງນໍ້າທາມີຈຸດຄ່ຽນຖ່າຍສິນຄ້າ 2 ບໍລິສັດຄື: ສາງຄ່ຽນຖ່າຍ ແອວເອສ ແລະ ແອວໄອຊີດີ. ອີກບໍ່ດົນນີ້ລັດຖະບານ ສປປ ລາວ ຈະໄດ້ເຊັນສັນຍາ ແລະ ອະນຸຍາດໃຫ້ ບໍລິສັດ ອຳມະຕະຄໍໂປຼເລຊັນ ຈຳກັດ ເປັນຜູ້ລົງທືນສ້າງໂຄງການພັດທະນາທາງບົກ ແລະ ເຂດໂລຈິສຕິກ ຢູ່ນາເຕີຍ. ແຂວງຫລວງນໍ້່າທາ ,ໃນປີ 2020 ມີມູນຄ່າສິນຄ້າຜ່ານແດນ 202 ລ້ານໂດລາ, ສິນຄ້າສົ່ງອອກທັງຫມົດ 56 ລ້ານໂດລາ, ນໍາເຂົ້າ 1.215 ລ້ານໂດລາ ໃນນີ້ ນຳເຂົ້າຊົມໃຊ້ພາຍໃນແຂວງ 112 ລ້ານໂດລາ.