ມີເດຍລາວແຂວງເຊກອງ
ໃນຕອນເຊົ້າວັນທີ 12 ຕຸລາ 2021 ນີ້,ຢູ່ຕໍ່ໜ້າອະນຸສາວະລີ ການນໍາພັກ-ລັດເມືອງທ່າແຕງ ນຳໂດຍ ທ່ານ ສົມເພັດ ເອີດລັດດາ ກຳມະການພັກແຂວງ, ເລຂາພັກເມືອງເຈົ້າເມືອງທ່າແຕງ, ພ້ອມດ້ວຍຄະນະບໍລິຫານງານພັກເມືອງ,ພະນັກງານອາວຸໂສປະຕິວັດ, ກໍາລັງປ້ອງກັນຊາດ-ປ້ອງກັນຄວາມສະຫງົບ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ ແລະ ອົງການປົກຄອງບ້ານເທດສະບານເມືອງໄດ້ລະນຶກເຖິງຄຸນງາມຄວາມດີຂອງປະທານໄກສອນພົມວິຫານຜູ້ນໍາທີ່ເຄົາລົບຮັກຂອງປວງຊົນລາວທັງຊາດເນື່ອງໃນໂອກາດສະເຫຼີມສະຫຼອງວັນສ້າງຕັ້ງລັດຖະທໍາມະນູນແຫ່ງຊາດຄົບຮອບ 30 ປີໂດຍການວາງກະຕ່າດອກໄມ້ ແລະ ຈູດທູບທຽນບູຊາ.

ໂອກາດນີ້ ທ່ານ ສົມເພັດ ເອີດລັດດາ ຕາງຫນ້າການນໍາພັກ-ລັດເມືອງທ່າແຕງ ໄດ້ໃຫ້ຄໍາປະຕິຍານວ່າ ຈະນໍາພາ ແລະ ເສີມຂະຫຍາຍມູນເຊື້ອ, ຜົນງານ, ຄຸນງາມຄວາມດີຂອງທ່ານປະທານໄກສອນເຂົ້າໃນພາລະກິດປົກປັກຮັກສາ ແລະສ້າງສາປະເທດຊາດເວົ້າລວມ,ສະເພາະກໍ່ຄືເມືອງທ່າແຕງ ໃຫ້ມີຄວາມເຂັ້ມແຂງ, ສັງຄົມມີຄວາມສະຫງົບສຸກ, ປະຊາຊົນມີຄວາມສາມັກຄີປອງດອງ, ມີຄວາມຜາສຸກ, ມີປະຊາທິປະໄຕ, ມີຄວາມຍຸຕິທໍາ ແລະສີວິໄລ, ພ້ອມກັນຮໍ່າຮຽນເອົາແນວຄິດຄຸນສົມບັດສິນທໍາປະຕິວັດຂອງປະທານໄກສອນ ພົມວິຫານ, ສືບຕໍ່ຢ່າງແຂງແຮງໃນການປະຕິບັດຫນ້າທີ່ວຽກງານນິຕິບັນຍັດ ກໍຄືວຽກງານສະພາໃຫ້ເປັນຕົວແທນແຫ່ງສິດຜົນປະໂຫຍດຂອງປະຊາຊົນຢ່າງແທ້ຈິງ.
ທັງນີ້, ກໍເພື່ອເປັນການສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນ ເຖິງຄຸນງາມຄວາມດີ, ນ້ຳໃຈຕໍ່ສູ້ຢ່າງພິລະອາດຫານ ແລະບໍ່ຍອມຈໍານົນຂອງບັນພະບູລຸດລາວ ທີ່ເສຍສະຫຼະຊີວິດ, ເລືອດເນື້ອເພື່ອພາລະກິດປະຕິວັດ ຢ່າງອົງອາດກ້າຫານ ພາຍໃຕ້ການຊີ້ນຳ – ນຳພາ ຂອງພັກປະຊາຊົນປະຕິວັດລາວ ຈົນສາມາດຍາດໄດ້ໄຊຊະນະ ແລະປະກາດເອກະລາດ, ສະຖາປະນາເປັນສາທາລະ ນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975
ຂ່າວ: ເຈີນ ແດນວົງວິຈິດ