ເມື່ອບໍ່ນານມານີ້, ຢູ່ບ້ານແສນອຸດົມ ເມືອງຊຽງເງິນ ແຂວງຫລວງພະບາງ, ການນຳເມືອງຊຽງເງິນ ນຳໂດຍ ທ່ານ ສົມແວວເພັດ ດວງປະ ສິດ ເຈົ້າເມືອງຊຽງເງິນ, ພ້ອມດ້ວຍຫ້ອງການທີ່ກ່ຽວຂ້ອງ ໄດ້ນຳເອົາເຄື່ອງຊ່ວຍເຫລືອຕ້ານໄພໜາວໄປມອບໃຫ້ປະຊາຊົນ ພາຍໃນບ້ານແສນອຸດົມໂດຍສະເພາະແມ່ນຄອບຄົວທີ່ທຸກຍາກຂາດເຂີນ. ເຄື່ອງທີ່ນຳໄປມອບໃຫ້ໃນຄັ້ງນີ້ ມີ 14 ຄອບຄົວ, ມີ 87 ຊຸດ, ລວມມູນຄ່າທັງໝົດ 3 ລ້ານກວ່າກີບ ປະກອບມີ: ເສື້ອ, ສົ້ງ ແລະ ເຄື່ອງຈຳນວນໜຶ່ງ ທີ່ໄດ້ຮັບຈາກຫລາຍພາກສ່ວນທີ່ໃຫ້ການຊ່ວຍເຫລືອ. ເພື່ອເປັນການຊ່ວຍເຫລືອບັນເທົາໜາວ ແລະ ບັນເທົາທຸກ ໃຫ້ຄອບຄົວທີ່ທຸກຍາກພາຍໃນເມືອງຊຽງເງິນ ໃຫ້ມີຄວາມອົບອຸ່ນ ແລະ ສຸຂະພາບທີ່ດີ.

ໂອກາດລົງຢ້ຽມຢາມໃນຄັ້ງນີ້, ທ່ານ ສົມແວວເພັດ ດວງປະສິດ ເຈົ້າເມືອງຊຽງເງິນ ຍັງໄດ້ເນັ້ນຫລາຍບັນຫາ ຕໍ່ການຈັດຕັ້ງບ້ານ ເປັນຕົ້ນແມ່ນ ຈະຕ້ອງໄດ້ສືບຕໍ່ເອົາໃຈໃສ່ໂດຍສະເພາະແມ່ນການຈັດຕັ້ງບ້ານຍັງບໍ່ທັນເຂັ້ມແຂງ, ການສະກັດກັນ ແລະ ຕ້ານປະກົດການຫຍໍ້ທໍ້, ຢາເສບຕິດ, ດ້ານສຸຂະອະນາໄມ ແລະ ຄວາມສາມັກຄີປອງດອງພາຍໃນໃຫ້ມີຄວາມໜັກແໜ້ນ ພ້ອມກັນພັດທະນາບ້ານໃຫ້ມີຄວາມຈະເລີນກ້າວໜ້າໄປເລື້ອຍໆ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)