ມີເດຍລາວແຂວງຄຳມ່ວນ ວັນທີ 11 ຕຸລາ 2021 ຢູ່ທີ່ຫ້ອງວ່າການແຂວງຄຳມ່ວນທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19 ຂັ້ນແຂວງພ້ອມດ້ວຍຄະນະໄດ້ຮັບຕ້ອນຄະນະປະຕິບັດງານພິເສດກໍ່ຄືຄະນະຊ່ຽວຊານແພດໝໍຈາກແຂວງກວາງບິ່ງ ສ.ສ ຫວຽດນາມທີ່ມາເຄື່ອນໄຫວຊ່ວຍເຫຼືອໃນການກວດຫາເຊື້ອພະຍາດໂຄວິດ – 19 ເພື່ອຄວບຄຸມບໍ່ໃຫ້ຂະຫຍາຍໄປສູ່ວົງກວ້າງເຊິ່ງນຳໂດຍທ່ານ ຫງວຽນແທ໋ງຊວນ ຮອງຫົວໜ້າພະແນກພົວພັນການຕ່າງປະເທດ ແຂວງກວາງບິ່ງ ສ.ສ ຫວຽດນາມ.

ໃນພິທີດັ່ງກ່າວທ່ານ ບຸນມີ ພິມມະສອນ ປະທານສະພາປະຊາຊົນແຂວງ , ຫົວໜ້າຄະນະສະເພາະກິດ ເພື່ອປ້ອງກັນ , ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19 ຂັ້ນແຂວງກໍ່ໄດ້ລາຍງານສະພາບລວມການແຜ່ລະບາດຂອງພະຍາດໂຄວິດ-19 ພາຍໃນແຂວງໂດຍສັງເຂບເຊິ່ງແຂວງຄຳມ່ວນມີເນື້ອທີ່ທັງໝົດ 16.315 ກິໂລຕາແມັດ , ມີປະຊາກອນທັງໝົດ 439.634 ຄົນ, ຍິງ 219.151 ຄົນ , ມີ 10 ຕົວເມືອງ ແລະ ມີ 569 ບ້ານ.

ນັບແຕ່ວັນທີ 01 ມັງກອນ 2021 ຮອດວັນທີ 11 ຕຸລາ 2021 ມີຜູ້ຕິດເຊື້ອສະສົມທັງໝົດໃນທົ່ວແຂວງຈຳນວນ 2.618 ຄົນ, ຍິງ 1.139 ຄົນ .ໃນນັ້ນປິ່ນປົວຫາຍດີແລ້ວຈຳນວນ 1.985 ຄົນ , ກຳລັງປິ່ນປົວ 632 ຄົນ , ຍິງ 126 ຄົນ. ທົ່ວແຂວງຄຳມ່ວນມີ 07 ສູນປິ່ນປົວ, 04 ສູນກັກກັນຂອງແຂວງ ແລະ 09 ສູນກັກກັນຢູ່ບັນດາເມືອງ , ມີຜູ້ເຂົ້າກັກກັນສະສົມທັງໝົດຈຳນວນ 4.517 ຄົນ , ຍິງ 2.122 ຄົນ , ກັກກັນຄົບກຳນົດ 4.250 ຄົນຍັງກັກກັນຢູ່ສູນ 267 ຄົນ, ຍິງ 75 ຄົນ , ເສຍຊີວິດສະສົມ 01 ກໍລະນີ .

ສຳລັບບ້ານທີ່ຖືກກຳນົດເປັນບ້ານແດງທັງໝົດໃນຜ່ານມາມີ 46 ບ້ານໃນ 06 ຕົວເມືອງ. ມາຮອດປັດຈຸບັນແມ່ນຫຼຸດລົງເຫຼືອ 27 ບ້ານໃນ 04 ຕົວເມືອງ , ມີບ້ານເຫຼືອງ 05 ບ້ານໃນ 03 ຕົວເມືອງ. ກ່ຽວກັບການສັກວັກຊິນແຂວງຄຳມ່ວນໄດ້ຮັບວັກຊິນຈາກສູນກາງ 05 ຄັ້ງຄື: ວັກຊິນຊີໂນຟາມຈຳນວນ 157.400 ໂດສ໌, ແອັດຕຣາເຊນີກາຈຳນວນ 75.120 ໂດສ໌ ແລະ ວັກຊິນຈອນສັນແອນຈອນສັນ ຈຳນວນ 62.800 ໂດສ໌. ໄດ້ສັກໃຫ້ພະນັກງານ, ທະຫານ, ຕຳຫຼວດ, ແມ່ຍິງຖືພາ, ແມ່ຍິງກຳລັງລ້ຽງລູກດ້ວຍນົມ ແລະ ພໍ່ແມ່ປະຊາຊົນມາຮອດປັດຈຸບັນເຂັມທີ 01 ມີຈຳນວນ 186.382 ຄົນ ແລະ ເຂັມທີ 02 ມີຈຳນວນ 125.551 ຄົນ. ທຽບໃສ່ພົນລະເມືອງໃນທົ່ວແຂວງ ເຂັມທີ 01 ກວມ 42.4% ແລະ ເຂັມທີ 02 ກວມ 28.6%.

ສຳລັບບໍລິສັດທີ່ມີຜູ້ຕິດເຊື້ອຫຼາຍກວ່າໝູ່ແມ່ນບໍລິສັດລາວຄາຍຢວນ ບໍ່ແຮ່ຈຳກັດ ມີພະນັກງານທັງໝົດ 1.102 ຄົນ ມາຮອດປັດຈຸບັນໄດ້ເກັບຕົວຢ່າງທັງໝົດ 957 ຄົນ, ກວດພົບເຊື້ອ 515 ກໍລະນີ, ຄົນລາວ 305 ກໍລະນີ ແລະ ຄົນຈີນ 210 ກໍລະນີ. ຈຳນວນຜູ້ຕິດເຊື້ອທີ່ເປັນຄົນລາວຈຳນວນ 305 ກໍລະນີ ແມ່ນໄດ້ນຳເຂົ້າສູນປິ່ນປົວຂອງແຂວງແລ້ວ 200 ກວ່າກໍລະນີ ແລະ ກຳລັງສືບຕໍ່ນຳເອົາກໍລະນີຜູ້ຕິດເຊື້ອທີ່ເປັນຄົນລາວເຂົ້າສູນປິ່ນປົວຂອງແຂວງທັງໝົດ. ສ່ວນພະນັກງານ, ກຳມະກອນທີ່ເປັນຄົນຈີນ ແມ່ນປິ່ນປົວຢູ່ບໍລິສັດ.
ສຳລັບການຊ່ວຍເຫຼືອຂອງເພື່ອນຫວຽດນາມໃນໄລຍະຜ່ານມາ ແຂວງຄຳມ່ວນກໍ່ໄດ້ຮັບການຊ່ວຍເຫຼືອຈາກແຂວງກວາງບິ່ງ, ແຂວງຮ່າຕິ່ງ ແລະ ສະຫະບໍລິສັດ COECCO ເປັນເງິນສົດຈຳນວນ 400.000.000 ດົງ ແລະ ເປັນວັດຖຸອຸປະກອນຮັບໃຊ້ມູນຄ່າ 2.522.500.000 ດົງປະກອບມີ: ເຄື່ອງຊ່ວຍຫາຍໃຈ, ເຄື່ອງຈັກຜະລິດອົກຊີ, ເຄື່ອງວັດອຸນຫະພູມ , ເຄື່ອງພົ່ນຢາຂ້າເຊື້ອ, ເຄື່ອງຊຸດ PPE, ຜ້າປິດປາກ, ເຈວລ້າງມື, ນ້ຳຢາຂ້າເຊື້ອ ແລະ ເຄື່ອງບໍລິໂພກ-ອຸປະໂພກເປັນຕົ້ນ.

ການຊ່ວຍເຫຼືອຂອງແຂວງກວາງບິ່ງໃນຄັ້ງນີ້ ນອກຈາກສົ່ງທີມງານມາຊ່ວຍເຫຼືອທາງດ້ານວິຊາການໃນການກວດຫາເຊື້ອພະຍາດ ໂຄວິດ-19 ແລ້ວ ຍັງໄດ້ນຳເອົາເຄື່ອງກວດ PCR, ຕູ້ປອດເຊື້ອ ຂັ້ນ2 ແລະ ອຸປະກອນການແພດ ທີ່ກ່ຽວຂ້ອງມາຊ່ວຍເຫຼືອ ເພື່ອແນ່ໃສ່ຈຳກັດການແຜ່ເຊື້ອ ແລະ ກ້າວໄປສູ່ການຄວບຄຸມເຊື້ອພະຍາດໃຫ້ເຂົ້າສູ່ສະພາບປົກະຕິ. ສະນັ້ນ, ການຊ່ວຍເຫຼືອຂອງເພື່ອນຫວຽດນາມ ເວົ້າສະເພາະການຊ່ວຍເຫຼືອຂອງແຂວງກວາງບິ່ງໃນຄັ້ງນີ້ ແມ່ນສະແດງເຖິງນ້ຳໃຈອັນບໍລິສຸດ, ເດັດດ່ຽວ, ຄວາມເປັນຫ່ວງເປັນໄຍ ແລະ ການຮ່ວມຕໍ່ສູ້ຢ່າງຄຽງບ່າຄຽງໄລ່ຂອງເພື່ອນຫວຽດນາມຢ່າງຈິງໃຈ ບໍ່ວ່າຈະຢູ່ໃນສະຖານະການຫຍຸ້ງຍາກ ກໍ່ຄືໄລຍະຕໍ່ສູ້ກັບພະຍາດໂຄວິດ 19 ໃນປັດຈຸບັນ.