ມີເດຍລາວແຂວງຈຳປາສັກ ຂ່າວ: ທັດຊະນະ ວັນທີ 1 ພຶດສະພາ 2021, ການນຳແຂວງຈຳປາສັກ ນຳໂດຍ ທ່ານ ສົມບູນ ເຮືອງວົງສາ ຄະນະປະຈໍາພັກແຂວງ, ຮອງເຈົ້າແຂວງຈຳປາສັກ, ທ່ານ ປະດິດ ວັນນະລັດສະໝີ ຄະນະປະຈໍາພັກແຂວງ, ປະທານກວດກາພັກ-ລັດ ແຂວງ, ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ, ຮອງປະທານສະພາປະຊາຊົນ ແຂວງຈຳປາສັກ ໄດ້ລົງເຄື່ອນໄຫວ ຕິດຕາມ, ກວດກາ ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດຂອງພະຍາດ ໂຄວິດ-19 ຢູ່ບັນດາເມືອງ ມີ 3 ເມືອງຄື: ເມືອງສຸຂຸມາ, ເມືອງບາຈຽງຈະເລີນສຸກ ແລະເມືອງປາກຊ່ອງ. ໂດຍການຕ້ອນຮັບ ຂອງທ່ານເຈົ້າເມືອງ ພ້ອມດ້ວຍ ຄະນະສະເພາະກິດ ປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂອງເມືອງ ທັງ 3 ເມືອງ, ມີການນຳພະແນກການ ແລະພາກສ່ວນທີ່ກ່ຽວຂ້ອງ ຂອງແຂວງ ແລະເມືອງ ເຂົ້າຮ່ວມ.

ໃນການມາເຄື່ອນໄຫວໃນເທື່ອນີ້ ກໍ່ແມ່ນເພື່ອຕິດຕາມ ແລະເລັງເຫັນຄວາມສຳຄັນຂອງວຽກງານດັ່ງກ່າວ. ທັງເປັນການ ເພີ່ມທະວີ ຄວາມຮັບຜິດຊອບ ຂອງຄະນະພັກແຕ່ລະຂັ້ນ ໃນການສືບຕໍ່ສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19, ພ້ອມກັນນັ້ນ ກໍ່ເພື່ອຕິດຕາມ ການຈັດຕັ້ງປະຕິບັດ ຄໍາສັ່ງເພີ້ມເຕີມ ຂອງທ່ານເຈົ້າແຂວງຈຳປາສັກ ສະບັບເລກທີ 04/ຈຂ.ຈສ, ລົງວັນທີ 23 ເມສາ 2021, ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ COVID-19 ໃນຂອບເຂດ ທົ່ວແຂວງ, ເວົ້າສະເພາະ ແມ່ນ ຢູ່ບັນດາເມືອງເຊິ່ງມາຮອດປັດຈຸບັນ ທົ່ວແຂວງ ມີຜູ້ຕິດເຊື້ອພະຍາດໂຄວິດ-19 ລວມທັງຫມົດ 109 ຄົນ, ໃນນັ້ນ ປົວດີແລ້ວ 2 ຄົນ ແລະ ຍັງສືບຕໍ່ປິ່ນປົວ 107 ຄົນ, ສຳລັບ ສະພາບລວມການລະບາດຖືວ່າເປັນວົງກວ້າງ ແລະ ຍັງມີທ່າອ່ຽງທີ່ຈະເພີ່ມຂຶ້ນສູງ.

ແລະ ໃນໂອກາດມາເຄື່ອນໄຫວຂອງຄະນະນຳແຂວງຈຳປາສັກ ໃນເທື່ອນີ້ ແມ່ນໄດ້ນຳເອົາ ອຸປະກອນການແພດ, ເຄື່ອງອຸປະໂພກ-ບໍລິໂພກ ອື່ນໆ ທີ່ຈຳເປັນ ແລະເງິນສົດມອບໃຫ້ ເມືອງລະ 30 ລ້ານກີບ ເພື່ອຮັບໃຊ້ເຂົ້າໃນວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການລະບາດ ພະຍາດໂຄວິດ-19 ຂອງເມືອງ, ມອບໂດຍ ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ກ່າວຮັບໂດຍ ທ່ານເຈົ້າເມືອງ ດັ່ງກ່າວ, ມີການນຳພະແນກການ ແລະພາກສ່ວນທີ່ກ່ຽວຂ້ອງ ຂອງແຂວງ ແລະເມືອງ ເຂົ້າຮ່ວມເປັນພະຍານ.