ມີເດຍລາວແຂວງຈຳປາສັກ ຂ່າວ: ທັດຊະນະ ວັນທີ 13 ພຶດສະພາ 2021 ຜ່ານມານີ້, ການນໍາແຂວງຈໍາປາສັກ ນໍາໂດຍທ່ານ ສົມບູນ ເຮືອງວົງສາ ຮອງເຈົ້າແຂວງຈໍາປາສັກ, ຜູ້ຊີ້ນຳວຽກງານເສດຖະກິດ ໄດ້ເຄື່ອນໄຫວຊຸກຍູ້ວຽກງານຢູ່ເຂດເສດຖະກິດພິເສດລາວ – ຍີ່ປຸ່ນ ໂດຍມີ ທ່ານ ແກ້ວລັດຕະນະ ສີຫາວົງ ຮອງປະທານສະພາປະຊາຊົນແຂວງ, ທ່ານ ປະດິດ ວັນນະລັດສະໝີ ປະທານກວດກາພັກ-ລັດ ແຂວງ, ມີ ທ່ານ ບຸນຍົງ ສູນທອນ ຫົວໜ້າຄະນະຄຸ້ມຄອງເຂດເສດຖະກິດພິເສດ ແຂວງຈຳປາສັກ, ມີ ຄະນະສະເພາະກິດສະກັດກັ້ນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19 ແຂວງຈໍາປາສັກ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນການເຄື່ອນໄຫວຄັ້ງນີ້ ແມ່ນໄດ້ລົງ ຕິດຕາມ ກວດກາ ແລະ ຊຸກຍູ້ການດໍາເນີນກິດຈະການຕ່າງໆຂອງໂຮງງານ ຂອງ ບັນດາ ບໍລິສັດທີ່ຢູ່ ເຂດເສດຖະກິດພິເສດນິຄົມອຸສາຫະກໍາສະເພາະຂະໜາດນ້ອຍ ຫາ ກາງ ປາກເຊ-ຍີ່ປຸ່ນ ໃນໄລຍະທີ່ມີການລະບາດຂອງພະຍາດໂຄສິດ-19 ເພື່ອຮັກສາ ນະໂຍບາຍການຄຸ້ມຄອງ ກໍຄື ສົ່ງເສີມການຈ້າງງານໃນທ້ອງຖິ່ນ ແລະ ປະກອບ ໃນການພັດທະນາຊັບພະຍາກອນມະນຸດ ແລະ ສົ່ງເສີມສາຍພົວພັນລະຫວ່າງລາວ ແລະຍີ່ປຸ່ນ ໃຫ້ແໜ້ນແຟ້ນຍິ່ງໆຂື້ນ

ພ້ອມນີ້, ທາງຄະນະສະເພາະກິດສະກັດກັ້ນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19 ແຂວງຈໍາປາສັກ ກໍ່ຄື ການນໍາແຂວງຈໍາປາສັກ ໄດ້ ແນະນໍາ, ເຜີຍແຜ່ ຄໍາສັ່ງ ຂອງ ນາຍົກລັດຖະມົນຕີ ສະບັບເລກທີ 15/ນຍ, ຄໍາສັ່ງ ຂອງເຈົ້າແຂວງຈຳປາສັກ ເລກທີ 05/ຈຂ.ຈສ ວ່າດ້ວຍການເພີ່ມທະວີ ມາດຕະການສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຢູ່ແຂວງຈຳປາສັກ ກໍ່ຄື ບັນດາ ມາດຕະການຕ່າງໆ ທີ່ຈໍາເປັນ ໃນການປ້ອງກັນ ການສະກັດກັ້ນ ການແຜ່ລະບາດຂອງພະຍາດໂຄວິດ-19 ໃຫ້ແກ່ບັນດາບໍລິສັດ ຍີ່ປຸ່ນ ທີ່ພວມສືບຕໍ່ ດໍາເນີນກິດຈະການ ຂອງຕົນຢູ່ໃນເຂດເສດຖະກິດພິເສດ ປາກເຊ-ຍີ່ປຸ່ນ ແຂວງ ຈໍາປາສັກ, ສປປ ລາວ ເພື່ອນໍາໄປຈັດຕັ້ງປະຕິບັດໃຫ້ໄດ້ຮັບປະສິດທິຜົນສູງສຸດ.