ມີເດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ແຂວງສາລະວັນ ໄດ້ຈັດກິດຈະກໍາແຂ່ງຂັນກິລາບານເຕະຂຶ້ນ ເພື່ອເປັນການຊິງຂັນຂອງທ່ານປະທານສະພາປະຊາຊົນແຂວງສາລະວັນ, ເນື່ອງໃນໂອກາດສະເຫຼີມ-ສະຫຼອງ ວັນລັດຖະທໍາມະນູນແຫ່ງ ສປປ ລາວ ຄົບຮອບ 30 ປີ (15 ສິງຫາ 1991-15 ສິງຫາ 2021). ການແຂ່ງຂັນລວມມີ 2 ລາຍການຄື: ລຸ້ນອາວຸໂສຊາຍອາຍຸ 40 ປີຂຶ້ນໄປ ແລະ ທີມຍິງລຸ້ນທົ່ວໄປ, ເຊິ່ງມີທີມນັກກິລາເຂົ້າຮ່ວມແຂ່ງຂັນທັງໝົດ 7 ທີມ; ໃນນັ້ນ ທີມຊາຍ 5 ທີມ, ທີມຍິງ 2 ທີມ ຮູບແບບການແຂ່ງຂັນນັດທຳອິດ (ເສຍຕົກຮອບ) ການແຂ່ງຂັນໄດ້ເລີ່ມມາແຕ່ວັນທີ 13-17 ສິງຫາ 2021.

ຜ່ານການແຂ່ງຂັນສາມາດຄັດເລືອກໄດ້ທິມຊະນະເລີດ ບານເຕະອາວຸໂສຊາຍ ໄດ້ແກ່ ທີມອົງການປົກຄອງແຂວງສາລະວັນ ໄດ້ຮັບຂັນລາງວັນ 1 ໜ່ວຍ ພ້ອມເງິນສົດ 1.000.000ກີບ, ຮອງຊະນະເລີດໄດ້ ທີມສະພາປະຊາຊົນແຂວງ ໄດ້ຮັບລາງວັນເງິນສົດ 500.000 ກີບ. ສຳລັບທິມຊະນະເລີດທີມຍິງລຸ້ນທົ່ວໄປ ໄດ້ແກ່ ທີມອົງການປົກຄອງແຂວງ ໄດ້ຮັບຂັນລາງວັນ 1 ໜ່ວຍ, ພ້ອມເງິນສົດ 1.000.000ກີບ, ຮອງຊະນະເລີດໄດ້ແກ່ ທີມປົກປ້ອງກົດໝາຍ ໄດ້ຮັບລາງວັນເງິນສົດ 500.000 ກີບ ໃຫ້ກຽດຂື້ນມອບລາງວັນໂດຍ ທ່ານ ປອ ໂພໄຊ ໄຊຍະສອນ ເລຂາພັກແຂວງ, ເຈົ້າແຂວງສາລະວັນ, ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງສາລະວັນ, ພິທີມອບ-ຮັບ ລາງວັນ ແມ່ນຈັດຂື້ນ ໃນວັນທີ 17 ສິງຫາ 2021 ທີ່ ເດີນກິລາຫຍ້າທຽມ ເພັດລັງສີ.

ທັງນີ້ກໍ່ເພື່ອໃຫ້ວັນລັດຖະທຳມະນູນແຫ່ງ ສປປ ລາວ ຄົບຮອບ 30 ປີ ປີນີ້ ມີບັນຍາກາດ ຄືກຄື້ນ ເຕັມໄປດ້ວຍຄວາມໝາຍສຳຄັນຢ່າງເລິກເຊິ່ງ.