ເພື່ອ​ເປັນ​ການ​ຮອງ​ຮັບ ທັງຮັບ​ປະ​ກັນ​ກັບການ​ປິ່ນ​ປົວຜູ້​ຕິດ​ເຊື້ອ​ພະ​ຍາດ​ໂຄວິດ-19 ຢູ່ນະ​ຄອນ​ຫລວງວຽງ​ຈັນທີ່​ມີ​ຈຳ​ນວນ​ເພີ່​ມ​ຂຶ້ນ,ດ້ວຍ ການຕົກລົງເຫັນດີ ແລະ ການຊີ້ນຳໂດຍກົງ ຈາກລັດຖະບານ ມອບໃຫ້ ນວ ຊີ້ນຳ ຈັດຕັ້ງປິຕິບັດ ແລະ ໂດຍການນຳພາຕົວຈິງ ຂອງ ສຫ ເລຂາຄະນະພັກ, ປະທານສະພາປະຊາຊົນ ແລະ ເຈົ້າຄອງທາງນະ​ຄອນ​ຫລວງວຽງ​ຈັນຈຶ່ງ​ໄດ້​ສ້າງ​ໂຮງ​ຫມໍ​ພາກ​ສະ​ຫນາມ​ຂື້ນຢູ່ສະໜາມກິລາລ້ານ​ຊ້າງ, ທີ່​ບ້ານດອນກອຍ, ເມືອງ​ສີ​ສັດ​ຕະ​ນາກ, ນະ​ຄອນ​ຫລວງວຽງ​ຈັນ,ມີ​ຂະ​ຫນາດ 303ຕຽງນອນ, ແບ່ງ​ອອກ​ເປັນ 2 ເຂດຄື: ເຂດ A ແລະເຂດ B (ເຂດ A ມີປະມານ 168ຕຽງນອນ, ເຂດ B ປະ​ມານ 135ຕຽງນອນ), ມີ​ຫ້ອງ​ສຸກ​ເສີນ​ເບື້ອງ​ຕົ້ນຂະ​ຫນາດ 5 ຕຽງ​ນອນ, ກຳ​ນົດ​ໄລ​ຍະ​ເວ​ລາກໍ່​ສ້າງອາ​ທິດ​ຫນຶ່ງ (7 ວັນ) ແມ່ນ​ຄາດ​ວ່າ​ໃຫ້​ສາ​ມາດ​ນຳ​ໃຊ້​ໄດ້; ໃນ​ວັນ​ທີ 3ພຶດ​ສະ​ພາ 2021ແມ່ນ​ສາ​ມາດນຳ​ໃຊ້​ໄດ້​ແລ້ວໃນ​ເຂດ A, ສຳ​ລັບ​ເຂດ B ຄາດ​ວ່າ​ວັນ​ທີ 5 ພຶດ​ສະ​ພາ 2021 ຈະ​ສາ​ມາດ​ນຳ​ໃຊ້​ໄດ້.

ໂດຍ​ໄດ້​ຮັບການ​ຊີ້​ນຳຢ່າງ​ໃກ້​ຊິດ​,ທັງການປະ​ກອບ​ສ່ວນ​ດ້ານ​ເຫື່ອ​ແຮງແລະສິ​ຕິ​ປັນ​ຍາຈາກ​ຄະນະພັກ, ຄະນະ​ນຳແລະອ້າຍ​ນ້ອງ​​ພະ​ນັກ​ງານ​ທັງ​ຈາກ​ສູນ​ກາງ, ນະ​ຄອນ​ຫລວງວຽງ​ຈັນແລະໄດ້​ຮັບ​ການ​ຊ່ວຍ​ເຫລືອຈາກ​ພາກ​ທຸ​ລະ​ກິດເປັນ​ຕົ້ນ​ແມ່ນ: ກຸ່ມ​ບໍ​ລິ​ສັດເອ​ໄອ​ເອ​ຟ,ບໍ​ລິ​ສັດ​ທີ່​ປຶກ​ສາ​ດ້ານ​ການ​ລົງ​ທຶນແລະກໍ່​ສ້າງ​ເຂື່ອນ​ໄຟ​ຟ້າຈຳ​ກັດ​ຜູ້​ດຽວ, ​ບໍ​ລິ​ສັດອິນ​ທ​ຣາຄໍ​ປໍ​ເຣ​ຊັນຈຳ​ກັດ​ຜູ້​ດຽວ,ປະ​ກອບ​ສ່ວນ​ດ້ານແຮງ​ງານ​ຈາກ​ອ້າຍ​ນ້ອງ​ທະ​ຫານນວ, ບໍ​ລິ​ສັດທີ່​ຮັບ​ກໍ່​ສ້າງ, ບໍ​ລິ​ສັດອະ​ນາ​ໄມພີ​ເອ​ສທີ່​ໄດ້​ອຸ​ທິດ​ເຫື່ອ​ແຮງແລະສະ​ຕິ​ປັນ​ຍາເຂົ້າ​ໃນ​ການກໍ່​ສ້າງແລະກະ​ກຽມ​ໂຮງ​ຫມໍ​ແຫ່ງ​ນີ້ຢ່າງ​ບໍ່​ມີ​ເວັນ ແລະ ຄືນ ໂດຍບໍ່​ຮຽກ​ຮ້ອງ​ຜົນ​ປະ​ໂຫຍດ​ໃດໆຕອບ​ແທນໃນ​ສະ​ຫນາມ​ຮົບ​ຕ້ານ​ໂຄວິດຄັ້ງ​ນີ້, ຈຶ່ງ​ເຮັດ​ໃຫ້​ໂຮງ​ຫມໍ​ແຫ່ງ​ນີ້ໄດ້​ຖືກກໍ່​ສ້າງ​ຂຶ້ນເພື່ອ​ຮັບ​ໃຊ້​ສັງ​ຄົມ.

         ຢ່າງ​ໃດ​ກໍ່​ຕາມ, ເຖິງວ່າ​ໂຮງ​ຫມໍ​ແຫ່ງ​ນີ້ໃກ້​ຈະ​ສຳ​ເລັດ​ແລ້ວແຕ່​ກໍ່​ເຫັນ​ວ່າ​ຍັງ​ມີ​ຄວາມ​ຕ້ອງ​ການ​ຄວາມ​ຮ່ວມ​ມືແລະສະ​ຫນັບ​ສະ​ຫນູນ​ຈາກ​ພໍ່​ແມ່​ປະ​ຊາ​ຊົນ, ກໍ່ຄືພາກ​ສ່ວນ​ທຸ​ລະ​ກິດຕ່າງໆ, ລວມ​ເຖິງ​ຜູ້​ທີ່​ເຂົ້າ​ຮັບ​ການ​ປິ່ນ​ປົວເປັນ​ຕົ້ນ​ແມ່ນ: ຜູ້​ເຂົ້າ​ຮັບ​ການ​ປິ່ນ​ປົວກໍ່​ຄວນ​ປະ​ຕິ​ບັດຕາມ​ລະ​ບຽບ​ການ​ຕ່າງໆທີ່​ທາງ​ໂຮງ​ຫມໍ​ໄດ້​ກຳ​ນົດ​ອອກ, ພໍ່​ແມ່ປະ​ຊາ​ຊົນແລະບໍ​ລິ​ສັດ​ຫ້າງ​ຮ້ານຕ່າງໆກໍຂໍໃຫ້​ຄວາມ​ຮ່ວມ​ມືແລະໃຫ້​ການ​ສະ​ຫນັບ​ສະ​ຫນູນ​ໃນ​ການ​ເຄື່ອນ​ໄຫວ​ວຽກ​ງານຂອງ​ຄະ​ນະ​ແພດແລະວິ​ຊາ​ການ​ປະ​ຈຳ​ຢູ່​ໂຮງ​ຫມໍແລະຖ້າ​ມີ​ພາກ​ສ່ວນ​ໃດຕ້ອງ​ການ​ປະ​ກອບ​ສ່ວນ​ຊຸກ​ຍູ້ວັດ​ຖຸ​ອຸ​ປະ​ກອນ​ຕ່າງໆແມ່ນ​ສາ​ມາດ​ມາ​ມອບ​ໃຫ້​ໂຮງ​ຫມໍ​ໄດ້​ໂດຍ​ຕົງຫລືປະ​ສານ​ຫາຄະນະສະເພາະກິດຂັ້ນນະຄອນຫຼວງວຽງຈັນ.

         ດັ່ງ​ນັ້ນ, ຈຶ່ງ​ຂໍ​ແຈ້ງ​ຂ່າວ​ມາ​ຍັງບັນ​ດາ​ອົງ​ການ​ຈັດ​ຕັ້ງ​ພັກ-ລັດ, ບຸກ​ຄົນ, ນິ​ຕິ​ບຸກ​ຄົນໄດ້​ຮັບ​ຊາບຢ່າງ​ທົ່ວ​ເຖິງແລະໃຫ້​ການ​ຮ່ວມ​ມືກັບ​ທາງ​ຄະ​ນະ​ຮັບ​ຜິດ​ຊອບໂຮງ​ຫມໍໃນ​ການ​ເຄື່ອນ​ໄຫວ​ວຽກ​ງານໃນ​ຄັ້ງ​ນີ້ດ້ວຍ, ເພື່ອ​ພ້ອມກັນຮ່ວມ​ມື​​ຕໍ່​ສູ້​ໃນ​ສະ​ຫນາມ​ຮົບ​ໂຄວິດຄັ້ງ​ນີ້ໃຫ້ໄດ້ຮັບໄຊຊະນະ.