ມີເດຍລາວແຂວງຫຼວງພະບາງ ຂ່າວ: ເພັດສາຄອນ ສິມມະວົງ ເພື່ອເປັນການບັນເທົາຄ່າໃຊ້ຈ່າຍ ແລະຜົນກະທົບການດໍາລົງຊີວິດຂອງນັກສຶກສາ ໃນຊ່ວງທີ່ເຝົ້າລະວັງ,ປ້ອງກັນ ແລະ ຄວບຄຸມພະຍາດໂຄວິດ-19 ທີ່ແຂວງຫຼວງພະບາງ. ວັນທີ 12 ພຶດສະພາ 2021 ອົງການກາແດງລາວແຂວງຫຼວງພະບາງ ໄດ້ຮ່ວມກັບ ໂຄງການພັດທະນາ ເຕົາປະຢັດ ສາຂາຫຼວງພະບາງ ໄດ້ນໍາເຄື່ອງບໍລິໂພກ ໄປບໍລິຈາກໃຫ້ນັກສຶກສາຢູ່ວິທະຍາໄລຄູຫຼວງພະບາງ ທີ່ຍັງຄ້າງຢູ່ຫໍພັກ ຍ້ອນການລະບາດຂອງພະຍາດໂຄວິດ-19.ຮ່ວມແຈກຍາຍເຄື່ອງຊ່ວຍເຫຼືອຄັ້ງນີ້ມີທ່ານ ດຣ ວຽງສະຫວັນ ກະເສີມສຸກ ຫົວໜ້າອົງການກາແດງລາວແຂວງຫຼວງພະບາງ ພ້ອມດ້ວຍຄະນະ ແລະ ພະນັກງານ,ໃຫ້ການຕ້ອນຮັບມີທ່ານ ຫຸມພັນ ຄອນສະຫວັດ ອໍານວຍການ ວິທະຍາໄລຄູຫຼວງພະບາງ ພ້ອມດວຍພະນັກງານ,ຄູ-ອາຈານເຂົ້າຮ່ວມ.

ທ່ານ ດຣ ວຽງສະຫວັນ ກະເສີມສຸກ ກ່າວວ່າ: ໃນຊ່ວງການລະບາດຂອງ ໂຄວິດ-19 ທີ່ແຂວງຫຼວງພະບາງ ອົງການກາແດງລາວແຂວງຫຼວງພະບາງ ກໍໄດ້ລະດົມບັນດາປັດໃຈ ເປັນຕົ້ນແມ່ນເຄື່ອງບໍລິໂພກ ລວມມູນຄ່າ 7.700.000ກີບ ,ໃນນີ້ 1 ຖົງປະກອບມີ: ເຂົ້າ 2 ກິໂລ,ໄຂ່ 5 ໜ່ວຍ,ໝີ່ໄວໄວ,ປ່ອງປາ,ນໍ້າມັນພືດ,ນໍ້າດຶ່ມ,ສະບູ ແລະ ອື່ນໆ.ເຊິ່ງໄດ້ແຈກຍາຍໃຫ້ນັກສຶກສາຈໍານວນ 100ກວ່າ ຄົນ ເພື່ອແກ້ໄຂບັນຫາການດໍາລົງຊີວິດຂອງນັກສຶກສາ ຢູ່ຫໍພັກໃນວິທະຍາໄລຄູຫຼວງພະບາງ. ເຊິ່ງການເຄື່ອນໄຫວໃຫ້ບໍລິຈາກເຄື່ອງຄັ້ງນີ້ ເປັນແຫ່ງທໍາອິດ ໃນໄລຍະການແຜ່ລະບາດຂອງເຊື້ອພະຍາດໂຄວິດ-19ນີ້. ສໍາລັບໃນຕໍ່ໜ້າ ກໍຈະໄດ້ລະດົມທົ່ວສັງຄົມ ໃຫ້ການອຸປະຖຳ ຊ່ວຍເຫຼືອ ເປັນປັດໃຈຕ່າງໆ ເພື່ອຈະໄດ້ໄປບໍລິຈາກຢູ່ຕາມບັນດາສະຖາບັນການສຶກສາແຫ່ງຕ່າງໆ ໃນເທດສະບານແຂວງຫຼວງພະບາງ ແລະ ສູນກັກກັນ ແຕ່ລະສູນຕື່ມອີກ ,ສໍາຄັນແມ່ນການຊ່ວຍເຫຼືອໃຫ້ບັນດານັກຮົບເສື້ອຂາວ ກໍຄືແພດ-ໝໍ ແລະ ເຈົ້າໜ້າທີ່ສະເພາະກິດ ທີ່ກໍາລັງປະຕິບັດໜ້າທີ່ຕາມຈຸດຕ່າງໆ.

ໂອກາດນີ້ທ່ານ ຫຸມພັນ ຄອນສະຫວັດ ອໍານວຍການວິທະຍາໄລຫຼວງພະບາງ ກໍໄດ້ກ່າວສະແດງຄວາມຂອບໃຈມາຍັງ ອົງການກາແດງລາວແຂວງຫຼວງພະບາງ ແລະໂຄງການພັດທະນາ ເຕົາປະຢັດ ສາຂາຫຼວງພະບາງ ທີ່ໄດ້ໃຫ້ການສະໜັບສະໜູນ ແລະ ມອບເຄື່ອງຊ່ວຍເຫຼືອ ໃຫ້ນັກສຶກສາທີ່ຕົກຄ້າງໃນຊ່ວງການແຜ່ລະບາດຂອງພະຍາດໂຄວິດ-19,ຕໍ່ກັບການປະຕິບັດຕາມຄໍາສັ່ງ ແລະ ມາດຕະການຂອງລັດຖະບານ ກໍຄືຂອງແຂວງ.ປັດຈຸບັນມີນັກສຶກສາວິທະຍາໄລຄູຢູ່ຫໍພັກໃນ-ນອກທັງໝົດ 283 ຄົນ,ຍິງ 170 ຄົນ,ໃນນີ້ຫໍພັກຍິງ 114 ຄົນ,ຫໍພັກຊາຍ 59 ຄົນ ແລະຫໍພັກນອກ 110 ຄົນ,ຍິງ 56 ຄົນ.ນັກສຶກສາຈໍານວນດັ່ງກ່າວ ແມ່ນໄດ້ຜົນກະທົບດ້ານຊີວິດການເປັນຢູ່ ເປັນຕົ້ນແມ່ນຂາດເຂີນສະບຽງອາຫານ.

ສໍາລັບທ່ານທີ່ຢາກໃຫ້ການຊ່ວຍເຫຼືອ ແລະ ບໍລິຈາກວັດຖຸປັດໃຈ ສາມາດເຂົ້າໄປບໍລິຈາກໄດ້ທີ່ ຫ້ອງການອົງການກາແດງລາວແຂວງຫຼວງພະບາງ ຕັ້ງຢູ່ເຊິ່ງໜ້າຕະຫຼາດ ນາວຽງຄໍາ ນະຄອນຫຼວງພະບາງ ໄດ້ທຸກວັນ.ຈະຊ່ວຍເຫຼືອເປັນວັດຖຸ,ອາຫານແຫ້ງ ແລະ ເປັນເງິນ ກໍດີ ເພື່ອເປັນການແກ້ໄຂສຸກເສີນ ແລະເບິ່ງແຍງຊ່ວຍເຫຼືອສັງຄົມຮ່ວມກັນ.(ຖ້າທ່ານ ໃດຫາກຢາກບໍລິຈາກ ແລ້ວບໍ່ທັນເຂົ້າໄປບໍລິຈາກ ສາມາດໂທຫາ 1625 ອົງການກາແດງກໍຈະມີລົດມາຮັບເອົາກັບທີ່).