ໃນວັນທີ 16 ກຸມພາ 2021 ນີ້, ກຳມະບານຮາກຖານຄຸ້ມຄອງການບິນແຂວງສະຫວັນນະເຂດ ໄດ້ມີການຈັດພິທີປາຖະກະຖາວັນສ້າງຕັ້ງສະຫະພັນກຳມະບານລາວຄົບຮອບ 65 ປີ (1 ກຸມພາ 1956 – 1 ກຸມພາ 2021) ຂຶ້ນຢ່າງເປັນທາງການທີ່ຫ້ອງປະຊຸມຂອງຕົນ ໂດຍການໃຫ້ກຽດເຂົ້າຮ່ວມ ຂອງທ່ານ ນາງ ພົມມາ ທອງເພັງ ຮອງປະທານຄະນະບໍລິຫານງານສະຫະພັນກຳມະບານແຂວງ, ມີທ່ານ ໄຊ ບົວທອງ ເລຂາໜ່ວຍພັກຄຸ້ມຄອງການບິນ ຫົວໜ້າຫ້ອງການຈະລາຈອນທາງອາກາດແຂວງສະຫວັນນະເຂດ, ທ່ານ ສັນຕິ ແສງອາລຸນ ປະທານກຳມະບານຮາກຖານຄຸ້ມຄອງການບິນ ຕະຫຼອດເຖິງສະມາຊິກກຳມະບານພາຍໃນຂອງຕົນເຂົ້າຮ່ວມ ຈຳນວນ 50 ທ່ານ, ຍິງ 16 ທ່ານ.

ໂອກາດດັ່ງກ່າວ ທ່ານ ນາງ ພົມມາ ທອງເພັງ ກໍ່ໄດ້ຍົກໃຫ້ເຫັນເຖິງຕົ້ນກຳເນີດ ແລະ ການເຕີບໃຫຍ່ຂະຫຍາຍຕົວຂອງອົງການຈັດຕັ້ງກຳມະບານລາວ ຕະຫຼອດໄລຍະ 65 ປີ ທີ່ຜ່ານມາຈົນເຖິງປະຈຸບັນ ແລະ ວຽກງານອັນພົ້ນເດັ່ນໃນການປະກອບສ່ວນພາລະກິດປະຕິວັດ ທີ່ມີລັກສະນະອັນດີເລີດຂອງຊົນຊັ້ນກຳມະກອນລາວ ໃນການສຶບຕໍ່ຍຶດໝັ້ນເດີນຕາມແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກຢ່າງຕັ້ງໜ້າ, ເຂົ້າໃນການປະຕິບັດວຽກງານໃຫ້ບັນລຸຈຸດປະສົງ ແລະ ເປົ້າໝາຍມະຕິກອງປະຊຸມໃຫຍ່ຜູ້ແທນກຳມະບານລາວທົ່ວປະເທດ ຄັ້ງທີ VIII, ມະຕິກອງປະຊຸມໃຫຍ່ຄັ້ງທີ XI ຂອງພັກ ໂດຍຕິດພັນກັບແຜນພັດທະນາ ເສດຖະກິດ-ສັງຄົມ 5 ປີ ແຫ່ງຊາດ ຄັ້ງທີ IX ໃຫ້ມີຄວາມເປັນເອກະພາບ ແຕ່ສູນກາງລົງຮອດທ້ອງຖິ່ນຮາກຖານໃນທົ່ວປະເທດ, ໂດຍແນ່ໃສ່ຫັນເອົາກຳລັງແຮງສັງລວມຂອງຊາດສົມທົບກັບກຳລັງແຮງສັງລວມຂອງຍຸກສະໄໝ ເຂົ້າໃນການປຸກລະດົມ-ໂຄສະນາສຶກສາອົບຮົມທາງດ້ານການເມືອງແນວຄິດ, ຄວາມຮູ້ທາງດ້ານວິທະຍາສາດຕ່າງໆ ເພື່ອປະກອບສ່ວນເຂົ້າໃນການປົກປ້ອງສິດຜົນປະໂຫຍດອັນຊອບທຳຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ທັງໃນລະບົບ ແລະ ນອກລະບົບໃຫ້ໄດ້ຢ່າງທົ່ວເຖິງ.