ມີເດຍລາວແຂວງເຊກອງ ໂດຍ: ດາວສະຫວັນ ກອງປະຊຸມໃຫຍ່ຄັ້ງທີIII ຂອງກຳມະບານຮາກຖານໂຮງຮຽນ ມຕ ອົງແກ້ວ ໄດ້ຈັດຂຶ້ນໃນຕອນບ່າຍຂອງວັນທີ 31 ມີນາ 2021 ນີ້, ຢູ່ທີ່ໂຮງຮຽນ ມຕ ດັ່ງກ່າວ, ໂດຍການເປັນປະທານຂອງທ່ານ ນ. ທັດດາວັນ ໂສພາລັກ ເລຂາໜ່ວຍພັກໂຮງຮຽນ ມຕ ອົງແກ້ວ,ໃຫ້ກຽດເຂົ້າຮ່ວມຂອງທ່ານ ສຸວັນຄຳ ແກ້ວປະເສີດ ຮອງປະທານສະຫະພັນກຳມະບານເມືອງລະມາມ, ມີບັນດາແຂກຖືກເຊີນຈາກຮາກຖານກຳມະບານອ້ອມຂ້າງ ພ້ອມດ້ວຍສະມາຊິກກຳມະບານພາຍໃນຮາກຖານເຂົ້າຮ່ວມ.


ໃນວາລະດຳເນີນກອງປະຊຸມ, ຜູ້ເຂົ້າຮ່ວມໄດ້ຮັບຟັງການສະຫຼຸບຕີລາຄາການຊີ້ນຳໆພາການຈັດຕັ້ງປະຕິບັດວຽກງານກຳມະບານໄລຍະ 3 ປີຜ່ານມາ ຈາກທ່ານ ນ. ດວງໃຈ ຫລອດຫຼ່ຽມພະຈັນ ປະທານກຳມະບານ ມຕ ອົງແກ້ວ ເຊິ່ງໄດ້ຍົກໃຫ້ເຫັນເຖິງຜົນສຳເລັດ, ດ້ານດີ, ດ້ານອ່ອນ ແລະ ຂໍ້ຄົງຄ້າງ, ໂດຍສະເພາະວຽກງານການເມືອງແນວຄິດ,ວຽກງານເສດຖະກິດ-ສັງຄົມ, ວຽກງານຂະບວນການ-ສື່ມວນຊົນ, ວຽກງານປັບປຸງຂະຫຍາຍສະມາຊິກພັກ ແລະ ວຽກງານການແຂ່ງຂັນ-ຍ້ອງຍໍ. ສຳລັບຄາດໝາຍໃນຕໍ່ໜ້າຂອງກຳມະບານຮາກຖານ ມຕ ອົງແກ້ວ ຕ້ອງເພີ່ມທະວີສືກສາອົບຮົມການເມືອງແນວຄິດໃຫ້ບັນດາສະມາຊິກກຳມະບານໃນຮາກຖານຂອງຕົນຮັບຜິດຊອບ, ໃຫ້ມີຄວາມເຊື່ອໝັ້ນຕໍ່ການຊີ້ນຳໆຂອງພັກ ແລະລະບຽບຂອງລັດໃຫ້ເຂັ້ມງວດ, ປຸກລະດົມກໍ່ສ້າງສະມາຊິກໃຫ້ມີນ້ຳໃຈຮັກຮັກຊາດ, ຮັກລະບອບໃໝ່, ເຊີດຊູຄວາມສາມັກຄີເປັນປຶກແຜນແໜ້ນໜາທັງພາຍໃນ-ພາຍນອກຢ່າງກວ້າງຂວາງ, ປະກອບສ່ວນຕັ້ງໜ້າທຸ້ມເທເຫືອແຮງສະຕິປັນຍາເຂົ້າໃນວຽກງານກຳມະບານໃຫ້ມີຄວາມເຂັ້ມແຂງກວ່າເກົ່າ ພ້ອມນີ້ກໍ່ໄດ້ຜ່ານບົດສຳຫຼວດການຊິ້ນຳໆພາວຽກງານຂອງຄະນະກຳມະບານຊຸດເກົ່າພ້ອມກ່າວລາໜ້າທີ່ຕຳແໜ່ງ. ຈາກນັ້ນຜູ້ເຂົ້າຮ່ວມກອງປະຊຸມກໍ່ໄດ້ໃຊ້ສິດປະຊາທິປະໄຕຂອງຕົນເພື່ອຄັດເລືອກເອົາຄະນະກຳມະບານຮາກຖານຊຸດໃໝ່ ເຊິ່ງກອງປະຊຸມຄັ້ງປະຖົມມະເລີກໄດ້ເຫັນເປັນເອກະພາບຕາມຄະແນນສຽງເລືອກເອົາ ທ່ານ ຫຼຽນໄຊ ສີສະຫວັດ ເປັນປະທານ, ທ່ານ ນ. ພອນມະນີ ວອນມີໄຊ ຮອງປະທານ ແລະເຫັນດີເລືອກເອົາ ທ່ານ ນ. ຂາວພອນ ໄຊສົງຄາມ ເປັນກຳມະການກວດກາ.

ໂອກາດນີ້, ທ່ານ ສຸວັນຄຳ ແກ້ວປະເສີດ ຮອງປະທານກຳມະບານເມືອງລະມາມ ກໍ່ໄດ້ໂອ້ລົມໃຫ້ຊີ້ທິດເຍື່ອງທາງໃຫ້ຄະນະກຳມະບານຊຸດໃໝ່ ກ່ອນອື່ນທ່ານກໍ່ໄດ້ຍ້ອງຍໍຊົມເຊີຍຕໍ່ຜົນງານທີ່ຄະນະກຳມະບານຊຸດເກົ່າຍາດໄດ້ໃນໄລຍະ3ປີຜ່ານມາ, ເຊິ່ງທ່ານກໍ່ໄດ້ຮຽກຮ້ອງໃຫ້ຄະນະກຳມະບານຊຸດໃໝ່ ຈົ່ງພ້ອມກັນສືບຕໍ່ເອົາໃຈໃສ່ສືບຕໍ່ສຶກສາອົບຮົມວຽກງານການເມືອງແນວຄິດໃຫ້ສາມາຊິກກຳມະບານໃຫ້ເຊື່ອມຊຶມກຳແໜ້ນຕໍ່ແນວທາງຂອງພັກ, ລະບຽບຂອງລັດ ຢ່າງເລິກເຊິງ, ສືບຕໍ່ເຄື່ອນໄຫວວຽກງານກຳມະບານໃຫ້ເປັນປົກະຕິ, ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ ພ້ອມກັນຈັດຕັ້ງປະຕິບັດໜ້າທີ່ວຽກງານ ເວົ້າລວມ,ເວົ້າສະເພາະ ກໍ່ຄືວຽກງານກຳມະບານໃຫ້ເກີດດອກອອກຜົນ.