ມີເດຍລາວແຂວງສາລະວັນ ດ້ວຍຄວາມເປັນຫ່ວງເປັນໃຍພໍ່ແມ່ປະຊາຊົນ ທີ່ໄດ້ຮັບຜົນກະທົບຈາກພາຍຸໂກນເຊິນ, ບັນດາກຸ່ມບໍລິສັດ, ບຸກຄົນ, ນິຕິບຸກຄົນ ແລະ ຄອບຄົວ ໄດ້ສົມທົບກຳລັງວັດຖຸ, ປັດໃຈ ເຂົ້າຊ່ວຍເຫຼືອພໍ່ແມ່ປະຊາຊົນ ທີ່ໄດ້ຮັບຜົນກະທົບຢ່າງຕໍ່ເນື່ອງ ເພື່ອບັນເທົາທຸກໃນເບື້ອງຕົນ ແລະ ຊ່ວຍຟື້ນຟູຊີວິດການເປັນຢູ່.

ມາໃນວັນທີ 13 ກັນຍາ 2021 ທີ່ສູນມອບເຄື່ອງວັດບ້ານໂພນໃຜ່, ບໍລິສັດຊາວົງສີ ເຄຫະສະຖານ ແລະຂົວທາງ ມອບເງິນສົດ 5 ລ້ານກີບ, ຄອບຄົວທ່ານ ຄອນສະຫວັນ ແກ້ວຫຼວງໂຄດ ມອບໝີ່ 20 ແກັດ, ໄຂ່ 20 ແຕະ, ນໍ້າດື່ມຕຸກ 20 ລິດ ຈຳນວນ 100 ຕຸກ ລວມມູນຄ່າ 3 ລ້ານກວ່າກີບ, ຄອບຄົວ ທ່ານ ໄຊພອນ ແກ້ວບົວລະພາ ມອບເຄື່ອງ 71 ຊຸດ ມູນຄ່າ 2 ລ້ານກວ່າກີບ, ຄອບຄົວແມ່ໂສພາ ວົງສາ ມອບເຂົ້າສານໜຽວ 50 ກິໂລກຣາມ, ໄຂ່ 5 ແຕະ, ໝີ່ 5 ແກັດ, ນົມ 11 ແພັກ ລວມມູນຄ່າ 1 ລ້ານກວ່າກີບ ແລະ ຄອບຄົວ ທ່ານ ສີພອງ ພຽງສະຫວັນ ມອບເຄື່ອງອຸປະໂພກ ມູນຄ່າ 3 ແສນກວ່າກີບ. ຕາງໜ້າອົງການປົກຄອງເມືອງສາລະວັນ ຮັບໂດຍ ທ່ານ ຈັນສີລອນ ສີສົມບູນ ເຈົ້າເມືອງສາລະວັນ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ພາບ-ຂ່າວ: ທິດລານີ ໂຄດໂຍທາ.