ມີເດຍລາວແຂວງໄຊຍະບູລີ ຂ່າວ: ບຸນທີ
ໂຄງການຜະລິດກະສິກໍາເປັນສິນຄ້າຢູ່ ສປປ ລາວ ເປັນໂຄງການທີ່ໄດ້ຮັບທຶນກູ້ຢືມຈາກທະນາຄານໂລກ 25 ລ້ານໂດລາສະຫະລັດ ເຊິ່ງໄດ້ຮັບການເຊັນສັນຍາ ແລະ ອານຸມັດໃນເດືອນພຶດສະພາ 2018 ໄລຍະການປະຕິບັດ 6 ປີ ແຕ່ປີ 2018-2024 ຈັດຕັ້ງປະຕິບັດຢູ່ 5 ແຂວງຄື: ແຂວງໄຊຍະບູລີ, ແຂວງວຽງຈັນ, ນະຄອນຫຼວງ, ບໍລິຄໍາໄຊ ແລະ ແຂວງຄໍາມ່ວນ. ພືດຫຼັກຂອງໂຄງການສົ່ງເສີມເພື່ອການຜະລິດເປັນສິນຄ້າມີ: ເຂົ້າ, ສາລີ ແລະ ພືດຜັກ; ສໍາລັບແຂວງໄຊຍະບູລີມີທຶນງົບປະມານທັງໝົດໃນການຈັດຕັ້ງປະຕິບັດໃນ 5 ປີ 2018-2024 ມີ 4,5 ລ້ານໂດລາສະຫະລັດ ແລະ ພືດທີ່ເປັນຈຸດສຸມໃນການສົ່ງເສີມພາຍໃນແຂວງມີ: ເຂົ້າ, ສາລີ, ອາຫານສັດ ໂດຍຈັດຕັ້ງປະຕິບັດຢູ່ 4 ເມືອງຄື: ເມືອງຊຽງຮ່ອນ, ເມືອງໄຊຍະບູລີ, ເມືອງພຽງ ແລະ ເມືອງປາກລາຍ.

ປະກອບມີ 66 ບ້ານ, ມີ 7.752 ຄອບຄົວ, ສ້າງຕັ້ງກຸ່ມຜະລິດ 180 ກຸ່ມ, ມີເນື້ອທີ່ທັງໝົດ 9.480 ເຮັກຕາ; ໃນນີ້ເປົ້າໝາຍປູກເຂົ້າມີ 3 ເມືອງຄື: ເມືອງຊຽງຮ່ອນ, ເມືອງໄຊຍະບູລີ ແລະ ເມືອງພຽງ, ມີ 56 ບ້ານເປົ້າໝາຍ, ມີ 5.276 ຄອບຄົວ, ເນື້ອທີ່ 4.880 ເຮັກຕາ, ມີເປົ້າໝາຍຜະລິດເມັດພັນ 10 ກຸ່ມ ແລະ ກຸ່ມຜະລິດເປັນສິນຄ້າ 100 ກຸ່ມ, ເປົ້າໝາຍປູກສາລີມີ 1 ເມືອງຄື ເມືອງປາກລາຍ, ມີ 10 ບ້ານ, ມີ 2.467 ຄອບຄົວ, ເນື້ອທີ່ 5.000 ເຮັກຕາ, ມີເປົ້າໝາຍສ້າງຕັ້ງກຸ່ມ 70 ກຸ່ມ, ສົ່ງເສີມການປູກຢູ່ 2 ເຂດຄື: ເຂດບວມເລົາ-ຜາແກ້ວ ແລະ ເຂດບົວບານ. ໂຄງການຜະລິດກະສິກໍາເປັນສິນຄ້າຢູ່ ສປປ ລາວ ມີ 3 ອົງປະກອບໃຫຍ່ ເຊັ່ນ: ປັບປຸງປະສິດທິພາບ ແລະ ຄວາມຍືນຍົງໃນການເຮັດກະສິກໍາ, ເພີ່ມຄວາມສາມາດດ້ານການຄ້າ ແລະ ຜະລິດຕະພັນກະສິກໍາ ແລະ ການບໍລິຫານໂຄງການ.

ພິທີມອບກົນຈັກ (ລົດໄຖ) ໄດ້ຈັດຂຶ້ນໃນວັນທີ 25 ມິຖຸນາ 2021 ນີ້ທີ່ພະແນກກະສິກໍາ ແລະ ປ່າໄມ້ແຂວງໄຊຍະບູລີ. ໂດຍໃຫ້ກຽດເຂົ້າຮ່ວມມອບກົນຈັກດັ່ງກ່າວໂດຍ ທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ, ເຂົ້າຮ່ວມມີ ທ່ານ ບຸດສະກອນ ອິນທະລັງສີ ຫົວໜ້າພະແນກກະສິກໍາ ແລະ ປ່າໄມ້ແຂວງ, ມີຮອງຫົວໜ້າຂະແໜງການທີ່ກ່ຽວຂ້ອງ, ຫົວໜ້າຂະແໜງການ ແລະ ກຸ່ມຜູ້ຜະລິດຈາກເມືອງຊຽງຮ່ອນ ແລະ ເມືອງພຽງເຂົ້າຮ່ວມ. ກົນຈັກທີ່ມອບປະກອບມີລົດໄຖຈໍານວນ 10 ຄັນ, ມູນຄ່າທັງໝົດ 2 ຕື້ 500 ລ້ານກີບ, ທຶນຊ່ວຍເຫຼືອລ້າຈາກໂຄງການຜະລິດກະສິກໍາເປັນສິນຄ້າຢູ່ ສປປ ລາວ (LACP) ມູນຄ່າ 1 ຕື້ 600 ລ້ານກີບ ແລະ ທຶນສົມທົບຈາກກຸ່ມຜະລິດເຂົ້າເປັນສິນຄ້າເມືອງຊຽງຮ່ອນ ໄດ້ 6 ຄັນ, ກຸ່ມຜະລິດເຂົ້າເປັນສິນຄ້າບ້ານດອນເຟືອງໄດ້ 2 ຄັນ, ກຸ່ມຜະລິດເຂົ້າເປັນສິນຄ້າບ້ານລັບ 2 ກຸ່ມ ໄດ້ 2 ຄັນ, ກຸ່ມຜະລິດເຂົ້າເປັນສິນຄ້າບ້ານດອນຕັນ 2 ກຸ່ມ ໄດ້ 2 ຄັນ, ກຸ່ມຜະລິດເຂົ້າເປັນສິນຄ້າບ້ານນາໂສມໄດ້ 3 ຄັນ ແລະ ກຸ່ມຜະລິດເມັດພັນເຂົ້າບ້ານນາໂສມ ເມືອງພຽງ 1 ກຸ່ມ ໄດ້ 1 ຄັນ.