ມີເດຍລາວແຂວງຫຼວງພະບາງ ໂດຍ: ສົມພອນ ສຸວັນທອນ.
ໃນຕອນບ່າຍຂອງວັນທີ 12 ພຶດສະພາ 2021 ນີ້ ທ່ານ ພົນຈັດຕະວາ ວັນທອງ ບຸດຕະວົງ ຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫ່ຍເສນາທິການກອງທັບ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມຊຸກຍູ້ວຽກງານປ້ອງກັນ ແລະ ສະກັດກັ້ນການແພລະບາດພະຍາດໂຄວິດ 19 ຢູ່ກອງບັນຊາການທະຫານແຂວງຫຼວງພະບາງ ໂດຍໃຫ້ການຕ້ອນຮັບອັນອົບອຸ່ນຈາກ ສະຫາຍ ພັນເອກ ແປ້ນຄໍາ ບຸດຈັນແພງ ກໍາມະການພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງຫຼວງພະບາງພ້ອມດ້ວຍຄະນະ ມີຕາງໜ້າຄະນະພັກໂຮງຮຽນກໍ່ສ້າງນາຍສິບເລກ I ກອງທັບ, ໂຮງງານປະສານເຫຼົ່າ, ອົງການໄອຍະການທະຫານພາກເໜືອ, ໂຮງໝໍບໍລິເວນ 107 ແລະ ສານທະຫານພາກເໜືອ ພ້ອມດ້ວຍໜ່ວຍສະເພາະກິດຕ້ານພະຍາດໂຄວິດ 19 ຈາກບັນດາກົມກອງເຂົ້າຮ່ວມ.

ໃນໂອກາດດັ່ງກ່າວ ແຕ່ລະກົມກອງໄດ້ພັດປ່ຽນກັນຂື້ນລາຍງານສະພາບ ການຈັດຕັ້ງປະຕິບັດວຽກງານປ້ອງກັນ ແລະ ຄວບຄຸມພະຍາດ ທີ່ພວມແຜ່ລະບາດຈາກເຊື້ອຈຸລະໂລກສາຍພັນໃໝ່ໂຄວິດ 19 ເຊິ່ງໄດ້ໃຫ້ເຫັນດ້ານດີທີ່ຕັ້ງໜ້າ ແລະ ບາງບັນຫາທີ່ພົບຄວາມຫຍຸ້ງຍາກ ໃນນີ້ເຫັນວ່າແຕ່ລະກົມກອງແມ່ນໄດ້ຍົກສູງສະຕິຄວາມຮັບຜິດຊອບ ໄດ້ພົວພັນກັບອໍານາດການປົກຄອງບ້ານ, ເມືອງ ໃນການຈັດຕັ້ງຊີ້ນໍາ – ນໍາພາ ເຄື່ອນໄຫວຕ້ານ ແລະ ສະກັດກັ້ນ, ປ້ອງກັນ, ຄວບຄຸມພະຍາດໂຄວິດ 19 ບົນພື້ນຖານແມ່ນໄດ້ປະຕິບັດຕາມຄໍາສັ່ງເລກທີ 15 ຂອງນາຍົກລັດຖະມົນຕີ ຢ່າງເຂັ້ມງວດ.

ໂອກາດນີ້ ທ່ານ ພົນຈັດຕະວາ ວັນທອງ ບຸດຕະວົງ ຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫ່ຍເສນາທິການກອງທັບ ໄດ້ມີຄໍາເຫັນຊີ້ນໍາໃຫ້ແຕ່ລະຫົວໜ່ວຍກົມກອງເອົາໃຈໃສ່ປົກປັກຮັກສາຂອບເຂດຊາຍແດນ ເພື່ອປ້ອງກັນສະກັດກັ້ນການລັກລອບເຂົ້າ – ອອກເມືອງ ຜິດກົດໝາຍ, ພ້ອມກັນນີ້ກໍ່ຕ້ອງເພີ່ມທະວີຮັກສາຄວາມເປັນລະບຽບຮຽບຮ້ອຍຂອງກົມກອງໃຫ້ເຂັ້ມງວດ, ເອົາໃຈໃສ່ຄຸ້ມຄອງການກິນດື່ມໃຫ້ຖືກຕາມຫຼັກອະນາໄມ ແລະ ຮັກສາໄລຍະຫ່າງ, ຖືເອົາວິກິດໃນຄັ້ງນີ້ເປັນການຝຶກຝົນຫຼໍ່ຫຼອມຕົນເອງ ດ້ວຍການເສຍສະຫຼະປະກອບສ່ວນເຂົ້າໃນການປ້ອງກັນ ແລະ ຄວບຄຸມການແພລະບາດພະຍາດໂຄວິດ 19, ສືບຕໍ່ເພີ່ມທະວີເຕົ້າໂຮມຄວາມສາມັກຄີ ພາຍໃນໃຫ້ແໜ້ນແຟ້ນ, ພາຍນອກໃຫ້ກ້ວາງຂວາງ ແລະ ສືບຕໍ່ປະຕິບັດຄໍາສັ່ງເລກທີ 15 ຂອງນາຍົກລັດຖະມົນຕີແຫ່ງ ສປປລາວ ໃຫ້ເຂັ້ມງວດ. ພິທີຍັງໄດ້ມອບວັດຖຸອຸປະກອນເຄື່ອງມືກັ້ນພະຍາດໂຄວິດໃຫ້ບັນດາກົມກອງຕື່ມອີກ.