ມີເດຍລາວແຂວງໄຊສົມບູນ ຂ່າວ: ນາງ ແກ່ນຈັນ ທຳມະນີ ກໍລະນີຜູ້ຕິດເຊື້ອພະຍາດໂຄວິດ ¬19 ຢູ່ບ້ານພັນໄຊ ເມືອງລ້ອງແຈ້ງ ແຂວງໄຊສົມບູນ ໄດ້ຮັບການປິ່ນປົວດີ ແລະ ກັບຄືນສູ່ອ້ອມອົກຂອງຄອບຄົວ ໃນວັນທີ 24 ກັນຍາ 2021 ນີ້ ພາຍຫຼັງທີ່ໄດ້ຮັບການປິ່ນປົວເປັນເວລາ 21 ວັນ ທີ່ໂຮງໝໍນ້ອຍຫຼວງພັນໄຊ ບ້ານນໍ້າຜາໃຫຍ່ ເມືອງລ້ອງແຈ້ງ ໂດຍມີທ່ານ ດຣ ຢິນ ບ່າວວົງໄຊ, ຮອງຫົວໜ້າພະແນກສາທາລະນະສຸກ ແຂວງ ທັງເປັນຜູ້ຕາງໜ້າໃຫ້ຄະນະສະເພາະກິດ ຂັ້ນແຂວງ ແລະ ທ່ານ ເຍ່ຍຊາງ ລ່ອງປາວຈັ້ງ, ຮອງເລຂາພັກເມືອງ, ຫົວໜ້າຄະນະສະເພາະກິດ ເມືອງລ້ອງແຈ້ງ ພ້ອມດ້ວຍພະນັກງານແພດໝໍ ແລະ ອຳນາດການປົກຄອງບ້ານພັນໄຊ ເຂົ້າຮ່ວມເປັນສັກຂີພິຍານ.

ສຳລັບຜູ້ຕິດເຊື້ອພະຍາດໂຄວິດ 19 ທີ່ນອນປິ່ນປົວ ຢູ່ໂຮງໝໍນ້ອຍຫຼວງພັນໄຊ ບ້ານນໍ້າຜາໃຫຍ່ ເມືອງລ້ອງແຈ້ງ ນັ້ນ ຊື່ວ່າ ນາງ ພິນ ເບີ່ງພັນ, ອາຍຸ 18 ອາຊີບ ແຮງງານລາວ ມາຈາກປະເທດໄທ ເປັນປະຊາຊົນ ຢູ່ບ້ານພັນໄຊ ເມືອງລ້ອງແຈ້ງ ແຂວງໄຊສົມບູນ ທັງເປັນກໍລະນີທຳອິດ ທີ່ຕິດເຊື້ອໂຄວິດ 19 ຢູ່ຊຸມຊົນ ຂອງແຂວງຕື່ມອີກ ຊຶ່ງຜູ້ກ່ຽວໄດ້ເດີນທາງມາຈາກສູນຈຳກັດບໍລິເວນ ຂອງແຂວງສະຫວັນນະເຂດ ແລະ ມີປະຫວັດການເດີນທາງອອກຈາກປະເທດໄທ ເຂົ້າມາລາວ ໃນວັນທີ 20 ກໍລະກົດ 2021 ມາຈຳກັດບໍລິເວນຢູ່ສູນກັກກັນ ແຂວງສະຫວັນນະເຂດ ເຖິງວັນທີ 17 ສິງຫາ 2021 ນັບເປັນເວລາ 27 ວັນ ຊຶ່ງສູນຈຳກັດບໍລິເວນ ໄດ້ເກັບຕົວຢ່າງສົ່ງກວດ 1 ຄັ້ງ ແຕ່ກໍ່ອອກເປັນລົບ.

ຈາກນັ້ນ ໃນວັນທີ 18 ສິງຫາ 2021 ຜູ້ກ່ຽວໄດ້ເດີນທາງອອກຈາກສູນຈຳກັດບໍລິເວນ ແຂວງສະຫວັນນະເຂດ ແລ້ວກັບເຂົ້າສູ່ບ້ານພັນໄຊ ເມືອງລ້ອງແຈ້ງ ແຂວງໄຊສົມບູນ ໃນວັນທີ 19 ສິງຫາ 2021 ຈົນມາຮອດວັນທີ 1 ກັນຍາ 2021 ຈຶ່ງໄດ້ເກັບຕົວຢ່າງ ສົ່ງໃຫ້ພະແນກສາທາລະນະສຸກ ແຂວງ ເພື່ອສົ່ງຕໍ່ຫາສູນວິເຄາະລະບາດວິທະຍາສູນກາງ ເພື່ອກວດຫາເຊື້ອໂຄວິດ 19 ມາເຖິງວັນທີ 3 ກັນຍາ 2021 ທາງສູນວິເຄາະລະບາດວິທະຍາ ຈຶ່ງໄດ້ແຈ້ງຜົນອອກມາເປັນບວກ. ດັ່ງນັ້ນ ວັນທີ 4 – 17 ກັນຍາ 2021 ຈິ່ງໄດ້ຮັບເຂົ້າປິ່ນປົວ ຢູ່ສູນປິ່ນປົວທີ່ໂຮງໝໍນ້ອຍຫຼວງພັນໄຊ ບ້ານນໍ້າຜາໃຫຍ່ ເມືອງລ້ອງແຈ້ງ ແຂວງໄຊສົມບູນ. ຕະຫຼອດໄລຍະການປິ່ນປົວ ທາງພະນັກງານແພດໝໍແຕ່ລະທ່ານ ຕ່າງກໍໄດ້ສຸມທຸກເຫື່ອແຮງ ແລະ ສະຕິປັນຍາຂອງຕົນ ເຂົ້າໃນການປິ່ນປົວ ດ້ວຍຄວາມຮັບຜິດຊອບສູງ ຊຶ່ງເຕັມໄປດ້ວຍນໍ້າໃຈເສຍສະຫຼະອັນສູງສົ່ງ ແລະ ໃຫ້ຄວາມໃກ້ຊິດຜູ້ຕິດເຊື້ອພະຍາດໂຄວິດ 19 ກໍລະນີດັ່ງກ່າວ ຕະຫຼອດເວລາ. ສະນັ້ນ ມາຮອດວັນທີ 24 ກັນຍາ 2021 ຜູ້ກ່ຽວໄດ້ຮັບການປິ່ນປົ່ວດີ ແລະ ໄດ້ກັບສູ່ອ້ອມກອດຂອງພໍ່ແມ່ ແລະ ຄອບຄົວ ດ້ວຍຄວາມອົບອຸ່ນ.