ມີເດຍລາວແຂວງຈຳປາສັກ ຂ່າວ: ທັດຊະນະ
ທະນາຄານແຫ່ງ ສປປ ລາວ ພາກໃຕ້ ພ້ອມດ້ວຍບັນດາ ທະນາຄານທຸລະກິດ, ສະຖາບັນການເງິນຈຸລະພາກ ແລະ ຮ້ານແລກປ່ຽນເງິນຕາຕ່າງປະເທດ ໄດ້ຮ່ວມກັນ ມອບ ອຸປະກອນການແພດ ປະເພດ ຜ້າອັດປາກ-ດັງ 5.000 ຜືນ, ເຈວລ້າງມື 100 ຕຸກ ມູນຄ່າ 4.650.000 ກີບ ແລະ ຕຽງນອນຄົນເຈັບ 36 ຊຸດ ມູນຄ່າ 118.800.000 ກີບ, ລວມເປັນມູນຄ່າທັງໝົດ 123.450.000 ກີບ.

ເພື່ອ ປະກອບສ່ວນ ຊຸກຍູ້-ຊ່ວຍເຫຼືອ ເຂົ້າ ໃນວຽກງານ ສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຢູ່ແຂວງຈຳປາສັກ. ພິທີມອບ-ຮັບ ໄດ້ມີຂຶ້ນ ໃນວັນທີ 11 ພຶດສະພາ 2021 ນີ້, ທີ່ຫ້ອງວ່າການແຂວງຈຳປາສັກ, ໃຫ້ກຽດ ຕາງໜ້າມອບການຊ່ວຍເຫລືອໃນຄັ້ງນີ້ ໂດຍ ທ່ານ ນວນຕາ ແກ້ວມະນີ ຫົວໜ້າ ທະນາຄານແຫ່ງ ສປປ ລາວ ພາກໃຕ້, ເປັນກຽດກ່າວຮັບຂອງ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ, ຜູ້ຊີ້ນຳ ຄະນະກຳມະການຜັນຂະຫຍາຍນະໂຍບາຍ, ມາດຕະການ ເພື່ອຫລຸດຜ່ອນຜົນກະທົບທາງດ້ານເສດຖະກິດ ແລະ ລະດົມການປະກອບສ່ວນຈາກສັງຄົມ, ມີຄະນະສະເພາະກິດສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງຈໍາປາສັກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.


ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ກໍໄດ້ສະແດງຄວາມຂອບໃຈ ແລະ ຊົມເຊີຍມາຍັງທຸກພາກ ກໍ່ຄື ທະນາຄານແຫ່ງ ສປປ ລາວ ພາກໃຕ້ ພ້ອມດ້ວຍບັນດາ ທະນາຄານທຸລະກິດ, ສະຖາບັນການເງິນຈຸລະພາກ ແລະ ຮ້ານແລກປ່ຽນເງິນຕາຕ່າງປະເທດ ຜູ້ປະກອບການ ທຸກພາກສ່ວນ ທີ່ໄດ້ໃຫ້ການສະໜັບສະໜູນ ປະກອບສ່ວນເຂົ້າໃນການຈັດຕັ້ງປະຕິບັດວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ແຂວງຈໍາປາສັກ.

ພ້ອມນີ້, ທ່ານເຈົ້າແຂວງຈຳປາສັກ ຍັງໄດ້ແຈ້ງໃຫ້ຮູ້ເຖິງສະພາບລວມ ຂອງການລະບາດ ຢູ່ແຂວງຈຳປາສັກ ທີ່ມີ ທ່າອຽງດີຂຶ້ນ, ຕົວເລກຜູ້ຕິດເຊື້ອແມ່ນຫລຸດຜ່ອນລົງ ແລະ ສຳລັບການນໍາໃຊ້ ງົບປະມານ, ເຄື່ອງ ອຸປະກອນ ຕ່າງໆ ທີ່ໄດ້ຮັບການສະໜັບສະໜູນ ຈາກທຸກພາກສ່ວນ ທົ່ວສັງຄົມ ອົງການປົກຄອງແຂວງຈຳປາສັກ ແມ່ນໄດ້ແຈກຢາຍໃຫ້ຄະນະສະເພາະກິດສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ທຸກຂັ້ນ ທົ່ວແຂວງ ເພື່ອ ນຳໃຊ້ໃຫ້ຖືກຕາມຈຸດປະສົງ ແລະ ຄາດໝາຍຂອງການປະກອບສ່ວນ ທຸກປະການ.