ໃນລະຫວ່າງ ວັນທີ 26-27 ສິງຫາ 2020 ທີ່ສູນກາງ ຊາວໜຸ່ມ ປະຊາຊົນ ປະຕິວັດລາວ ນະຄອນຫລວງວຽງຈັນ, ຄະນະບໍລິຫານງານສູນກາງ ຊາວໜຸ່ມປະຊາຊົນປະຕິວັດລາວ (ຄຊປປລ) ໄດ້ໄຂກອງປະຊຸມວິສາມັນ ຄົບຄະນະບໍລິຫານງານ ສູນກາງ ຊາວໜຸ່ມ ປະຊາຊົນ ປະຕິວັດລາວ ສະໄໝທີ VII ຂຶ້ນ ໂດຍມີຈຸດປະສົງເພື່ອ ຮັບຟັງລາຍງານການ ຈັດຕັ້ງປະຕິບັດມະຕິ ກອງປະຊຸມໃຫຍ່ຄັ້ງທີ 7 ໄດ້ທົບທວນ ແລະ ສັງເກດຕີລາຄາໝາກຜົນ ຂອງການຈັດຕັ້ງຜັນ ຂະຫຍາຍມະຕິກອງປະຊຸມໃຫຍ່ ຜູ້ແທນຊາວໜຸ່ມທົ່ວປະເທດ ຄັ້ງທີ 7 ໂດຍສະເພາະ ການປະຕິບັດແຜນງານ ໂຄງການ ທີ່ໄດ້ຮັບ ຮອງເອົາໃນກອງປະຊຸມຄັ້ງທີ 7, ພ້ອມກັນນີ້ ກອງປະຊຸມຍັງຈະໄດ້ ທົບທວນຂະບວນການປະກອບສ່ວນ ຂອງຄະນະຊາວໜຸ່ມທີ່ໄດ້ອຸທິດ ແລະ ປະກອບສ່ວນເຂົ້າໃນ ຂະບວນການຫວນຄືນມູນເຊື້ອ, ຂະບວນການຄາລາວານ, ຂະບວນການຕ້ານໄພນ້ຳຖ້ວມ ແລະ ຕ້ານການລະບາດ ຂອງພະຍາດໂຄວິດ-19.

ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານ ສຊປລ ໄດ້ກ່າວວ່າ: ການດຳເນີນກອງປະຊຸມວິສາມັນ ຄົບຄະນະບໍລິຫານງານ ສູນກາງຊາວໜຸ່ມ ປະຊາຊົນປະຕິວັດລາວ ສະໄໝທີ VII ນີ້ ພວກເຮົາຈະໄດ້ພ້ອມກັນສຸມໃສ່ ຄົ້ນຄວ້າປະກອບຄໍາຄິດຄຳເຫັນ ແລະ ພ້ອມກັນຕົກລົງ ເປັນເອກະພາບກັນ ບາງບັນຫາເນື້ອໃນທີ່ສຳຄັນດັ່ງນີ້: ຮ່າງບົດລາຍງານການເມືອງ ທັງ 2 ພາກ ຂອງ ຄຊປປລ ສະໄໝທີ VII; ຮ່າງບົດສະຫລຸບຕີລາຄາ ແຜນພັດທະນາຊາວ ໜຸ່ມ-ເຍົາວະຊົນ 5 ປີ ຄັ້ງທີ I (7ແຜນງານ 40 ໂຄງການ) ແລະ ຮ່າງແຜນພັດທະນາ ຊາວໜຸ່ມ-ເຍົາວະຊົນ 5 ປີ ຄັ້ງທີ II ວິໄສທັດການພັດທະນາ ຊາວໜຸ່ມ-ເຍົາວະຊົນ 2040; ສະຫລຸບຕີລາຄາ ການຈັດຕັ້ງປະຕິບັດ ຂໍ້ແຂ່ງຂັນ 4 ບຸກ ຂອງຊາວໜຸ່ມ, 3 ດີ 4 ຮູ້ຂອງເຍົາວະຊົນ ໃນໄລຍະທ້າຍສະໄໝ; ຮ່າງກົດໝາຍວ່າ ດ້ວຍຄະນະຊາວໜຸ່ມ ປປລ (ສະບັບປັບປຸງ) ແລະ ຮ່າງກົດລະບຽບຊາວໜຸ່ມ ປະຊາຊົນປະຕິວັດລາວ (ສະບັບປັບປຸງ); ຮ່າງບົດສຳຫລວດ ການນຳພາ ຂອງ ຄຊປປລ ສະໄໝທີ 7; ນຳສະເໜີກ່ຽວກັບ ເນື້ອໃນຂອງປຶ້ມມູນ ເຊື້ອ ຄຊປປລ 65 ປີ; ນຳສະເໜີແຜນການຈຸດສຸມ ແຕ່ນີ້ຫາກອງປະຊຸມໃຫຍ່ ຜູ້ແທນຊາວໜຸ່ມລາວ ທົ່ວປະເທດ ຄັ້ງທີ VIII; ແລະ ພິເສດຈະໄດ້ທາບທາມ ບຸກຄະລາກອນ ກອງປະຊຸມໃຫຍ່ຜູ້ແທນ ຊາວໜຸ່ມທົ່ວປະເທດ ຄັ້ງທີ VIII.

ຕະຫລອດໄລຍະ 5 ປີຜ່ານມາ ຄະນະບໍລິຫານງານ ສຊປລ ຍາມໃດກໍ່ຢຶດໝັ້ນແນວທາງ ນະ ໂຍບາຍຂອງພັກ-ລັດ ເອົາໃຈໃສ່ກໍ່ສ້າງບໍາລຸງ ພະນັກງານ ຢ່າງຕໍ່ເນື່ອງ, ຊຶ່ງປະກອບມີ ຄົນລຸ່ນໝຸ່ມ, ລຸ່ນກາງ, ແລະ ລຸ່ນອາວຸໂສ, ມີທັງເຜົ່າ, ແລະ ເພດຍິງ, ຄຽງຄູ່ກັນນັ້ນ ໄດ້ນຳພາສຶກສາອົບຮົມແນວຄິດ ດ້ວຍຫລາຍວິທີ ຫລາຍຮູບການນຳພາ ຈັດຕັ້ງປະຕິບັດວຽກງານ ວິຊາສະເພາະ, ວຽກງານຂະບວນການ, ວຽກງານເຕົ້າໂຮມ ຄວາມສາມັກຄີ ແບບແຜນວິທີການ ສຶກສາອົບຮົມ ຊາວໜຸ່ມແຕ່ລະກຸ່ມ, ແຕ່ລະເປົ້າໝາຍ ໃຫ້ເຂົ້າໃຈຕໍ່ການປະຕິບັດ ລະບຽບກົດໝາຍຂໍ້ກຳນົດຕ່າງໆ ໄດ້ເປັນຢ່າງດີ. ພ້ອມກັນນີ້ ຍັງມີຄວາມສຳເລັດຫລາຍ ໂດຍສະເພາະດ້ານນິຕິກຳ ໄດ້ປັບປຸງກົດໝາຍວ່າດ້ວຍ ຄຊປປລ, ສ້າງຮ່າງກົດ ໝາຍວ່າດ້ວຍຊາວໜຸ່ມລາວ, ສ້າງຮ່າງນະໂຍບາຍ ຊາວໜຸ່ມແຫ່ງຊາດ, ປັບປຸງພາລະບົດບາດຂອງ ສທໝ ແຫ່ງຊາດ ແລະ ເອກະສານສຶກສາອົບຮົມ ແລະ ກົນໄກປະສານງານຂອງບັນດາກົມ, ພະ ແນກການ.

ຕະຫລອດໄລຍະທີ່ຜ່ານມາ ຄະນະບໍລິຫານງານ ສຊປລ ຂອງພວກເຮົາໄດ້ສຸມໃສ່ ໃນການປັບປຸງ ການຈັດຕັ້ງໃຫ້ມີຄວາມ ໜັກແໜ້ນເຂັ້ມແຂງ ໂດຍເລີ່ມ ຈາກການປັບປຸງ ນັບແຕ່ສູນກາງລົງຮອດ ບັນດາແຂວງ, ເມືອງ, ໃຫ້ສອດຄ່ອງຕາມ ພາລະບົດບາດແຕ່ລະຂັ້ນ ການກຳນົດຕຳແໜ່ງ ງານກຳນົດແຜນ ການກໍ່ສ້າງ ພະນັກງານ, ການຂະຫຍາຍຕົວເລກ ສະມາຊິກຊາວໜຸມ, ການຍົກລະດັບທາງດ້ານທິດສະດີ, ການຝຶກອົບຮົມດ້ານ ຄວາມຮູ້ຕ່າງໆໃນໄລຍະສັ້ນ, ໄລຍະຍາວ, ຕິດພັນກັບການປັບປຸງຊັບຊ້ອນ ຈັດວາງພະນັກງານ ຕາມຄວາມເໝາະສົມ, ການປະຕິບັດນະໂຍບາຍ ຕໍ່ສະມາຊິກຊາວໜຸ່ມ ໃນດ້ານຕ່າງໆ, ຜ່ານມາ ເຫັນວ່າປະຕິບັດ ໄດ້ດີເທົ່າທີຄວນ. ນອກຈາກນີ້, ຄະນະບໍລິຫານງານ ສຊປລ ຂອງພວກເຮົາຍັງໄດ້ເອົາໃຈໃສ່ ຕໍ່ກັບວຽກງານພົວພັນຮ່ວມມື ກັບຕ່າງປະເທດ ໃນຂົງ ເຂດວຽກງານ ຊາວໜຸ່ມ-ເຍົາວະຊົນ ໂດຍປະຕິບັດຕາມແນວທາງ ນະໂຍບາຍການ ຕ່າງປະເທດຂອງພັກ. ເປັນເຈົ້າການໃນການ ຈັດຕັ້ງຜັນ ຂະຫຍາຍວຽກງານ ດັ່ງກ່າວເຂົ້າໃນວຽກງານຂອງ ຄຊປປລ ແຕ່ລະຂັ້ນ, ຂະແໜງການໂດຍມີ ການຮ່ວມມືເພື່ອການພັດທະນາ ຄຊປປລ ແຕ່ລະຂັ້ນສາມາດ ຍາດແຍ່ງເອົາການ ສະໜັບສະໜູນ, ການຊ່ວຍເຫລືອທາງ ດ້ານວິຊາການທຶນຮອນ ເພື່ອການຝຶກອົບຮົມ, ວັດຖຸອຸປະກອນຕ່າງໆນຳມາສູ່ການ ຈັດຕັ້ງ ແລະ ຊາວໜຸ່ມເຍົາວະຊົນ ນັບມື້ເພີ່ມຂຶ້ນເລື້ອຍໆ, ທ່ານ ອາລຸນໄຊ ກ່າວ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)