ຕໍ່ການລະບາດຂອງພະຍາດໂຄວິດ-19 ຢ່າງຮຸນແຮງ ໃນກໍລະນີໂຮງງານອານພີລາວ ຢູ່ບ້ານໜອງທາເໜືອ ເມືອງຈັນທະບູລີ ນະຄອນຫຼວງວຽງຈັນນັ້ນ ທ່ານ ໄຊບັນດິດ ຣາຊພົນ ປະທານສະມາຄົມອຸດສາຫະກຳຕັດຫຍິບລາວ ໄດ້ຊີ້ແຈງຜ່ານລາຍການ “ຮອບບ້ານຜ່ານເມືອງ” ຂອງວິທະຍຸກະຈາຍສຽງແຫ່ງຊາດລາວ ໃນວັນທີ 21 ກັນຍາ 2021 ວ່າ: ສາເຫດຂອງການຕິດເຊື້ອແມ່ນມາຈາກນາຍຊ່າງຄົນລາວ ທີ່ໄປຊຸມແຊວກັບນາຍຊ່າງຄົນໄທ ຫຼັງຈາກນັ້ນຖືກກວດຈີ່ງຮູ້ວ່າຕິດເຊື້ອພະຍາດໂຄວິດ-19 ສຳລັບນາຍຊ່າງຄົນໄທສອງຄົນທີ່ເຮັດວຽກຢູ່ໂຮງງານອິນທິເມດ ນັ້ນມາຢູ່ລາວດົນແລ້ວ ຄືຜູ້ທີ່ໜື່ງເຮັດວຽກໄດ້ 8 ປີ ແລະ ຜູ້ທີສອງເຮັດວຽກໄດ້ 2 ປີ ເຊີ່ງທັງສອງບໍ່ໄດ້ກັບບ້ານເກີດເລີຍນັບແຕ່ການແຜ່ລະບາດ ຂອງພະຍາດໂຄວິດ-19.

ເວົ້າແບບສັ້ນໆ ແມ່ນ: ການຕິດເຊື້ອໃນຄັ້ງນີ້ບໍ່ແມ່ນການນຳເຂົ້າເນີ! ແມ່ນການຕິດເຊື້ອໃນຊຸມຊົນເອງ ແຕ່ນີ້ຕໍ່ໄປຕົວເລກຈະສູງຂື້ນ ສຳລັບຜູ້ຕິດເຊື້ອໃນໂຮງງານນີ້ ຈົນກ່ວາການກວດຫາເຊື້ອສຳເລັດ ຈື່ງຈະຫຼຸດຕົວເລກລົງໄດ້ ດຽວນີ້ທາງການຈັດຕັ້ງກ່ຽວຂ້ອງເພີ່ນຂຸ້ນຂ້ຽວກວດຫາເຊື້ອເພື່ອຈຳກັດວົງບໍ່ໃຫ້ມັນແຜ່ກວ້າງອອກໄປອີກ.

ຂໍໃຫ້ພີ່ນ້ອງມີສະຕິຢ່າແຕກຕື່ນ ຈົ່ງພາກັນດຳລົງຊີວິດປົກກະຕິແບບໃໝ່ New normal.

#ມິເດຍລາວ