ມີເດຍລາວແຂວງເຊກອງ ໃນຕົ້ນເດືອນ ມິຖຸນາ 2021 ນີ້, ຄອບຄົວການນຳແລະນັກທຸລະກິດເມືອງທ່າແຕງແຂວງເຊກອງນຳໂດຍ ທ່ານ ນາງ ລຸນນີ ກອນເຍີໄດ້ຮ່ວມສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດຢູ່ທີ່ໂຮງຮຽນປະຖົມສົມບູນ ບ້ານ ປະໄລ່ ແລະ ໂຮງຮຽນປະຖົມສົມບູນ ບ້ານ ປະແຫຼງເໜືອ,ໂດຍມີທ່ານ ນາງ ບຸນຍັງ ວົງສະນຸພິດ ຮອງປະທານສະຫະພັນແມ່ຍິງເມືອງ,ມີອົງການປົກຄອງບ້ານ-ສະຫະພັນແມ່ຍິງບ້ານ,ຄູອາຈານພ້ອມດ້ວຍລູກຫຼານເຂົ້າຮ່ວມ.

ໃນໂອກາດນີ້ ທ່ານ ນາງ ບຸນຍັງ ວົງສະໜູພິດ ຮອງປະທານສະຫະພັນແມ່ຍິງເມືອງຕາງໜ້າໃຫ້ແກ່ຄອບຄົວການນຳ ແລະ ນັກທຸລະກິດເມືອງທ່າແຕງ, ໄດ້ຍົກໃຫ້ເຫັນຄວາມໝາຍ,ຄວາມສຳຄັນຂອງວັນເດັກນ້ອຍສາກົນວ່າ: ເດັກນ້ອຍແມ່ນຊັບພະຍາກອນມະນຸດທີ່ມີຄຸນຄ່າມະຫາສານ, ເປັນຄັງສົມບັດລວມຂອງຊາດ ແລະ ເປັນມໍລະດົກອັນລ້ຳເລີດທີ່ບໍ່ສາມາດປະເມີນມູນຄ່າໄດ້. ເດັກນ້ອຍຂອງຊາດໃດເຂົາເຈົ້າກໍເປັນຜູ້ສືບທອດພາລະກິດຂອງຊາດນັ້ນຍັງເປັນຜູ້ສືບສານຮີດຄອງ, ວັດທະນະທຳ, ເຕັກ ນິກວິທະຍາສາດທີ່ບັນພະບູລຸດສ້າງໄວ້ໃຫ້ຍືນຍົງ ແລະ ຂະຫຍາຍຕົວກໍເຮັດໃຫ້ປະເທດຊາດມີຄວາມຈະເລີນສີວິໄລກ້າວໜ້າຍິ່ງຂຶ້ນ,

ຖ້າຫາກເດັກນ້ອຍໄດ້ຮັບການພັດທະນາທີ່ດີໃນວັນນີ້ກໍຄືຜູ້ໃຫຍ່ທີ່ມີຄຸນນະພາບ ແລະ ເປັນຜູ້ສືບທອດທີ່ດີໃນວັນໜ້າ, ເດັກໃນມື້ນີ້ຈະກາຍເປັນຜູ້ໃຫຍ່ໃນມື້ໜ້າ ແລະ ຈະເປັນຄົນຕັດສິນໃຈຊາຕາກຳຕໍ່ປະເທດຊາດກໍຄືຄວາມຢູ່ດີກິນດີ ແລະ ຮັ່ງມີຜາສຸກຂອງປະຊາຊົນກໍຄືຄວາມຈະ ເລີນຮຸ່ງເຮືອງຂອງບ້ານເມືອງ. ສະນັ້ນ,ທຸກພາກສ່ວນໃນສັງຄົມຕະຫຼອດຮອດພໍ່ແມ່ຜູ້ປົກຄອງ ແລະ ຄອບຄົວຂອງເດັກພ້ອມກັນເອົາໃຈໃສ່ສະໜັບສະໜູນ ແລະ ປະກອບສ່ວນໃນການປົກປ້ອງຊຸກຍູ້ສົ່ງເສີມ ແລະ ພັດທະນາເດັກນ້ອຍລາວໃຫ້ເຕີບໃຫຍ່ຢ່າງມີຄຸນນະພາບສູງ ແລະ ພໍ່ແມ່ຜູ້ປົກຄອງຈົ່ງເອົາໃຈໃສ່ເບິ່ງແຍງລ້ຽງດູເດັກໃຫ້ເຕີບໃຫຍ່, ເອົາໃຈໃສ່ຮັກສາຄວາມປອດໄພຂອງເດັກ,ຊຸກຍູ້ ແລະ ສົ່ງເສີມການພັດທະນາເດັກຢ່າງຮອບດ້ານ, ປົກປ້ອງເດັກຈາກໄພອັນຕະລາຍຕ່າງໆ, ອຳນວຍຄວາມສະດວກໃຫ້ເດັກໄດ້ຮັບການສຶກສາ, ໄດ້ເຂົ້າຮຽນໃຫ້ເປັນຄົນດີຂອງຄອບຄົວ, ສັງຄົມ ແລະ ເປັນຜູ້ສືບທອດພາລະກິດຂອງປະເທດຊາດ,

ພ້ອມທັງຮຽກຮອງໃຫ້ພໍ່ແມ່ຜູ້ປົກຄອງເດັກຕ້ອງເອົາໃຈໃສ່ດູແລລູກເປັນຢ່າງດີ, ໝັ່ນສຶກສາອົບຮົບໃຫ້ລູກເປັນເດັກດີຮຽນເກັ່ງ ແລະໃຫ້ຄວາມອົບອຸ່ນໃຫ້ແກ່ເຂົາເຈົ້າ,ແລະໄດ້ມອບອຸປະກອນການຮຽນ,ຜ້າປິດປາກ-ດັງ,ເຈວລ້າງມື, ,ເຈ້ຍເອຊີ,ບິກຂຽນ ແລະ ເຂົ້າໜົມໃຫ້ແກ່ໂຮງຮຽນອີກຈ່ຳນວນໜື່ງລວມມູນຄ່າ 1 ລ້ານກວ່າກີບ.
ຂ່າວ-ພາບ: ເຈີນ ແດນວົງວິຈິດ ( 7-6-2021 )