ມີເດຍລາວແຂວງສາລະວັນ ໂດຍທິດລານີ ໂຄດໂຍທາ. ວັນທີ29ເມສາ2021 ນີ້, ຄອບຄົວການນໍາ ຮ່ວມກັບສະຫະພັນແມ່ຍິງແຂວງສາລະວັນ ມອບເຄື່ອງຊ່ວຍເຫຼືອໃຫ້ກັບກຸ່ມເປົ້າໝາຍທີ່ປະຕິບັດໜ້າທີ່ີ່ຢູ່ຕາມຈຸດກັ່ນກອງຂອງແຂວງ ແລະເມືອງ 4 ເມືອງຄື: ເມືອງສາລະວັນ, ວາປີ, ຄົງເຊໂດນ ແລະເມືອງລະຄອນເພັງ ເພື່ອປະກອບສ່ວນເຂົ້າໃນວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19, ນໍາທິມໂດຍ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ, ນາງ ວາດສະໜາ ໂພໄຊຍະວົງ ປະທານສະຫະພັນແມ່ຍິງ ແຂວງສາລະວັນ, ມີຕາງໜ້າຄອບຄົວການນໍາຂອງແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ເຄື່ອງອຸປະໂພກ-ບໍລິໂພກທີ່ມອບໃນຄັ້ງນີ້ປະກອບມີ: ເຂົ້າກ່ອງ 300 ກ່ອງ, ມີ່ກ່ອງ 50 ແພັກ, ກາເຟ ແລະ ໂອວັນຕິນ 30 ຖົງ, ນໍ້າດື່ມ 40 ແກັດ, ຜ້າອັດປາກ 200 ກັບ, ຢາສີຟັນ 5 ແກັດແລະອື່ນໆ ລວມມູນຄ່າເກືອບ 15 ລ້ານກີບ. ເຊິ່ງເຄື່ອງຈໍານວນດັ່ງກ່າວແມ່ນນໍາໄປມອບໃຫ້ກັບກຸ່ມເປົ້າໝາຍ ໂດຍສະເພາະແມ່ນຜູ້ທີ່ປະຕິບັດໜ້າທີ່ ຕາມຈຸດກັ່ນກອງ, ຈຸດກັກບໍລິເວນ ຕາມເທດສະບານແຂວງ ແລະ ບັນດາເມືອງ: ຈຸດເມືອງສາລະວັນ ມີ 2 ຈຸດ, ເມືອງວາປີ 3 ຈຸດ, ເມືອງຄົງເຊໂດນ 3 ຈຸດ, ເມືອງລະຄອນເພັງ 4 ຈຸດ