ມີເດຍລາວແຂວງໄຊຍະບູລີ ຂ່າວ-ພາບ: ອຸ່ນເຮືອນ ໂພທິລັກ
ເພື່ອເປັນການຊ່ວຍເຫຼືອບັນເທົາທຸກໃຫ້ກັບປະຊາຊົນຜູ້ທີ່ໄດ້ຮັບຜົນກະທົບຈາກໄພພິບັດ ນໍ້າຖ້ວມຄັ້ງວັນທີ 14 ມິຖຸນາ ທີ່ຜ່ານມາ ໂດຍສະເພາະແມ່ນຄອບຄົວຜູ້ທີ່ຖືກນໍ້າສຸເຮືອນໄຫຼ, ດິນເຈື່ອນຖົມເຮືອນ, ເນື້ອທີ່ທໍາການຜະລິດ, ສັດລ້ຽງ ແລະ ອື່ນໆ, ໃນລະຫ່າງວັນທີ 24-25 ມິຖຸນາ ປີນີ້, ທ່ານ ເພັດພິໄຊ ສູນວິໄລ ຮອງເຈົ້າແຂວງ, ປະທານຄະນະກໍາມະການຄຸ້ມຄອງໄພພິບັດຂັ້ນແຂວງ, ທ່ານ ໜູເກນ ພັນລັກ ວ່າການ ຫົວໜ້າພະແນກ ຮສສ ແຂວງ ພ້ອມຄະນະ ໄດ້ນໍາເອົາເຄື່ອງຊ່ວຍເຫຼືອບັນເທົາທຸກມາມອບໃຫ້ຜູ້ປະຊົບໄພພິບັດຢູ່ເມືອງເງິນ, ເມືອງ ຫົງສາແລະ ເມືອງ ໄຊສະຖານ,

ເຄື່ອງຊ່ວຍເຫຼືອບັນເທົາທຸກປະກອບມີ: ນໍ້າດື່ມ, ເຂົ້າສານ, ອາຫານແຫ້ງ, ເຄື່ອງນຸ່ງ-ຮົ່ມ ແລະ ເຄື່ອງໃຊ້ເຮືອນຄົວ, ເຊິ່ງຜົນເສຍຫາຍຈາກໄພພິບັດຄັ້ງນີ້ ຢູ່ເມືອງ ຫົງສາ ເກີດດີນເຈື່ອນຖົມເຮືອນ ມີ 1 ຫຼັງ, ມີຈຳນວນພົນ 2 ຄົນ, ຍິງ 1 ຄົນ ( ບໍ່ສາມາດອາໄສຢູ່ໄດ້ ) ລວມມູນຄ່າເສຍຫາຍ 54.317.000 ກີບ , ເມືອງ ເງີນ ນ້ຳຖ້ວມເຮືອນ 1 ບ້ານ, ມີ 19 ຄອບຄົວ, ຈຳນວນພົນ 71 ຄົນ, ຍິງ 33 ຄົນ ລວມມູນຄ່າເສຍຫາຍ 47.763.000 ກີບ, ດີນເຈືອນຖົມເຮືອນ 1 ຫຼັງ, ມູນຄ່າເສຍຫາຍ 150.000.000 ກີບ, ເມືອງໄຊສະຖານ ນ້ຳຖ້ວມເຮືອນ 1 ບ້ານ ຈຳນວນ 17 ຄອບຄົວ, ຈຳນວນພົນ 99 ຄົນ, ຍິງ 43 ຄົນ ລວມມູນຄ່າເສຍຫາຍ 99.658.000 ກີບ,

ໂອກາດດັ່ງກ່າວ ທ່ານ ເພັດພິໄຊ ສູນວິໄລ ຮອງເຈົ້າແຂວງ, ປະທານຄະນະກໍາມະການຄຸ້ມຄອງໄພພິບັດຂັ້ນແຂວງ ກໍ່ໄດ້ຮຽກຮ້ອງໃຫ້ຄະນະກໍາມະການຄຸ້ມຄອງໄພພິບັດຂັ້ນເມືອງຈົ່ງສືບຕໍ່ໃຫ້ການຊ່ວຍເຫຼືອປະຊາຊົນຜູ້ທີ່ໄດ້ຮັບຜົນກະທົບ, ເລັ່ງເກັບກໍາຂໍ້ມູນຜົນເສຍຫາຍໃຫ້ລະອຽດ ແລະ ວ່ອງໄວ, ຊັດເຈນ, ມີມູນຄວາມຈິງ, ສືກສາອົບຮົມປະຊາຊົນໃຫ້ມີຄວາມເຂົ້າໃຈໃນການຊ່ວຍເຫຼືອຂອງພາກລັດ, ເຖິງວ່າບໍ່ໄດ້ຕາມຄວາມຕ້ອງການແຕ່ກໍ່ສາມາດແບ່ງເບົາພາລະຂອງຄອບຄົວ, ພ້ອມດຽວກັນກໍ່ໃຫ້ຈັດສັນທີ່ຢູ່ອາໄສໃໝ່ໃຫ້ກັບປະຊາຊົນເຂດທີ່ມີຄວາມສ່ຽງ.